Vadodara: મોબાઇલ શો રૂમ ધારકની 8.49 કરોડની GST ચોરી પકડાઈ, શોરૂમ માલિકની ધરપકડ
વડોદરા રિજનલ યુનિટના ઇન્ટેલિજન્સ ઓફિસર નિમિત કપૂરે આરોપી પુષ્પક હરીશની ધરપકડ કરીને સેસન્સ કોર્ટમાં ચિફ જ્યુડિશિઅલ મેજિસ્ટ્રેટ સમક્ષ રજૂ કર્યો હતો. જયાં કોર્ટે આરોપીની જામીન અરજી ઉપર સુનાવણી મુલતવી રાખીને જેલમાં મોકલ્યો હતો.
વડોદરામાં (Vadodara) એક મોબાઇલ શોરૂમના માલિકે GSTની મસમોટી રકમ ભરી નહોતી. આથી GST વિભાગ દ્વારા શોરૂમના માલિકના નિવાસ સ્થાન ઉપર તેમજ મોબાઇલની દુકાન ખાતે દરોડ પાડવામાં આવ્યા હતા. આ દરોડામાં જીએસટીના (GST) અધિકારીઓનો સમયે બિલ વગર મોબાઈલ વેચાણ કરવામાં આવતું હોવાના પુરાવા પણ પ્રાપ્ત થયા હતા. આ વ્યક્તિનું નામ પુષ્પક હરીશ હોવાનું જાણવા મળ્યું હતું અને તે સ્માર્ટ વોચ, મોબાઇલ, લેપટોપ વગેરેનું વેચાણ કરે છે અને હરણી રોડ, અલકાપુરી તેમજ વિંડસર ખાતે મોબાઇલ શો રૂમ ધરાવતો હતો.
અધિકારીઓએ અલકાપુરી સહિત ત્રણ સ્થળોએ આવેલા મોબાઇલ સ્ટોર ધરાવતા આ શખ્સના શો રૂમમાંથી રૂપિયા 8.49 કરોડની જીએસટી ચોરી પકડી હતી. ઉલ્લેખનીય છે કે, આરોપી ગ્રે માર્કેટમાંથી મોબાઇલ અને સ્માર્ટ વોચનો જથ્થો બિલ વગર ખરીદતો હતો અને બિલ વગર જ તેનું વેચાણ કરીને જીએસટીની ચોરી કરતો હતો. આ શખ્સને ડિરેક્ટોરેટ જનરલ ઓફ ગુડ્ઝ એન્ડ સર્વિસ ટેક્સ ઇન્ટેલિજન્સ- વડોદરા રિજનલ યુનિટના ઇન્ટેલિજન્સ ઓફિસર નિમિત કપૂરે આરોપી પુષ્પક હરીશની ધરપકડ કરીને સેસન્સ કોર્ટમાં ચિફ જ્યુડિશિઅલ મેજિસ્ટ્રેટ સમક્ષ રજૂ કર્યો હતો.જયાં કોર્ટે આરોપીની જામીન અરજી ઉપર સુનાવણી મુલતવી રાખીને જેલમાં મોકલ્યો હતો.
