એશિયા કપ જીત્યા બાદ ટીમ ઈન્ડિયા (Team India)ના તમામ ખેલાડીઓ ભારત પરત ફર્યા છે અને હવે આગળના મિશનની તૈયારી ચાલી રહી છે. ODI વર્લ્ડ કપ પહેલા, ભારતે ઓસ્ટ્રેલિયા સામે 3 મેચની ODI સિરીઝ રમવાની છે, જે 22 સપ્ટેમ્બરથી શરૂ થવાની છે. આ સિરીઝ માટે સોમવારે સાંજે ટીમ ઈન્ડિયાની જાહેરાત કરવામાં આવશે. કેપ્ટન રોહિત શર્મા અને મુખ્ય પસંદગીકાર અજીત અગરકર રાત્રે 8.30 વાગ્યે પ્રેસ કોન્ફરન્સમાં ટીમની જાહેરાત કરશે.

આ પણ વાંચો : VIDEO: રોહિત શર્માએ એરપોર્ટ પર ડાન્સ કર્યો, ટીમ ઈન્ડિયા ભારત પહોંચ્યા બાદ 5 ગાડીમાં નીકળી ટીમ ઈન્ડિયા

વર્લ્ડ કપ પહેલા યોજાનારી આ સિરીઝમાં કેટલાક મુખ્ય ખેલાડીઓને આરામ મળી શકે છે, જ્યારે કેટલાક નવા ખેલાડીઓને તક મળી શકે છે. આ સિરીઝ એટલા માટે પણ ખાસ બની જાય છે કારણ કે તે ઘરઆંગણે યોજાવાની છે અને ભારતે ઓસ્ટ્રેલિયા જેવી મજબૂત ટીમ સામે મેચ રમવાની છે. આ સિવાય 28 સપ્ટેમ્બર સુધી વર્લ્ડ કપની ટીમમાં ફેરફાર થઈ શકે છે, આવી સ્થિતિમાં જો ટીમ ઈન્ડિયા કોઈ પ્રયોગ કરવા ઈચ્છે છે તો આ છેલ્લી તક છે.

ભારત-ઓસ્ટ્રેલિયા સિરીઝનું ટાઈમટેબલ

22 સપ્ટેમ્બર: મોહાલી

24 સપ્ટેમ્બર: ઈન્દોર

27 સપ્ટેમ્બર: રાજકોટ

આ ખેલાડીઓને મળી શકે છે આરામ

સવાલ એ છે કે શું ટીમ ઈન્ડિયા આ સિરીઝમાં કેટલાક ખેલાડીઓને આરામ આપશે કે નહીં, કારણ કે આ પછી વર્લ્ડ કપ છે અને દોઢ મહિનામાં લગભગ એક ડઝન મેચ રમવાની છે. આવી સ્થિતિમાં જસપ્રીત બુમરાહ, હાર્દિક પંડ્યા કે અન્ય કેટલાક ખેલાડીઓને આરામ મળે તેવી આશા છે. કેટલાક રિપોર્ટ્સમાં એવું કહેવામાં આવ્યું છે કે વિરાટ કોહલી અને રોહિત શર્માને પણ આરામ આપવામાં આવશે, જો કે ઓસ્ટ્રેલિયા જેવી મહત્વપૂર્ણ ટીમ સામે મોટા ખેલાડીઓ માટે આરામ લેવો મુશ્કેલ હશે કારણ કે ઓસ્ટ્રેલિયાએ પણ પોતાની મજબૂત ટીમને અહીં મોકલી છે.

ભારત સામેની વનડે સિરીઝ માટે ઓસ્ટ્રેલિયન ટીમઃ પેટ કમિન્સ (કેપ્ટન), સ્ટીવ સ્મિથ, ડેવિડ વોર્નર, માર્નસ લાબુશેન, એલેક્સ કેરી, શોન એબ, નાથન એલિસ, કેમેરોન ગ્રીન, જોશ હેઝલવુડ, જોશ ઈંગ્લિસ, સ્પેન્સર જોનસન, મિશેલ માર્શ, ગ્લેન મેક્સવેલ, તનવીર સંઘા, મેથ્યુ શોર્ટ, મિશેલ સ્ટાર્ક, માર્કસ સ્ટોઈનિસ, એડમ ઝમ્પા.

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો