ઈલેક્ટ્રીક વાહનો ખરીદવાનું વિચારતા લોકો માટે મોટી જાહેરાત, સરકારે ઈ-વ્હીકલ પર આપી 5% ટેક્સની છૂટ
ઈલેક્ટ્રીક વાહનોને લઈને રાજ્ય સરકારે મોટી જાહેરાત કરી છે. ગ્રીન મોબિલિટીને પ્રોત્સાહન મળે તેવા હેતુસર રાજ્ય સરકારે ઈલેક્ટ્રીક વાહનો પર 5 ટકા ટેક્સની છૂટ આપી છે. ગૃહ રાજ્યમંત્રી અને ટ્રાન્સપોર્ટ મંત્રી હર્ષ સંઘવીએ આ જાહેરાત કરી છે..
ગુજરાત રાજ્ય સરકારે ઈલેક્ટ્રિક વાહનોને પ્રોત્સાહન આપવા માટે મોટી જાહેરાત કરી છે. રાજ્યના ગૃહ રાજ્યમંત્રી તથા ટ્રાન્સપોર્ટ મંત્રી હર્ષ સંઘવીએ જાહેરાત કરી કે હવે ઇલેક્ટ્રિક વાહનો પર રસ્તા કર (Road Tax)માં પાંચ ટકાની છૂટ અપાશે. અગાઉ EV ખરીદનારાઓને 6 ટકા રોડ ટેક્સ ભરવો પડતો હતો, જે હવે ઘટાડી માત્ર 1 ટકા રાખવામાં આવ્યો છે. આ નિર્ણય આજથી જ અમલમાં આવશે અને આગામી 31 માર્ચ 2026 સુધી લાગુ રહેશે.
ગ્રીન મોબિલિટીને પ્રોત્સાહન આપી કાર્બન ઉત્સર્જન ઘટાડવાનો ધ્યેય
ગુજરાતમાં ગ્રીન મોબિલિટીને પ્રોત્સાહન આપવાના હેતુથી આ નિર્ણય કરવામાં આવ્યો છે. રાજ્યમાં ઈલેક્ટ્રિક વાહનોનું પ્રમાણ વધે અને પરંપરાગત પેટ્રોલ-ડીઝલ આધારિત વાહનોનો ઉપયોગ ઘટે તે સરકારનું ધ્યેય છે. આ પગલાથી ખાસ કરીને ઇલેક્ટ્રિક કારખરીદનારાઓને સીધો લાભ મળશે.નાગરિકો હવે પોતાનું વાહન ઓનલાઈન પણ નોંધાવી શકે છે. નોંધણી માટે રાજ્ય સરકારે ‘વાહન 4.0 પોર્ટલ’ ઉપલબ્ધ કરાવ્યું છે, જ્યાંથી ઇલેક્ટ્રિક વાહનો માટે ટેક્સમાં છૂટનો લાભ મેળવી શકાય છે. આ ટેક્સ રિબેટના નિર્ણય સાથે રાજ્ય સરકારે ફરી એકવાર પર્યાવરણના જતન અને નવીનતમ ટેકનોલોજી તરફ આગળ વધવાની દિશામાં રાજ્યવાસીઓને પ્રેરિત કર્યા છે.
ચાર્જિંગ ઈન્ફ્રાસ્ટ્રક્ચર વધારવામાં આવ્યુ
ગુજરાતમાં ઈ-વ્હીકલ પોલિસી માત્ર ટેક્સ રિબેટ પૂરતી સિમીત નથી, રાજ્ય સરકારે વિવિધ સ્તરે EV માટે ઈન્ફ્રાસ્ટ્રક્ચર અને સબ્સિડી યોજનાઓ પણ શરૂ કરી છે. 2021માં ગુજરાત સરકારે ઈવી પોલિસી હેઠળ બાઈક–સ્કૂટર પર ₹10,000 સુધીની અને કાર પર ₹1 લાખ સુધીની સબ્સિડી આપવાની જાહેરાત કરી હતી.
આ ઉપરાંત રાજ્યમાં ચાર્જીંગ ઈન્ફ્રાસ્ટ્રક્ચર વધારવા માટે ગુજરાત સ્ટેટ ઈલેક્ટ્રીસિટી કોર્પોરેશન (GSECL) અને ગુજરાત ઊર્જા વિકાસ નિગમ લિમીટેડ (GUVNL) દ્વારા અમદાવાદ, વડોદરા, સુરત, રાજકોટ સહિતના મુખ્ય શહેરોમાં 100‑થી વધુ પબ્લિક ડીસી ફાસ્ટ ચાર્જિંગ પોઈન્ટ લગાવવામાં આવ્યા છે. રાજ્ય માર્ગ પર 50 kW અને 120 kW ફાસ્ટ-ચાર્જર્સ સાથે 24×7 કામગીરી, તેમજ સૂર્ય એનર્જીથી ચાલતી સોલર-ચાર્જિંગ સ્ટેશનોની પણ યોજના છે.
EV ના વેચાણમાં 30% જેટલો વધારો
આ ઉપરાંત, કેન્દ્ર સરકારની FAME II (Faster Adoption and Manufacturing of Hybrid & EV) યોજના અંતર્ગત પણ ખરીદ પર સબ્સિડી મળે છે, જે રાજ્યની સોશિયલ પ્રોજેક્ટ્સ સાથે કલેક્શન કરીને વધુ લોકપ્રિયતા મેળવી રહી છે. 2023ની રોકાણ ચર્ચાઓ મુજબ, ગુજરાતમાં ઇલેક્ટ્રિક વાહન વેચાણમાં વાર્ષિક 30% જેટલી વૃદ્ધિ નોંધાઈ છે, અને 2026 સુધી EV બજારમાં રાજ્યનો શેર 15% સુધી પહોંચવાની અપેક્ષા છે. આ તમામ પગલાંઓથી કાર્બન ઉત્સર્જન લગભગ 5 લાખ ટન ઘટવાની શક્યતા છે.
