રામાયણ અને મહાભારત બાદ હવે અમદાવાદમાં થશે રાજસૂય યજ્ઞ, મોદીના દીર્ઘાયુષ્ય માટે અપાશે આહુતિ- જુઓ Video

આજે વડાપ્રધાન નરેન્દ્ર મોદીનો જન્મદિવસ છે, ત્યારે સમગ્ર દેશમાં તેની ઉજવણીના ભાગ રૂપે વિવિધ આયોજનો કરાયા છે. આ તમામની વચ્ચે, અમદાવાદ એક ઐતિહાસિક યજ્ઞનું સાક્ષી બનવા જઈ રહ્યું છે, જે છેલ્લા 5 હજાર વર્ષથી ધરતી પર નથી થયો. આ આયોજન એટલે “રાજસૂય મહાયજ્ઞ”.

અમદાવાદમાં ઐતિહાસિક રાજસૂય મહાયજ્ઞ

અમદાવાદમાં 26 ઓક્ટોબરથી રાજસૂય મહાયજ્ઞનો પ્રારંભ થશે, જે પૂરા દોઢ મહિના સુધી ચાલશે. ખાસ વાત એ છે કે દેશમાં પ્રથમવાર કિન્નર સમાજ દ્વારા આ યજ્ઞનું આયોજન કરવામાં આવ્યું છે. આ યજ્ઞનો મુખ્ય હેતુ વડાપ્રધાન નરેન્દ્ર મોદીના દીર્ઘાયુષ્ય, વિશ્વશાંતિ અને દેશની સમૃદ્ધિ છે. “એક આહુતિ મોદી કે નામ” સૂત્ર સાથે પ્રજા કલ્યાણનો ઉદ્દેશ પણ આ યજ્ઞ સાથે જોડાયેલો છે. આ મહાયજ્ઞ નિકોલ સ્થિત ખોડલધામ ખાતે યોજાશે. વડાપ્રધાનના જન્મદિવસ નિમિત્તે સંકલ્પ પૂજા કરીને આ યજ્ઞનો સંકલ્પ લેવામાં આવ્યો છે.

યજ્ઞનો ઐતિહાસિક સંદર્ભ

ઋગ્વેદમાં પણ રાજસૂય મહાયજ્ઞનું વર્ણન જોવા મળે છે. રામાયણ કાળમાં ભગવાન શ્રીરામે અને મહાભારત કાળમાં ધર્મરાજ યુધિષ્ઠિરે આ યજ્ઞ કર્યો હતો, જે એક વર્ષ સુધી ચાલ્યો હતો. આ ઐતિહાસિક યજ્ઞ માટે લગભગ 12 એકર વિસ્તારમાં યજ્ઞશાળા ઊભી કરવામાં આવશે. જેમાં સ્ત્રીઓ, પુરુષો અને કિન્નર સમાજ દ્વારા આહુતિ આપવામાં આવશે. આ યજ્ઞ દ્વારા એક અનોખો ઇતિહાસ રચાઈ રહ્યો છે.