IND vs PAK : સજાથી બચવા પાકિસ્તાની ખેલાડીએ કોહલી-ધોનીનું નામ લીધું, ચોંકાવનારું સત્ય આવ્યું સામે

એશિયા કપ 2025ના સુપર 4 રાઉન્ડમાં ભારત સામે પાકિસ્તાનના બેટ્સમેન સાહિબજાદા ફરહાનના “ગનશોટ” ઉજવણીએ મોટો વિવાદ ઉભો કર્યો. હરિસ રૌફે પણ વિમાન નીચે પડી જવાનો ઈશારો કર્યો, જેના કારણે BCCIએ ફરહાન અને હરિસ રૌફ બંને સામે ICCમાં ફરિયાદ નોંધાવી. બંને ખેલાડીઓ આજે (26 સપ્ટેમ્બર) ICC સમક્ષ હાજર થયા. સજાથી બચવા માટે ફરહાને વિરાટ કોહલી અને એમએસ ધોનીનો સહારો લીધો.

ગનશોટ ઉજવણીથી મોટો વિવાદ

ભારત-પાકિસ્તાન મેચ દરમિયાન જ્યારે ફરહાને અડધી સદી ફટકાર્યા પછી મેદાન પર બંદૂક જેવો ઈશારો કર્યો ત્યારે વિવાદ શરૂ થયો. ત્યારબાદ ભારતે ICCમાં સત્તાવાર ફરિયાદ નોંધાવી. આ ઉજવણીને સંવેદનશીલ માનવામાં આવી હતી, ખાસ કરીને પહેલગામ હુમલા અને ભારતના ઓપરેશન સિંદૂરના સંદર્ભમાં. જોકે, સુનાવણીમાં ફરહાને સ્પષ્ટતા કરી કે તે એક વ્યક્તિગત ઉજવણી હતી, જે પઠાણ સંસ્કૃતિનો ભાગ હતી. તેમણે કહ્યું કે લગ્ન જેવા ખુશ પ્રસંગોમાં આવા ઈશારા સામાન્ય છે અને તેનો કોઈ રાજકીય હેતુ નથી.

ધોની અને કોહલીનું નામ લીધું

મીડિયા રિપોર્ટ્સ અનુસાર, સાહિબજાદા ફરહાને એમ પણ કહ્યું હતું કે ભૂતપૂર્વ ભારતીય કેપ્ટન એમએસ ધોની અને વિરાટ કોહલીએ પણ ઉજવણી દરમિયાન બંદૂક ચલાવવાનો ઈશારો કર્યો હતો. જો કે, આ ઘટના માટે સાહિબજાદા ફરહાનને ICC તરફથી દંડ થઈ શકે છે, જે તેની મેચ ફીના એક ટકા સુધી હોઈ શકે છે. જો કે, પ્રતિબંધની શક્યતા ઓછી માનવામાં આવે છે.

“6-0” અને ફાઈટર જેટને તોડી પાડવાનો ઈશારો

તેવી જ રીતે, હરિસ રૌફે એક મેચ દરમિયાન “6-0″નો ઈશારો કર્યો હતો અને ફાઈટર જેટને તોડી પાડવાની મજાક કરી હતી, જેને કેટલાક રાજકીય તણાવ સાથે જોડે છે. ICC સુનાવણીમાં રૌફે પોતાનો બચાવ કરતા કહ્યું કે “6-0″નો ભારત સાથે કોઈ સંબંધ નથી. તેણે પ્રશ્ન કર્યો કે તેને ભારત સાથે કેવી રીતે જોડી શકાય. ICC અધિકારીઓએ પણ સ્વીકાર્યું કે આ ઈશારાનો કોઈ ચોક્કસ અર્થ નથી. તેથી, હરિસ રૌફ સજાથી બચી શકે છે.

આ પણ વાંચો: Asia Cup 2025 : ફાઈનલ પહેલા પાકિસ્તાનને ફટકો, બે ખેલાડીઓ પર લાગશે પ્રતિબંધ?

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો