સિંહ ગરૂડની અનોખી જુગલબંધીનો વીડિયો થયો વાયરલ, બે ઘડી તો તમારી આંખો પર નહીં આવે વિશ્વાસ- જુઓ Video
વનરાજા સિંહ અને પક્ષીઓના રાજા ગરૂડની જુગલબંધીનો અનોખો વીડિયો સોશિયલ મીડિયામાં વાયરલ થયો છે. બે ઘડી તો આપણી આંખો પર વિશ્વાસ ન આવે તે પ્રકારે ગરૂડ વીડિયોમાં સિંહની સાથે મસ્તી કરતુ જોઈ શકાય છે. પહેલા તો આપ વીડિયો જુઓ..
આપણા લોકસાહિત્યમાં જંગલના રાજા સાવજ વિશે ઘણુ લખાયુ છે. પોતાની મદમસ્ત ચાલ, આગવી છટા માટે જાણીતા સાવજ માટે કહેવાય છે કે, “હાકલ દીએ હીરણ્યમાં એની રાવળ સુધી રાડય; સિંહણજાયો છેડતા વડી વમાસણ થાય… બાકર બચ્ચા લાખ, લાખે બિચારા; પણ સિંહણ બચ્ચું એક, એકે હજારા…
ડાલામથ્થા સિંહ અને ગરૂડની અનોખી દોસ્તીનો વીડિયો વાયરલ
આ ગીરના સિંહોની પ્રકૃતિ છે. જો કે આજકાલ સોશિયલ મીડિયામાં એક અકલ્પનિય વીડિયો વાયરલ થયો છે. જેમા જંગલના રાજા સિંહ અને પક્ષીઓના રાજા ગરૂડની જુગલબંધી જોઈ શકાય છે. આ વાયરલ વીડિયોમાં ગરૂડ (Eagle) સિંહની સવારી કરતા જોઈ શકાય છે. જંગલના રાજા સિંહ અને આકાશમાં ઊંચી ઉડાન ભરતા ગરૂડનો વીડિયો સામે આવ્યો છે. સિંહ અને ગરૂડની અનેરી મિત્રતાના દર્શન આ વીડિયોમાં થાય છે. જો કે આ વીડિયોની સત્યતા અંગે હજુ સુધી પુષ્ટિ કરાઈ નથી. આ વીડિયો ક્યાંનો છે તેની પણ કોઈ પુષ્ટિ કરાઈ નથી. કેટલાક વન્યકર્મીઓના જણાવ્યા મુજબ વીડિયો ગુજરાતનો તો લાગતો નથી.
ધારી ગીરના DCF રાજદીપસિંહ વીડિયોની ખરાઈ અંગે પુષ્ટિ કરતા નથી
ફોરેસ્ટ ઓફિસરના જણાવ્યા મુજબ વીડયોને AI ટૂલના માધ્યમથી મિક્સિંગ કરીને બનાવાયો હોવાની પણ શક્યતા દેખાઈ રહી છે. ધારી ગીરના DCF રાજદીપસિંહ ઝાલાના જમાવ્યા મુજબ વીડિયો ગુજરાતનો જણાતો નથી અને તેઓ વીડિયોની ખરાઈ અંગેની પણ પુષ્ટિ કરતા નથી. જો કે હાલ સિંહની સવારી કરતા ગરૂડનો વીડિયો સોશિયલ મીડિયામાં તો હિટ થઈ રહ્યો છે અને ધૂમ મચાવી રહ્યો છે.
વીડિયોમાં ગરૂડ ક્યારેક સિંહની કેશવાળી પર બેસે છે. ક્યારેક તેના મોંઢા પાસેથી આવી તેને ગેલ કરતુ જોઈ શકાય છે અને સિંહ પણ ગરૂડની તમામ મસ્તીની મજા લેતો જોઈ શકાય છે.
