IND vs AUS : ટીમ ઈન્ડિયાને મોટો ફટકો, સ્ટાર ખેલાડી થયો ઈજાગ્રસ્ત, પર્થ ટેસ્ટમાંથી થશે બહાર!
ભારત અને ઓસ્ટ્રેલિયા વચ્ચે 5 મેચની ટેસ્ટ શ્રેણીની પ્રથમ મેચ પર્થના ઓપ્ટસ સ્ટેડિયમમાં રમાશે. આ મેચ પહેલા ટીમ ઈન્ડિયાનો એક સ્ટાર ખેલાડી ઈજાગ્રસ્ત થયો છે. આ ખેલાડીને ઈન્ડિયા A સામેની મેચ દરમિયાન આંગળીમાં ઈજા થઈ હતી. રોહિત શર્માની રમતને લઈને પહેલાથી જ સસ્પેન્સ છે અને હવે એક સ્ટાર ખેલાડી પણ ઈજાગ્રસ્ત થયો છે. માનવામાં આવી રહ્યું છે કે આ ખેલાડી પ્રથમ ટેસ્ટમાંથી પણ બહાર થઈ શકે છે.
ભારત અને ઓસ્ટ્રેલિયા વચ્ચે 22 નવેમ્બરથી 5 મેચની ટેસ્ટ સિરીઝ શરૂ થઈ રહી છે. ટીમ ઈન્ડિયાના ખેલાડીઓ આ સિરીઝ માટે સખત પ્રેક્ટિસ કરી રહ્યા છે. વર્લ્ડ ટેસ્ટ ચેમ્પિયનશિપની ફાઈનલને જોતા આ સિરીઝ પણ ઘણી મહત્વની બની રહી છે. શ્રેણીની પ્રથમ મેચ પર્થના ઓપ્ટસ સ્ટેડિયમમાં રમાશે. પરંતુ આ મેચ પહેલા ટીમ ઈન્ડિયાનું ટેન્શન વધી ગયું છે.
મીડિયા રિપોર્ટ્સ અનુસાર સ્ટાર ભારતીય બેટ્સમેન શુભમન ગિલ ઈજાગ્રસ્ત છે. પર્થમાં ઈન્ડિયા A સામેની મેચ દરમિયાન તેને આંગળીમાં ઈજા થઈ હતી. રિપોર્ટ અનુસાર, મેચ દરમિયાન સ્લિપ કેચ લેતી વખતે શુભમન ગિલની આંગળીમાં ઈજા થઈ છે, આ ઈજા પણ ગંભીર હોવાનું કહેવાય છે, જેના કારણે તેનું પર્થ ટેસ્ટમાં રમવું નિશ્ચિત નથી. મેડિકલ ટીમ તેના પર ચાંપતી નજર રાખી રહી છે અને તે પ્રથમ મેચનો ભાગ બનશે કે નહીં તે અંગે ટૂંક સમયમાં નિર્ણય લેવામાં આવશે.
ઓસ્ટ્રેલિયા તરફથી ભારતીય ખેલાડીઓની ઈજાના સતત અહેવાલો આવી રહ્યા છે, જે સારા સંકેત નથી. 14 નવેમ્બરે WACA ખાતે ભારતના પ્રેક્ટિસ સેશન દરમિયાન નેટ્સમાં બેટિંગ કરતી વખતે યુવા બેટ્સમેન સરફરાઝ ખાનને પણ કોણીમાં ઈજા થઈ હતી. તે થોડો અસહજ દેખાતો હતો, જોકે તેની ઈજા બહુ ગંભીર નહોતી.
કેએલ રાહુલ પણ પ્રેક્ટિસ દરમિયાન ઈજાગ્રસ્ત થયો હતો. 15 નવેમ્બરે સેન્ટર વિકેટ મેચ સિમ્યુલેશન દરમિયાન રાહુલને જમણી કોણીમાં ઈજા થઈ હતી. જે બાદ તેણે બેટિંગ પણ કરી ન હતી. વિરાટ કોહલી પણ ઈજાને લઈને ચિંતિત હતો, પરંતુ સ્કેન બાદ તે એકદમ ઠીક હોવાનું જાણવા મળ્યું હતું.
હજુ એ સ્પષ્ટ નથી થયું કે ભારતીય કેપ્ટન રોહિત શર્મા પ્રથમ ટેસ્ટનો ભાગ બનશે કે નહીં. જો રોહિત નહીં રમે તો કેએલ રાહુલને ઓપનિંગની જવાબદારી મળી શકે છે. જ્યારે, શુભમન ગિલ ત્રીજા નંબર પર રમે છે. આવી સ્થિતિમાં, આ બંને ખેલાડીઓ ટીમના સૌથી મહત્વપૂર્ણ સભ્યો છે. (All Photo Credit : PTI)