Breaking News : રાજસ્થાનથી પકડેલી ડ્રગ્સ ફેક્ટરીમાં ગુજરાત ATSની મોટી કાર્યવાહી, 7 આરોપીની ધરપકડ, જુઓ Video

ગુજરાત એન્ટી ટેરરિસ્ટ સ્ક્વોડ (ATS) એ રાજસ્થાનમાં એક મોટા ડ્રગ્સ રેકેટનો પર્દાફાશ કરીને નોંધપાત્ર સફળતા મેળવી છે. જોધપુર જિલ્લાના સોઈન્દ્રા ગામમાં ચાલતી એક મેફેડ્રોન (MD) ડ્રગ્સ બનાવવાની ફેક્ટરી પર દરોડો પાડીને ATSની ટીમે સાત આરોપીઓની ધરપકડ કરી છે. આ કાર્યવાહીમાં કરોડો રૂપિયાનું MD ડ્રગ્સ અને તેને બનાવવામાં વપરાતું લિક્વિડ મેફેડ્રોન જપ્ત કરવામાં આવ્યું છે.

ATS દ્વારા આપવામાં આવેલી માહિતી અનુસાર, આ ફેક્ટરીના મુખ્ય સૂત્રધાર ગોવિંદસિંહ ચૌહાણ અને મોનુ ઓઝા હતા. આરોપી ગોવિંદસિંહ ચૌહાણે પોતાની જમીનમાં આ ગેરકાયદેસર ફેક્ટરીની શરૂઆત કરી હતી. દરોડા દરમિયાન, ઘટનાસ્થળેથી પાંચ વ્યક્તિઓ મળી આવ્યા હતા, જેમાં ગોવિંદસિંહ ચૌહાણ, મોનુ ઓઝા, ડુંગરસિંહ, અલીહુદ્દીન, રાજવિજયસિંહ, અઝીઝખાન અને સવારામનો સમાવેશ થાય છે. આ તમામ સાત આરોપીઓની ધરપકડ કરવામાં આવી છે.

પૂછપરછ દરમિયાન, મુખ્ય આરોપી મોનુ ઓઝાએ કબૂલ્યું કે તે ગોવિંદસિંહ ચૌહાણના ખેતરમાં MD ડ્રગ્સ બનાવવા માટે આવેલો હતો. ફેક્ટરીમાંથી કુલ 17 કિલો તૈયાર MD ડ્રગ્સ અને 40 લિટર લિક્વિડ મેફેડ્રોન બનાવવાનું મટીરિયલ જપ્ત કરવામાં આવ્યું છે. આ જપ્તી ડ્રગ્સ રેકેટની ગંભીરતા દર્શાવે છે.

મોનુ ઓઝાનો ગુનાહિત ઇતિહાસ ઘણો લાંબો છે. તે મૂળ ગુજરાતનો રહેવાસી છે અને 2011માં સાયબર ટેરરિસ્ટ કેસમાં પણ પકડાઈ ચૂક્યો છે. આ ઉપરાંત, તે વાપીમાં પકડાયેલી એક ડ્રગ્સ બનાવવાની ફેક્ટરીના કેસમાં પણ વોન્ટેડ હતો. આ આરોપી સોશિયલ મીડિયા પ્લેટફોર્મ પરથી MD ડ્રગ્સ બનાવવાની પદ્ધતિ શીખ્યો હતો. સોશિયલ મીડિયા પરથી જ્ઞાન મેળવ્યા બાદ તેણે સૌ પ્રથમ 200 ગ્રામ MD ડ્રગ્સ બનાવ્યું હતું. આ પછી, લગભગ એક મહિના પહેલા તેણે આ મોટી ડ્રગ્સ ફેક્ટરી શરૂ કરી હતી.

ગુજરાત ATS દ્વારા મોનુ ઓઝાની તપાસ કરવામાં આવતા જોધપુરમાં આ ડ્રગ્સ ફેક્ટરીનો ખુલાસો થયો હતો. આંતરરાજ્ય ડ્રગ્સ રેકેટનો પર્દાફાશ કરવામાં ATSની આ કાર્યવાહી ખૂબ મહત્વની છે. આ સમગ્ર કેસની વધુ ઊંડાણપૂર્વક તપાસ હવે રાજસ્થાન પોલીસ દ્વારા કરવામાં આવશે, જેથી આ રેકેટના મૂળ સુધી પહોંચી શકાય અને તેમાં સંડોવાયેલા અન્ય આરોપીઓને પણ ઝડપી શકાય.