Paralympics 2024: મિકેનિકની પુત્રીએ ભારતને પાંચમો મેડલ અપાવ્યો, રૂબિના ફ્રાન્સિસે શૂટિંગમાં જીત્યો બ્રોન્ઝ મેડલ

શૂટર રૂબિના ફ્રાન્સિસે પેરિસ પેરાલિમ્પિક્સ 2024ના ત્રીજા દિવસે ભારતને પહેલો મેડલ અપાવ્યો છે. રૂબિના ફ્રાન્સિસે મહિલાઓની 10 મીટર એર પિસ્તોલ SH1 I ની ફાઇનલમાં બ્રોન્ઝ મેડલ જીત્યો હતો. આ તેનો પહેલો પેરાલિમ્પિક મેડલ છે. ભારતે પેરિસ પેરાલિમ્પિક્સ 2024માં કુલ 5 મેડલ જીત્યા છે. જેમાંથી 4 મેડલ શૂટિંગમાં આવ્યા છે. રૂબિનાએ 211.1 માર્ક્સ સાથે આ મેડલ જીત્યો છે.

રૂબિના ફ્રાન્સિસે જીત્યો બ્રોન્ઝ મેડલ

ફાઈનલના સ્ટેજ 1 પછી રૂબિના ફ્રાન્સિસ ત્રીજા સ્થાને હતી. તેણે આ તબક્કામાં 10 શોટમાં કુલ 97.6 (10.7, 10.3, 10.3, 9.7, 9.0, 8.4, 10.0, 9.8, 9.6, 9.8) સ્કોર કર્યો. રૂબિના ફ્રાન્સિસે સ્ટેજ 2 માં તેની શાનદાર રમત ચાલુ રાખી. આ મેડલ રૂબિના ફ્રાન્સિસ માટે તેમજ ભારત માટે ખૂબ જ ઐતિહાસિક છે. હકીકતમાં, તે પિસ્તોલ શૂટિંગમાં પેરાલિમ્પિક મેડલ જીતનારી પ્રથમ ભારતીય મહિલા બની છે.

પિસ્તોલ શૂટિંગમાં મેડલ જીતનારી પ્રથમ ભારતીય મહિલા

મધ્યપ્રદેશના જબલપુરની પેરા પિસ્તોલ શૂટર રૂબિના ફ્રાન્સિસે તાજેતરના સમયમાં ભારત માટે મજબૂત પ્રદર્શન કર્યું છે. આ પહેલા તેણે ઘણી ઈવેન્ટ્સમાં ભારતને ગૌરવ અપાવ્યું છે, રૂબિના ફ્રાન્સિસે વર્લ્ડ શૂટિંગ પેરા સ્પોર્ટ્સ વર્લ્ડ કપ- 2023માં 10 મીટર એર પિસ્તોલ ઈવેન્ટમાં સિલ્વર મેડલ જીત્યો હતો. રૂબિના ફ્રાન્સિસે પેરાશુટિંગ વર્લ્ડ કપમાં P-6 એર પિસ્તોલ મિક્સ્ડ ટીમ ઈવેન્ટમાં પણ ગોલ્ડ મેડલ જીત્યો છે.

મિકેનિકની દીકરીનું મોટું પરાક્રમ

પેરિસ પેરાલિમ્પિક્સ 2024માં ભારતને પાંચમો મેડલ અપાવનાર રૂબિના ફ્રાન્સિસની માતા સુનીતા ફ્રાન્સિસ જબલપુરના પ્રસૂતિ ગૃહમાં નર્સ તરીકે કામ કરે છે, જ્યારે રૂબિના ફ્રાન્સિસના પિતા સિમોન ફ્રાન્સિસ મોટર મિકેનિક તરીકે જબલપુરમાં કામ કરે છે. મિકેનિકની દીકરીએ પેરાલિમ્પિક્સ મેડલ જીતીને તેનાઆ માતા-પિતાની સાથે જબલપુરનું પણ નામ રોશન કર્યું છે.

આ પણ વાંચો: Paralympics 2024માં ભારતનો ચોથો મેડલ, મનીષ નરવાલે શૂટિંગમાં સિલ્વર મેડલ જીત્યો

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો