એરપોર્ટની મોંઘી દુકાનોમાંથી મુક્તિ! હવે એરપોર્ટ પર ગેટ પાસે બેઠા-બેઠા Blinkit થી મંગાવો નાસ્તો અને મનગમતા ગેજેટ્સ

ભારતીય ઉડ્ડયન ક્ષેત્રમાં એક ક્રાંતિકારી ફેરફાર કરતા, અદાણી એરપોર્ટ હોલ્ડિંગ્સ લિમિટેડ (AAHL) એ ક્વિક કોમર્સ પ્લેટફોર્મ ‘Blinkit’ સાથે હાથ મિલાવ્યા છે. આ ભાગીદારી હેઠળ મુંબઈના છત્રપતિ શિવાજી મહારાજ ઈન્ટરનેશનલ એરપોર્ટ (CSMIA) પર ભારતની પ્રથમ ‘ઇન-ટર્મિનલ ક્વિક કોમર્સ’ સેવા શરૂ કરવામાં આવી છે. હવે મુસાફરો સિક્યોરિટી ચેક પત્યા પછી બોર્ડિંગ ગેટ પર બેઠા-બેઠા મોબાઈલ એપ દ્વારા જરૂરી સામાન ઓર્ડર કરી શકશે.

મુસાફરોની સૌથી મોટી સમસ્યાનું સમાધાન

ઘણીવાર મુસાફરો ઉતાવળમાં ફોનનું ચાર્જર, હેડફોન અથવા જરૂરી દવાઓ ઘરે ભૂલી જતા હોય છે. વળી, એરપોર્ટની અંદરની દુકાનોમાં વસ્તુઓ મોંઘી હોય છે અથવા તો સમયના અભાવે ખરીદી કરવી મુશ્કેલ બને છે. આ સમસ્યાને જોતા હવે મુંબઈ એરપોર્ટના ટર્મિનલ 2 (ડોમેસ્ટિક ડિપાર્ચર) પર મુસાફરો બ્લિંકિટ એપ દ્વારા 2,500 થી વધુ પ્રોડક્ટ્સનો ઓર્ડર આપી શકશે.

શું-શું મંગાવી શકાશે?

આ સેવામાં ઈલેક્ટ્રોનિક્સ, સ્નેક્સ, પુસ્તકો, પર્સનલ કેર પ્રોડક્ટ્સ અને મુસાફરીની અન્ય જરૂરી વસ્તુઓનો સમાવેશ થાય છે. ઓર્ડર કર્યાની થોડી જ મિનિટોમાં એરપોર્ટનો ટ્રેન્ડ સ્ટાફ મુસાફર સુધી સામાન પહોંચાડી દેશે. આ સુવિધા બોર્ડિંગ ગેટ, લાઉન્જ અને ફૂડ કોર્ટ જેવા વિસ્તારોમાં ઉપલબ્ધ રહેશે.

સુરક્ષાનું ખાસ ધ્યાન

એરપોર્ટની કડક સુરક્ષા વ્યવસ્થાને ધ્યાનમાં રાખીને ડિલિવરી માટે ખાસ ‘વોકર્સ’ (પગપાળા ચાલતા સ્ટાફ) તૈનાત કરવામાં આવ્યા છે. સુરક્ષા નિયમોનું પાલન થાય તે માટે પાણીની બોટલ કે કોલ્ડ ડ્રિંક્સ જેવા પ્રવાહી પદાર્થો સીધા એરપોર્ટની માન્ય ઇન્વેન્ટરીમાંથી જ આપવામાં આવશે.

અમદાવાદમાં ક્યારે શરૂ થશે?

મુંબઈમાં આ પાયલોટ પ્રોજેક્ટની સફળ શરૂઆત બાદ, અદાણી ગ્રુપ દ્વારા સંચાલિત અન્ય એરપોર્ટ જેવા કે અમદાવાદ (SVP I એરપોર્ટ), લખનૌ અને જયપુરમાં પણ ટૂંક સમયમાં આ સેવા શરૂ કરવામાં આવે તેવી પૂરેપૂરી શક્યતા છે.