વિદ્યાર્થીઓ સાથે પીએમ મોદીની સંવાદાત્મક ચર્ચા, ‘પરીક્ષા પે ચર્ચા’ દરમિયાન PM મોદીએ જણાવ્યુ સ્ટાર્ટઅપ કેવી રીતે શરૂ કરવું

પ્રધાનમંત્રી નરેન્દ્ર મોદીએ 9 ફેબ્રુઆરી, 2026ના રોજ ‘પરીક્ષા પે ચર્ચા’ના બીજા સત્ર દરમિયાન દેશભરના વિદ્યાર્થીઓ સાથે સીધી વાતચીત કરી. આ સત્રમાં તેમણે પરીક્ષાના દબાણ, જીવનના પડકારો, સ્ટાર્ટઅપ શરૂ કરવાની વિચારધારા અને શિસ્તના મહત્વ પર વિશેષ ભાર મૂક્યો. વિદ્યાર્થીઓની સમસ્યાઓ સાંભળી પીએમ મોદીએ સરળ અને વ્યવહારુ ઉકેલો પણ સૂચવ્યા.

આ વખતે ચર્ચા રહી ખાસ અને અલગ

પીએમ મોદીએ સંવાદની શરૂઆતમાં કહ્યું કે આ વખતની ‘પરીક્ષા પે ચર્ચા’ અગાઉ કરતા કંઈક અલગ અને ખાસ છે. વિદ્યાર્થીઓના સૂચનોને ધ્યાનમાં રાખીને દેશના વિવિધ ભાગોમાં જઈને પરીક્ષાઓ અંગે ચર્ચા કરવામાં આવી છે. તેમણે જણાવ્યું કે તેઓ વર્ષોથી ધોરણ 10 થી 12ના વિદ્યાર્થીઓ સાથે વાતચીત કરે છે અને આ પ્રક્રિયામાં તેઓ પોતે પણ ઘણું શીખે છે.

સ્ટાર્ટઅપ માટે ઉંમર કોઈ બંધન નથી

વિદ્યાર્થીઓને સંબોધતાં પીએમ મોદીએ સ્પષ્ટ કર્યું કે સ્ટાર્ટઅપ શરૂ કરવા માટે 25 વર્ષની ઉંમર હોવી જરૂરી નથી. કોઈ પણ ઉંમરે, જ્યારે વિચાર અને ઉત્સાહ હોય ત્યારે સ્ટાર્ટઅપ શરૂ કરી શકાય છે. તેમણે વિદ્યાર્થીઓને ઉદ્યોગ ક્ષેત્રના વ્યાવસાયિકો સાથે વાતચીત કરવા અને તેમની કાર્યશૈલી સમજવા સલાહ આપી.

જીવનમાં શિસ્તનું મહત્વ

પીએમ મોદીએ જીવનમાં શિસ્તને અત્યંત જરૂરી ગણાવી. તેમણે કહ્યું કે શિસ્ત પ્રેરણાને દિશા આપે છે. જો શિસ્ત ન હોય, તો વધુ પ્રેરણા પણ બોજ બની શકે છે અને અંતે હતાશા તરફ દોરી જાય છે. શિસ્ત વ્યક્તિને લક્ષ્ય સુધી પહોંચવામાં મદદ કરે છે.

#WATCH | PM Narendra Modi interacts with students during Episode 2 of the 9th edition of ‘Pariksha pe Charcha’.

He says, “… Startup does not need the age of 25, it can be started anytime… Students should reach out to industry professionals and understand how they work…”… pic.twitter.com/t3ZLiWghL4

— ANI (@ANI) February 9, 2026

અભ્યાસ અને જુસ્સાને જોડવાની સલાહ

પીએમ મોદીએ વિદ્યાર્થીઓને અભ્યાસ અને પોતાના જુસ્સાને અલગ ન રાખવાની સલાહ આપી. તેમણે ઉદાહરણ આપ્યું કે જો કોઈને કલામાં રસ હોય અને તે વિજ્ઞાન ભણી રહ્યો હોય, તો વિજ્ઞાન સાથે જોડાયેલી ચિત્રકળા અપનાવી શકાય. આ રીતે અભ્યાસ વધુ રસપ્રદ અને અસરકારક બની શકે છે.

‘પરીક્ષા પે ચર્ચા’ના આ સત્રમાં પીએમ મોદીના માર્ગદર્શનથી વિદ્યાર્થીઓને માત્ર પરીક્ષાઓ નહીં પરંતુ જીવનને પણ વધુ આત્મવિશ્વાસ સાથે સમજવાની પ્રેરણા મળી.

દેશભરના સમાચાર વાંચવા માટે અહીં ક્લિક કરો