બેંક શેર પસંદ કરવાની ઝંઝટ ખતમ, કોટક મ્યુચ્યુઅલ ફંડે લોન્ચ કર્યો નિફ્ટી બેંક ઇન્ડેક્સ ફંડ, જાણો રોકાણકારોને શું થશે ફાયદો

બેંકિંગ સેક્ટરમાં રોકાણ કરવા માંગતા રોકાણકારો માટે કોટક મહિન્દ્રા એસેટ મેનેજમેન્ટ કંપનીએ નવો ઇન્ડેક્સ ફંડ શરૂ કર્યો છે. કંપનીએ ‘કોટક નિફ્ટી બેંક ઇન્ડેક્સ ફંડ’ લોન્ચ કરવાની જાહેરાત કરી છે. આ ફંડનો ન્યૂ ફંડ ઓફર (NFO) 3 ઓગસ્ટ 2026થી શરૂ થઈ ગયો છે અને રોકાણકારો 17 ઓગસ્ટ 2026 સુધી તેમાં રોકાણ કરી શકે છે. આ એક ઓપન-એન્ડેડ ઇન્ડેક્સ ફંડ છે. સરળ શબ્દોમાં કહીએ તો, NFO બંધ થયા પછી પણ રોકાણકારો નિયમો અનુસાર ગમે ત્યારે તેમાં રોકાણ કરી શકે છે અથવા નાણાં પાછા ખેંચી શકે છે.

આ ફંડ કેવી રીતે કામ કરશે ?

કોટક નિફ્ટી બેંક ઇન્ડેક્સ ફંડનો મુખ્ય ઉદ્દેશ્ય નિફ્ટી બેંક ઇન્ડેક્સના પ્રદર્શનને ટ્રેક કરવાનો અને તેની જેમ જ વળતર આપવાનો છે. જો નિફ્ટી બેંક ઇન્ડેક્સ વધશે તો આ ફંડનું પ્રદર્શન પણ વધશે અને જો બેંકિંગ ઇન્ડેક્સ ઘટશે તો ફંડ પર પણ તેની અસર થશે. આ ફંડ સામાન્ય એક્ટિવ ફંડની જેમ અલગ-અલગ શેર પસંદ કરીને બજાર કરતાં વધુ વળતર મેળવવાનો પ્રયાસ નહીં કરે. તેના બદલે તે નિફ્ટી બેંક ઇન્ડેક્સમાં સામેલ શેરો મુજબ જ રોકાણ કરશે. આ કારણે તેને પેસિવ ફંડ (નિષ્ક્રિય રોકાણ) કહેવાય છે. તેમાં ફંડ મેનેજરે વારંવાર નવા શેર પસંદ કરવાના હોતા નથી, પરંતુ નિર્ધારિત ઇન્ડેક્સ મુજબ પોર્ટફોલિયો જાળવી રાખવાનો હોય છે.

નિફ્ટી બેંક ઇન્ડેક્સમાં 14 બેંકિંગ શેરોનો સમાવેશ

નિફ્ટી બેંક ઇન્ડેક્સ ભારતની 14 મોટી અને સક્રિય બેંકોના પ્રદર્શનને દર્શાવે છે. આ ફંડ દ્વારા રોકાણકારોને એક જ જગ્યાએથી વિવિધ બેંકોના શેરમાં રોકાણ કરવાની તક મળે છે. સામાન્ય રોકાણકાર માટે દરેક બેંકની કમાણી, લોન, ગ્રોથ અને જોખમ અલગથી સમજવું અઘરું હોય છે. આ ફંડમાં રોકાણ કરવાથી એક સાથે 14 બેંકોમાં એક્સપોઝર મળે છે, જેથી કોઈ એક બેંક પર નિર્ભર રહેવાનું જોખમ ઘટે છે. જોકે, આ ફંડ માત્ર બેંકિંગ સેક્ટર પર આધારિત હોવાથી જો સમગ્ર સેક્ટરમાં મંદી આવે તો ફંડ પર પણ દબાણ આવી શકે છે.

દર 6 મહિને થશે રીબેલેન્સિંગ

નિફ્ટી બેંક ઇન્ડેક્સમાં સામેલ શેરોનું દર 6 મહિને રીબેલેન્સિંગ એટલે કે પુનઃસમીક્ષા કરવામાં આવે છે. આ પ્રક્રિયા દરમિયાન કંપનીઓની લિક્વિડિટી, ફ્રી-ફ્લોટ માર્કેટ કેપિટલાઇઝેશન, ટ્રેડિંગ એક્ટિવિટી અને લિસ્ટિંગ હિસ્ટ્રી જેવા માપદંડો ચકાસીને યોગ્ય કંપનીઓને ઇન્ડેક્સમાં રાખવામાં આવે છે અથવા બહાર કરવામાં આવે છે. આ પસંદગી કોઈ વ્યક્તિગત પસંદગી પર નહીં પણ નિયમો પર આધારિત હોય છે.

ઇન્ડેક્સ ફંડમાં રોકાણની ખાસિયત અને ટ્રેકિંગ એરર

• ઓછો ખર્ચ: એક્ટિવ ફંડ્સની તુલનામાં પેસિવ ઇન્ડેક્સ ફંડનો મેનેજમેન્ટ ખર્ચ સામાન્ય રીતે ઓછો હોય છે.
• ટ્રેકિંગ એરર: ફંડ અને તેના બેન્ચમાર્ક ઇન્ડેક્સના વળતરમાં આવતા નાના તફાવતને ટ્રેકિંગ એરર કહે છે. ખર્ચ અને ખરીદ-વેચાણના સમયના કારણે આ તફાવત આવી શકે છે, જેને ફંડ બને તેટલો ઓછો રાખવાનો પ્રયાસ કરે છે.

નિફ્ટી બેંક TRI એ આપ્યો 17.8 ટકા CAGR

કોટક મ્યુચ્યુઅલ ફંડના જણાવ્યા અનુસાર, નિફ્ટી બેંક ટોટલ રિટર્ન ઇન્ડેક્સ (TRI) એ શરૂઆતથી અત્યાર સુધી વાર્ષિક આશરે 17.8 ટકા ચક્રવૃદ્ધિ વૃદ્ધિ દર (CAGR) આપ્યો છે. આ જ સમયગાળા દરમિયાન નિફ્ટી 50 TRI નો CAGR 12.3 ટકા રહ્યો હતો. ટોટલ રિટર્ન ઇન્ડેક્સમાં શેરના ભાવ વધારા સાથે મળતા ડિવિડન્ડનો પણ સમાવેશ થાય છે. જોકે, ભૂતકાળનું પ્રદર્શન ભવિષ્યના વળતરની ગેરંટી આપતું નથી.

નિષ્ણાતોનો અભિપ્રાય

કોટક મહિન્દ્રા AMC ના મેનેજિંગ ડિરેક્ટર નિલેશ શાહે જણાવ્યું કે બેંકિંગ સેક્ટર ભારતની આર્થિક પ્રગતિનો પાયો છે અને નિફ્ટી 50 માં બેંકોનો હિસ્સો 30 ટકાથી વધુ રહ્યો છે. આ ફંડ દ્વારા રોકાણકારોને ભારતીય ઇક્વિટી બજારના સૌથી મહત્વપૂર્ણ ક્ષેત્રમાં હિસ્સેદાર બનવાની સરળ તક મળશે.

કોટક મહિન્દ્રા AMC ના ફંડ મેનેજર સતીશ દોંડાપતિએ જણાવ્યું કે આ ફંડ એવા રોકાણકારો માટે બનાવવામાં આવ્યું છે જેઓ દરેક બેંકની બેલેન્સ શીટ, નફો અને જોખમ અલગથી સમજવાની ઝંઝટ વિના સીધા જ સમગ્ર બેંકિંગ સેક્ટરમાં રોકાણ કરવા માંગે છે.

ડિસ્ક્લેમર:

આ આર્ટિકલ માત્ર માહિતી આપવાના હેતુથી તૈયાર કરવામાં આવ્યો છે. આને કોઈ પણ પ્રકારની ઇન્વેસ્ટમેન્ટ કે શેર ખરીદવા-વેચવાની સલાહ માનવી નહીં. બજારમાં પૈસા રોકતા પહેલાં હંમેશા તમારા પ્રમાણિત નાણાકીય સલાહકારની મદદ અવશ્ય લો.

1047% ના તોફાની રિટર્ન બાદ સ્ટોક સ્પ્લિટની જાહેરાત, 1 શેરના થશે 10 ભાગ, જાણો વિગત