Breaking News : દુનિયાની સમસ્યાનો અંત..! 48 કલાક બાદ Strait of Hormuz સંપૂર્ણપણે ખુલી ગયું, Trump એ હટાવી નાકાબંધી
48 કલાકની નાકાબંધી બાદ હોર્મુઝ સ્ટ્રેટ ફરી ખુલ્લું મુકાયું છે. ડોનાલ્ડ ટ્રમ્પે જાહેરાત કરી કે ચીનની ખાતરી બાદ નિર્ણય લેવાયો કે ઈરાનને શસ્ત્રો સપ્લાય નહીં થાય.
48 કલાક બાદ હોર્મુઝ સ્ટ્રેટ ફરી સંપૂર્ણપણે ખુલ્લું કરવામાં આવ્યું છે. Donald Trump એ નાકાબંધી હટાવવાની જાહેરાત કરતા જણાવ્યું કે હવે સ્ટ્રેટ તમામ દેશો માટે ખુલ્લું છે. તેમણે પોતાના નિવેદનમાં કહ્યું કે આ સમાચાર શેર કરતા તેમને આનંદ થાય છે. મહત્વનું છે કે, યુનાઇટેડ સ્ટેટ્સે 13 એપ્રિલે હોર્મુઝ સ્ટ્રેટ પર નાકાબંધી જાહેર કરી હતી અને તેને અમલમાં મૂકવા માટે સમુદ્રમાં આશરે 10,000 સૈનિકો તૈનાત કરવામાં આવ્યા હતા.
હવે હોર્મુઝ સ્ટ્રેટ ફરી ક્યારેય બંધ નહીં થાય
ટ્રમ્પે વધુમાં જણાવ્યું કે સ્ટ્રેટને ફરીથી ખોલવાનો નિર્ણય ચીન સાથેની ચર્ચા બાદ લેવામાં આવ્યો છે. તેમના મુજબ, China એ Iran ને શસ્ત્રોની સપ્લાય ન કરવાનો વિશ્વાસ આપ્યો છે. આ ખાતરી મળ્યા પછી જ સ્ટ્રેટને કાયમી રીતે ખુલ્લું રાખવાનો નિર્ણય લેવામાં આવ્યો છે. ટ્રમ્પે દાવો કર્યો કે હવે હોર્મુઝ સ્ટ્રેટ ફરી ક્યારેય બંધ નહીં થાય અને તે તમામ દેશો માટે ખુલ્લું રહેશે.
આ દરમિયાન, કેટલાક અહેવાલોમાં એવો દાવો કરવામાં આવ્યો હતો કે ચીને ઈરાનને કેટલાક શસ્ત્રો પૂરાં પાડ્યા હતા. આ મુદ્દે ટ્રમ્પે જણાવ્યું કે તેમણે ચીનના રાષ્ટ્રપતિને પત્ર લખીને આ સપ્લાય બંધ કરવાની વિનંતી કરી હતી, જેને ચીન તરફથી સ્વીકારવામાં આવી છે. તેમણે Xi Jinping સાથેના પોતાના સંબંધોનો પણ ઉલ્લેખ કર્યો અને કહ્યું કે બંને દેશો વચ્ચે સકારાત્મક સંવાદ ચાલુ છે.
20 જહાજો સ્ટ્રેટમાંથી પસાર થઈ ગયા
હોર્મુઝ સ્ટ્રેટ ફરી ખોલવાની પાછળ કેટલાક મહત્વના કારણો પણ સામે આવ્યા છે. અહેવાલો મુજબ, યુએસ દ્વારા લાગુ કરાયેલી નાકાબંધી અસરકારક સાબિત થઈ નહોતી. નાકાબંધીના પહેલા જ દિવસે લગભગ 20 જહાજો સ્ટ્રેટમાંથી પસાર થઈ ગયા હતા, જેમાં મોટાભાગના ચીનના જહાજો હતા. તેમને અટકાવવાનો પ્રયાસ યુએસ માટે વધુ તણાવ ઊભો કરી શકે તેમ હતો, કારણ કે ચીને કડક ચેતવણી આપી હતી.
બીજી તરફ, બ્રિટન અને ફ્રાન્સ જેવા દેશોએ પણ આ મામલે સક્રિય રસ દર્શાવ્યો હતો. France એ સ્પષ્ટ કહ્યું હતું કે સંઘર્ષમાં સામેલ દેશોને સ્ટ્રેટનો ઉપયોગ કરવાની મંજૂરી આપવી યોગ્ય નથી, કારણ કે તે વૈશ્વિક વેપાર અને સુરક્ષાને અસર કરી શકે છે. આ માટે બ્રિટન અને ફ્રાન્સ એક વ્યાપક ગઠબંધન ઉભું કરવાની દિશામાં કામ કરી રહ્યા હતા.
વાટાઘાટોમાં સ્થિતિ નબળી પડી શકે
આ ઉપરાંત, યુનાઇટેડ સ્ટેટ્સ અને ઈરાન વચ્ચે શાંતિ ચર્ચાઓ માટે ટૂંક સમયમાં બેઠક યોજાવાની છે. આવી સ્થિતિમાં જો નાકાબંધી નિષ્ફળ જાય અને યુએસને નુકસાન થાય, તો વાટાઘાટોમાં તેની સ્થિતિ નબળી પડી શકે. આ કારણે, ટ્રમ્પ પ્રશાસને સમયસર નાકાબંધી હટાવીને પરિસ્થિતિને સંભાળવાનો પ્રયાસ કર્યો હોવાનું માનવામાં આવે છે.
