મેઘાલયની રણજી ટ્રોફી પ્લેટ ગ્રુપ ટીમને નાગાલેન્ડ સામેની મેચના એક દિવસ પહેલા જ મોટો ઝટકો લાગ્યો હતો. આંતરિક ઝઘડાને કારણે, ટીમને સસ્પેન્ડ કરવામાં આવી હતી અને તેના સ્થાને નવી ટીમને સામેલ કરવામાં આવી હતી. ખેલાડીઓએ પ્રેક્ટિસ કરી હતી અને મેચ રેફરી સાથેની મીટિંગમાં પણ ભાગ લીધો હતો. પરંતુ સાંજ સુધીમાં તેમને સમાચાર મળ્યા કે તેઓ હવે રાજ્ય એસોસિએશનની સત્તાવાર ટીમ નથી. બેટ્સમેન રાહુલ દલાલે કહ્યું, “અમે બધા પ્રેક્ટિસ માટે ગયા હતા અને મેચ રેફરીએ અમને કહ્યું, ‘ચિંતા કરશો નહીં. તમે રમશો કારણ કે BCCI એ તમને માન્ય રાખ્યા છે. સાંજે અમને મેચ રેફરીનો ફોન આવ્યો કે અમને હવે રમવાની મંજૂરી નથી.”

વિવાદનું મૂળ શું છે?

આ સમગ્ર વિવાદ મેઘાલય ક્રિકેટ એસોસિએશન (MCA) ના પ્રમુખ જેમ્સ સંગમા અને તેની એપેક્સ કાઉન્સિલ વચ્ચે ચાલી રહેલા આંતરિક ઝઘડામાંથી ઉદ્ભવ્યો છે, જે છેલ્લા કેટલાક મહિનાઓથી ચાલી રહ્યો છે. રાજ્ય હાઈકોર્ટે સંગમાની તરફેણમાં ચુકાદો આપતાં આ મામલો કાનૂની લડાઈમાં ફેરવાઈ ગયો. કોર્ટે એપેક્સ કાઉન્સિલ દ્વારા પસંદ કરાયેલી ટીમને અમાન્ય જાહેર કરી, જે પહેલાથી જ ત્રણ રાઉન્ડ રમી ચૂકી હતી. આ વિવાદ સેક્રેટરી રેનોલ્ડ ખારકામાનીના સસ્પેન્શન સાથે શરૂ થયો હતો, જેમના પર ખેલાડીઓ સાથે સંકળાયેલી જાતીય સતામણીની ફરિયાદોને દબાવવાનો આરોપ છે.

ઘણા ખેલાડીઓનું ભવિષ્ય અંધકારમાં મુકાયું

ખારકામણીના જૂથે અપીલ કરી, પરંતુ હાઇકોર્ટે સસ્પેન્શનને સમર્થન આપ્યું અને તેના હેઠળ પસાર થયેલા તમામ ઠરાવોને અમાન્ય જાહેર કર્યા. ત્યારબાદ સંગમાના જૂથે ઉતાવળમાં એક નવી ટીમ પસંદ કરી, જેમાં એપેક્સ કાઉન્સિલ દ્વારા પસંદ કરાયેલા તમામ ખેલાડીઓને બાકાત રાખવામાં આવ્યા. આનાથી ઘણા ખેલાડીઓનું ભવિષ્ય અંધકારમાં મુકાયું છે.

BCCI આ બાબત પર નજર રાખી રહ્યું છે

BCCI સમગ્ર ઘટનાક્રમથી વાકેફ છે. BCCI સેક્રેટરી દેબજીત સૈકિયાએ જણાવ્યું હતું કે, “મેઘાલય હાઈકોર્ટમાં પ્રમુખના જૂથ અને સચિવ (ખારકામણી) વચ્ચે કેસ ચાલી રહ્યો છે. તાજેતરમાં કોર્ટે પ્રમુખના જૂથની તરફેણમાં ચુકાદો આપ્યો અને તેમણે ટીમની પસંદગી કરી.” સંગમાએ આ બાબતે કોઈ ટિપ્પણી કરી ન હતી.

IND vs PAK ODI World Cup 2027: ભારત-પાકિસ્તાન મેચનો જબરદસ્ત ક્રેઝ, 84 લાખ લોકોને જોઈએ છે ટિકિટ