Harmanpreet Kaur: ભારતીય કેપ્ટને બોલ અને બેટથી ધમાલ મચાવી, લાંબી સિક્સરનો વરસાદ, વિરોધી ટીમ સહિત આખી દુનિયા જોતી રહી
WBBL 2021 માં હરમનપ્રીત કૌર રન બનાવવામાં ત્રીજા નંબર પર છે. તેણે અત્યાર સુધી છ મેચમાં 73ની એવરેજથી 219 રન બનાવ્યા છે.
Harmanpreet Kaur : ઓસ્ટ્રેલિયામાં ભારતીય મહિલા ક્રિકેટરોએ હંગામો મચાવ્યો છે. વિમેન્સ બિગ બેશ લીગ (Women Big Bash League)માં દરરોજ કોઈને કોઈ ભારતીય ચહેરો પોતાની રમતથી દિલ અને મેચ જીતી રહ્યો છે. 31 ઓક્ટોબરના રોજ, ભારતીય ODI અને T20 ટીમની સુકાની હરમનપ્રીત કૌરે (Harmanpreet Kaur) અજાયબી કરી બતાવી. મેલબોર્ન રેનેગેડ્સ (Melbourne Renegades) ટીમ તરફથી રમતા, તેણે બોલ અને બેટ બંનેથી શાનદાર પ્રદર્શન કર્યું હતું.
હરમનપ્રીત કૌરે બોલિંગ દરમિયાન 31 રન આપીને બે વિકેટ લીધી હતી. ત્યારબાદ બેટિંગનો વારો આવ્યો અને તેણે 46 બોલમાં અણનમ 73 રન બનાવ્યા અને બે બોલ બાકી રહેતા ટીમને જીત અપાવી છે. એડિલેડ સ્ટ્રાઈકર્સની ટીમ તેની આ શાનદાર રમતનો શિકાર બની હતી. પ્રથમ બેટિંગ કરતા એડિલેડની ટીમે પાંચ વિકેટે 160 રન બનાવ્યા હતા. હરમનપ્રીતના કારણે મેલબોર્ન તેને 19.4 ઓવરમાં પાર કરી ગયો. મેલબોર્ન માટે ભારતીય કેપ્ટન સિવાય, જેમિમા રોડ્રિગ્સે પણ અજાયબીઓ કરી હતી અને 16 બોલમાં 27 રનની ધમાકેદાર ઇનિંગ રમી હતી.
મેચમાં એડિલેડની કેપ્ટન તાહલિયા મેકગ્રાએ ટોસ જીતીને બેટિંગ કરવાનો નિર્ણય લીધો હતો. તેના માટે ઓપનર ડેન વેન નિકેર્કે 47 બોલમાં 62 રન બનાવ્યા હતા. તેણે પોતાની ઇનિંગમાં છ ચોગ્ગા અને બે છગ્ગા ફટકાર્યા હતા. લૌરા વોલવર્ટે 35 બોલમાં ચાર ચોગ્ગા અને એક છગ્ગાની મદદથી 47 રન બનાવ્યા હતા.
આ સિવાય બાકીના બેટ્સમેનો મોટી ઇનિંગ્સ રમી શક્યા ન હતા. મેલબોર્ન તરફથી હરમનપ્રીત કૌર સૌથી સફળ બોલર રહી હતી. તેણે ચાર ઓવરમાં 31 રન આપીને બે વિકેટ ઝડપી હતી. સોફી મૌલિન્યુ, એલી ફોકનર અને કાર્લી લીસનને એક-એક વિકેટ મળી હતી. એડીલેડે પાંચ વિકેટે 160 રન બનાવ્યા અને મેલબોર્ન સામે જીત માટે 161 રનનો ટાર્ગેટ આપ્યો.
