Breaking News: ગુજરાતમાં વરસાદી માહોલ યથાવત, 110 તાલુકામાં વરસાદ ખાબક્યો, કચ્છના માંડવીમાં સૌથી વધુ 6.97 ઇંચ વરસાદ વરસ્યો

ગુજરાતમાં છેલ્લા કેટલાક દિવસોથી વરસાદી માહોલ યથાવત છે. રાજ્યના વિવિધ વિસ્તારોમાં હળવાથી ભારે વરસાદ નોંધાઈ રહ્યો છે. છેલ્લા 24 કલાક દરમિયાન રાજ્યના 110 તાલુકામાં વરસાદ નોંધાયો છે. ખાસ કરીને કચ્છ જિલ્લામાં વરસાદનું જોર વધુ જોવા મળ્યું છે. કચ્છના માંડવીમાં સૌથી વધુ 6.97 ઇંચ વરસાદ ખાબકતાં સ્થાનિક વિસ્તારોમાં પાણી ભરાવાની સ્થિતિ સર્જાઈ હતી.

માંડવી ઉપરાંત કચ્છના અન્ય તાલુકાઓમાં પણ નોંધપાત્ર વરસાદ વરસ્યો છે. અબડાસામાં 2.13 ઇંચ, મુંદ્રામાં 1.69 ઇંચ, નખત્રાણામાં 1.30 ઇંચ અને ભુજમાં 1.26 ઇંચ વરસાદ નોંધાયો છે. જ્યારે લખપતમાં 1 ઇંચ વરસાદ વરસ્યો છે. દેવભૂમિ દ્વારકા જિલ્લામાં પણ વરસાદી માહોલ રહ્યો હતો. ઓખા અને ખંભાળિયામાં 1-1 ઇંચ વરસાદ નોંધાયો છે. રાજ્યના અન્ય વિસ્તારોમાં પણ હળવાથી મધ્યમ વરસાદના ઝાપટાં પડ્યા છે.

ચાર દિવસમાં સિઝનના વરસાદમાં 10 ટકાનો વધારો

રાજ્યમાં છેલ્લા ચાર દિવસથી વરસાદી માહોલ સક્રિય બન્યો છે. જેના કારણે સિઝનના કુલ વરસાદમાં પણ નોંધપાત્ર વધારો થયો છે. છેલ્લા ચાર દિવસમાં પડેલા વરસાદને કારણે સિઝનના કુલ વરસાદમાં આશરે 10 ટકાનો વધારો નોંધાયો છે. અત્યાર સુધીમાં ગુજરાતમાં સિઝનનો કુલ 85 ટકા વરસાદ પડી ચૂક્યો છે. એટલે કે ચોમાસાની સિઝનમાં પડનારા સરેરાશ વરસાદની સરખામણીમાં રાજ્ય મોટાભાગે વરસાદની સ્થિતિ તરફ આગળ વધ્યું છે.

16 તાલુકામાં વરસાદની ઘટ યથાવત

રાજ્યમાં એક તરફ કેટલાક તાલુકામાં ભારે વરસાદ નોંધાઈ રહ્યો છે, તો બીજી તરફ હજુ પણ કેટલાક વિસ્તારોમાં વરસાદની ઘટ જોવા મળી રહી છે. રાજ્યના 16 તાલુકામાં અત્યાર સુધી માત્ર 10 ઇંચ જેટલો વરસાદ નોંધાયો છે. જેના કારણે આ વિસ્તારોમાં ખેડૂતો અને ખેતી પર વરસાદની અછતની અસર જોવા મળી શકે છે.

કચ્છમાં 50 ટકા વરસાદની ઘટ

રાજ્યમાં સરેરાશ વરસાદની સ્થિતિમાં સુધારો થયો હોવા છતાં કચ્છ જિલ્લામાં હજુ પણ વરસાદની લગભગ 50 ટકા ઘટ વર્તાઈ રહી છે. છેલ્લા 24 કલાકમાં કચ્છના અનેક તાલુકામાં સારો વરસાદ પડ્યો હોવા છતાં સિઝન દરમિયાન અત્યાર સુધીના વરસાદમાં કચ્છ અન્ય જિલ્લાઓની સરખામણીમાં પાછળ છે. હવે આગામી દિવસોમાં કચ્છ સહિત રાજ્યના અન્ય વિસ્તારોમાં કેટલો વરસાદ પડે છે તેના પર સિઝનની વરસાદી સ્થિતિ વધુ સ્પષ્ટ થશે.

આ પણ વાંચો- Breaking News : રીલ્સ અને વીડિયો જોવામાં બિહાર દેશમાં નંબર-1, ગુજરાત કયા ક્રમે? જાણો ડેટા વપરાશનું આખું ગણિત