ઓલા-ઉબેર જેવા મોટા પ્લેયર્સની ‘બોલતી બંધ’ ! 10,000 ઇલેક્ટ્રિક કાર સાથે ભારતમાં એન્ટ્રી કરવા જઈ રહી છે આ ‘વિદેશી કંપની’

વિયેતનામની દિગ્ગજ કંપની વિનગ્રુપ (VinGroup) પોતાની ઇલેક્ટ્રિક ટેક્સી સર્વિસ ‘Green SM’ ને ભારતમાં લોન્ચ કરવાની સંપૂર્ણ તૈયારી કરી ચૂકી છે. મીડિયા રિપોર્ટ્સ મુજબ, કંપની 5 જૂનના રોજ વિશ્વ પર્યાવરણ દિવસના અવસરે દિલ્હીના ભારત મંડપમ ખાતે એક ખાસ કાર્યક્રમમાં આની સત્તાવાર જાહેરાત કરશે.

ઓલા, ઉબેર અને રેપિડો જેવા મોટા પ્લેયર્સ માટે આ એન્ટ્રી એક મોટો પડકાર સાબિત થઈ શકે છે. છેલ્લા કેટલાક અઠવાડિયાથી દિલ્હી-એનસીઆર (Delhi-NCR) ના રોડ પર લીલા રંગની ગાડીઓ દોડતી જોવા મળી રહી છે. આનાથી સ્પષ્ટ થાય છે કે, કંપની લોન્ચિંગ પહેલા પોતાના નેટવર્કનું ટેસ્ટિંગ કરી રહી છે.

કેવું હશે બિઝનેસ મોડલ?

Green SM ની કામ કરવાની પદ્ધતિ હાલની ટેક્સી કંપનીઓ કરતાં તદ્દન અલગ છે. ઓલા-ઉબેર જેવા પ્લેટફોર્મ જ્યાં ખાનગી ગાડીના માલિકો અને ડ્રાઇવરોને પોતાની સાથે જોડે છે, ત્યાં વિનગ્રુપ પોતાની ગાડીઓની માલિક પોતે જ હશે.

કંપની ડ્રાઇવરોને સીધા પગાર (સેલરી) પર રાખશે અને ગાડીના સર્વિસિંગ, ચાર્જિંગથી લઈને મેન્ટેનન્સ સુધીની સંપૂર્ણ જવાબદારી પોતે જ ઉઠાવશે. આ મોડલથી કંપનીને પોતાની સર્વિસની ક્વોલિટી પર પૂરો કંટ્રોલ રાખવામાં મદદ મળશે.

ફ્લીટમાં હશે ‘10,000 ઇલેક્ટ્રિક કાર’

પોતાની સર્વિસ માટે કંપની VinFast ની ઇલેક્ટ્રિક MPV નો ઉપયોગ કરશે. આ એ જ ગાડી છે, જે તાજેતરમાં જ ભારતમાં લોન્ચ થઈ છે અને તેમાં 60.13 kWh ની બેટરી આપવામાં આવી છે. દિલ્હી-એનસીઆરથી શરૂઆત કર્યા બાદ, કંપની ઉત્તર ભારતના અન્ય શહેરોમાં પોતાનું નેટવર્ક ફેલાવશે.

પ્રથમ ફેઝમાં કંપની પોતાની ફ્લીટ (કાફલા) માં 10,000 ઇલેક્ટ્રિક કાર જોડશે. કંપની અહીં જ નહીં અટકે, ભવિષ્યમાં આશરે 1 લાખ ઇલેક્ટ્રિક ટુ-વ્હીલર્સને પણ આ સર્વિસ સાથે જોડવાની યોજના છે. વિનગ્રુપ માત્ર ટેક્સી સેવા પૂરતી જ મર્યાદિત રહેવા નથી માંગતી. કંપની ભારતમાં ઇલેક્ટ્રિક સ્કૂટર અને ઇલેક્ટ્રિક બસના માર્કેટમાં પણ ઉતરવાની તૈયારી કરી રહી છે.

ઇવી ઇકોસિસ્ટમમાં ‘મોટો બદલાવ’

તમિલનાડુમાં પોતાના મેન્યુફેક્ચરિંગ પ્લાન્ટને વધારવાની સાથે જ કંપની તેલંગાણા અને મહારાષ્ટ્રમાં ઇવી (EV) ચાર્જિંગ નેટવર્ક, ટુરિઝમ અને રિયલ એસ્ટેટ જેવા ક્ષેત્રોમાં મોટા રોકાણનું પ્લાનિંગ કરી રહી છે. આનાથી ભારતના ઇવી ઇકોસિસ્ટમમાં એક મોટો બદલાવ આવવાની અપેક્ષા છે.

AC ચલાવવાથી કારનું માઈલેજ ઘટે છે ? જાણો લિટર પેટ્રોલ પર પડે છે અસર