T20 વર્લ્ડ કપ 2024માં આ 5 ખેલાડીઓનું સ્થાન નિશ્ચિત ! જાણો કોણ છે લિસ્ટમાં
T20 વર્લ્ડ કપ 2024માં 5 મહિનાથી પણ ઓછો સમય બાકી છે અને તે પહેલા ટીમ ઈન્ડિયા 17 જાન્યુઆરીએ અંતિમ T20 આંતરરાષ્ટ્રીય મેચ રમશે. અફઘાનિસ્તાન સામેની 3 મેચની શ્રેણીમાં ભારતીય ટીમે પ્રથમ બે મેચ સરળતાથી જીતી લીધી હતી. બે મેચો બાદ 5 ખેલાડીઓ દેખાઈ રહ્યા છે જે ચોક્કસપણે વર્લ્ડ કપ ટુર્નામેન્ટ માટે ટીમ ઈન્ડિયાનો ભાગ બની શકે છે.
યશસ્વી જયસ્વાલ: યુવા ડાબોડી ઓપનર યશસ્વી જયસ્વાલે ગયા વર્ષે જ T20માં પ્રવેશ કર્યો હતો અને ત્યારથી તે સતત વિસ્ફોટક શરૂઆત આપી રહ્યો છે. યશસ્વી પાવરપ્લેમાં ગત વર્લ્ડ કપના ઓપનરોથી વિપરીત નિર્ભય રીતે રમતો જોવા મળ્યો છે. અફઘાનિસ્તાન સામેની બીજી T20માં જયસ્વાલે 34 બોલમાં 68 રન બનાવ્યા હતા. જયસ્વાલે 15 T20માં 163.81ના સ્ટ્રાઈક રેટથી 498 રન બનાવ્યા છે. તેણે વર્લ્ડ કપમાં આક્રમક ઓપનર તરીકે છવાઈ જશે.
રિંકુ સિંહ: ગયા વર્ષે આયર્લેન્ડ પ્રવાસ પર T20 ડેબ્યૂ કર્યું ત્યારથી તેણે બતાવ્યું છે કે તે IPLમાં રમી રહ્યો હતો તે જ રીતે તે આંતરરાષ્ટ્રીય ક્રિકેટમાં પણ રમવાનું ચાલુ રાખશે. રિંકુએ અત્યાર સુધી 10 ઈનિંગ્સમાં 71ની એવરેજ અને 176ની સ્ટ્રાઈક રેટથી 287 રન બનાવ્યા છે. આ 10માંથી તે 6 વખત નોટઆઉટ પરત ફર્યો છે જે દર્શાવે છે કે તેની પાસે મેચ પૂરી કરવાની ક્ષમતા છે. પ્લેઈંગ 11માં સ્થાન મેળવવું થોડું મુશ્કેલ હોઈ શકે છે પરંતુ કોઈ તેને ટીમમાંથી હટાવી શકશે નહીં.
રવિ બિશ્નોઈ: ટીમ ઈન્ડિયાએ છેલ્લા બે T20 વર્લ્ડ કપમાં લેયુઝવેન્દ્ર ચહલને તક આપી ન હતી. તે 2021માં ટીમમાં નહોતો અને 2022માં ટીમમાં હોવા છતાં પણ તે રમી શક્યો નહોતો. હવે તે ટીમનો ભાગ પણ નથી કારણ કે તેની જગ્યા યુવા લેગ સ્પિનર રવિ બિશ્નોઈએ લીધી છે. બિશ્નોઈએ છેલ્લા 3-4 મહિનામાં સારું પ્રદર્શન કર્યું છે. ઓસ્ટ્રેલિયા વિરૂદ્ધ T20 સિરીઝમાં 9 વિકેટ લઈને તે પ્લેયર ઓફ ધ સિરીઝ બન્યો હતો. રવિ બિશ્નોઈ વર્લ્ડ કપમાં બોલિંગમાં ટીમનો હુકમનો એક્કો સાબિત થશે.
જીતેશ શર્મા: રિષભ પંતના અકસ્માત બાદ કેએલ રાહુલ, સંજુ સેમસન અને ઈશાન કિશન વિકેટકીપર-બેટ્સમેનની રેસમાં હતા. હવે અચાનક છેલ્લા 2 મહિનામાં જીતેશ શર્મા આમાં આગળ નીકળી ગયો છે. નવેમ્બર 2023માં જ ડેબ્યૂ કરનાર જીતેશે ફિનિશર તરીકે પોતાની ઓળખ બનાવી. જીતેશે 9 મેચમાં 147ના સ્ટ્રાઈક રેટથી 100 રન બનાવ્યા. રોહિત-વિરાટની વાપસીથી ઈશાન માટે દરવાજા લગભગ બંધ થઈ ગયા છે, આવી સ્થિતિમાં જીતેશ ફિનિશર વિકેટકીપરની ભૂમિકામાં મહત્વપૂર્ણ સાબિત થશે.
શિવમ દુબે: લગભગ 3 વર્ષ સુધી ટીમ ઈન્ડિયાની બહાર રહ્યા બાદ 30 વર્ષીય ઓલરાઉન્ડરે ગયા વર્ષે પુનરાગમન કર્યું. હાર્દિક પંડ્યાની ઈજાને કારણે તેને અફઘાનિસ્તાન સામે તક આપવામાં આવી. દુબેએ તેનો સારી રીતે ઉપયોગ કર્યો અને સતત બે અડધી સદી ફટકારી. બંને વખત તે ટીમને જીત તરફ દોરીને અણનમ પરત ફર્યો. એટલું જ નહીં, તેણે બંને મેચમાં 1-1 વિકેટ પણ લીધી. જો હાર્દિક ફિટ છે, તો તે હજી પણ પ્રથમ પસંદગી હશે પરંતુ શિવમના રૂપમાં ટીમમાં ચોક્કસપણે હાર્દિકનો વિકલ્પ હશે.
Published On - 12:57 pm, Wed, 17 January 24