ભરૂચનો આ વિડીયો જોઈ તમને ઝટકો લાગશે !!! બાળકને શાળાએ મોકલી રહ્યા છીએ કે મોતના મુખમાં ?

ભરૂચ(Bharuch)માં એક વાઇરલ વીડિયોએ વાલીઓની ઊંઘ હરામ કરી નાખી છે. બાળક શાળામાં મુશ્કેલીઓ વિના જઈ શકે તે માટે વાલીઓ દ્વારા સ્કૂલ વનમાં બાળકોને મોકલવામાં આવતા હોય છે. ઘરના આંગણામાંથી આરામદાયક બેઠક સાથે રવાના થતા બાળકને જોઈ વળી હરખાતા હોય છે પણ માર્ગમાં બાળકને કઈ  પરિસ્થિતિમાં બેસાડવામાં આવે છે તે જોવાની તસ્દી લેવામાંઆવતી નથી. ઘેટાં – બકરાની જેમ ભરીને લઈ જવાતા બાળકોનો જોખમી મુસાફરીનો વિડીયો વાઇરલ થયો છે. આ વીડિયોમાં 5 બાળકોના જીવ જોખમમાં મુકાયા હોવાનું સ્પષ્ટ નજરે પડી રહ્યું છે. બાળકો સ્કૂલવેનમાં લટકી રહ્યા છે.

વાઇરલ વિડીયો ભરૂચ – જંબુસરના અતિવ્યસ્ત માર્ગનો હોવાનું જાણવા મળી રહ્યું છે. સ્કૂલવાનમાં 5 બાળકોને વાનના પાછળના હિસ્સામાં બેસાડવામાં આવ્યા છે. જગ્યા એટલી ઓછી છે કે બાળકો લટકી રહ્યા છે. પકડ રાખવા માટે એક માત્ર સળીયો છે જેના ઉપર તે લટકી રહયા છે. અચાનક બ્રેક લાગે અથવા ખાડો આવે તો બાળક વાનમાંથી પટકાઈ શકે છે. આ જોખમી મુસાફરીની વાન ચાલકને કોઈ ચિંતા નથી. તેને માત્ર તેની કમાણીમાં રસ હોય તેમ લાગી રહ્યું છે.

ઉલ્લેખનીય છે કે ભરૂચમાં દરરોજ મોટી સંખ્યામાં બાળકો સ્કૂલ બસ અને સ્કૂલ વાન દ્વારા શાળાએ જતા હોય છે. આરટીઓ વિભાગ દ્વારા સ્કૂલ વાન અને સ્કૂલ બસ માટે ચોક્કસ અને કડક નિયમો પણ બનાવાયા છે પરંતુ  કડકાઈથી તપાસ થતી ન હોવાથી વાન સંચાલકો આ નિયમોના પાલનમાં અખાડા કરે છે.