મહેસાણામાં ચાલતી ટ્રેનમાંથી 13 લાખની મત્તા ભરેલ પર્સ ઝૂંટવી ફરાર થઈ ગયો, પોલીસે તપાસ શરુ કરી

હવે કાર કે બાઈકમાં જ નહીં પરંતુ રેલવેમાં પણ સાવધાન રહેજો. કિંમતી સર સામાનને બરાબર સાચવીને રાખજો. ગઠિયાઓ નજર ચૂકવીને સિફતપૂર્વક ચોરી કરી જતા હોય છે એ તો સાંભળ્યુ છે, પરંતુ એક્સપ્રેસ ટ્રેનમાંથી પણ ગઠિયાઓ ચોરી પર્સ તફડાવી કે ઝૂંટવીને અંધારામાં પલાયન થઈ જતા હોય છે. ઓછી જોવા મળતી આવી ઘટના મહેસાણામાં નોંધાઈ છે.

મહેસાણા રેલવે પોલીસ દ્વારા આ મામલે ફરિયાદ નોંધવામાં આવી છે. પોલીસે હવે ગઠિયાની ઓળખ કરવા માટે તપાસ શરુ કરી છે. આ માટે ટ્રેનમાં કેવી રીતે તે ચડ્યો અને ક્યાં કેવી રીતે વહેલી પરોઢના અંધકારમાં ફરાર થઈ ગયો એ તમામ વિગતોની તપાસ શરુ કરવામાં આવી છે.

એક્સપ્રેસ ટ્રેનમાં 13 લાખ ગુમાવ્યા

વાત મહેસાણાની છે. જોધપુરના ડેડિયા વાલેસરનો પરિવાર એક્સપ્રેસ ટ્રેનમાં મુસાફરી કરી રહ્યો હતો. આ દરમિયાન વહેલી પરોઢના અરસા દરમિયાન એક ગઠિયાએ પરિવારની યુવતી પાસે રહેલ પર્સને ઝૂંટવી લીધુ હતુ. હાલમાં મુંબઈ રહેતી યુવતી પરિવાર સાથે ટ્રેનમાં મુસાફરી કરી રહી હતી. આ દરમિયાન મહેસાણા રેલવે સ્ટેશન નજીક તેની સાથે આ ઘટના સર્જાઈ હતી.

તેની પાસે રહેલ સોના અને ચાંદીના ઘરેણાં અને રોકડ રકમ ભરેલ પર્સને તેણે સીટમાં સુવા દરમિયાન પોતાના માથા નિચે દબાવીને સંતાડી રાખ્યુ હતુ. સલામત રહે કિંમતી સામાન એ માટે તેણે પોતાનું માથું તેની પર દબાવી રાખ્યું હતુ. પરંતુ મહેસાણા રેલવે સ્ટેશન પર ટ્રેન પહોંચતા થોડીક ધીમી પડી હતી. આ દરમિયાન મોકો જોઈને અજાણ્યો શખ્શ યુવતીના માથા નિચે દબાવેલ પર્સ ઝૂંટવીને ધીમી ચાલી રહેલ એક્સપ્રેસ ટ્રેનમાંથી ફરાર થઈ ગયો હતો.

આ પણ વાંચોઃ થર્ટી ફર્સ્ટને લઈ દારુની હેરાફેરી પર પોલીસની બાજ નજર, શામળાજી નજીકથી ઝડપાયો જથ્થો

મહેસાણા રેલવે પોલીસે તપાસ શરુ કરી

આ મામલે હવે મહેસાણા રેલેવે પોલીસે 13 લાખની મત્તાની ચોરી અંગેની ફરિયાદ નોંધીને તપાસ શરુ કરી છે. યુવતી નોંધાવેલી ફરિયાદનુસાર પર્સમાં સોના અને ચાંદીના દાગીના અને રોકડ રકમ ભરેલ હતા. પોલીસે હવે આરોપીની ઓળખ કરવા માટે તપાસ શરુ કરી છે. આ માટે રેલવે સ્ટેશનના સીસીટીવી ફૂટેજ સહિતની ચકાસણી શરુ કરાઈ છે.

મહેસાણા સહિત ગુજરાતના તમામ જિલ્લાના સમાચાર વાંચવા માટે અહીં ક્લિક કરો