બંગાળમાં કંઝાવલા કાંડ જેવી ઘટના ! બાઈક સવાર યુવકને 1.5 કિમી ઢસેડતા ઘટના સ્થળે મોત
પોલીસના જણાવ્યા મુજબ અકસ્માતમાં બાઈક સવાર ડમ્પરની નીચે ફસાઈ ગયો હતો. ડમ્પરે ચાલકે યુવકને તેના બાઈક સાથે લગભગ 1.5 કિમી ઘસેડતા તેનું ઘટના સ્થળ પર મોત થયું હતું.
દિલ્હીમાં કંઝાવલા કાંડ બાદ બંગાળના સિલીગુડમાં તેના જેવી જ ઘટના સામે આવી છે. ઘટનામાં ડમ્પરે બાઈક ચાલકને દોઢ કિલોમિટર સુધી ઢસેડતા બાઈક ચાલકનું મોત નિપજ્યુ છે. દુર્ઘટનામાં મૃત્યુ પામનાર યુવકનું નામ અનંત દાસ બતાવવામાં આવી રહ્યું છે જે બંગાળના લોઅર બાગડોગરા વિસ્તારનો બીજીપી અધ્યક્ષ હોવાનું કહેવામાં આવી રહ્યું છે. આ ઘટના ગુરુવારની રાતે સિલીગુડી- ડિવિઝનના શિવ મંદિર પાસે બની હોવાનું જણાય રહ્યું છે. પોલીસના જણાવ્યા મુજબ અકસ્માતમાં બાઈક સવાર ડમ્પરની નીચે ફસાઈ ગયો હતો. જે બાદ ડમ્પરે ચાલકે યુવકને તેના બાઈક સાથે લગભગ 1.5 કિમી ઢસેડતા તેનું ઘટના સ્થળ પર મોત થયું હતુ. તેમજ બાઈક અને ડમ્પરમાં પણ આગ લાગી હતી.
ડમ્પરની ટક્કરે યુવકનું મોત
સ્થાનિક સૂત્રોના જણાવ્યા મુજબ ગોસાઈપુર નજીક ડમ્પરે બાઈકને ટક્કર મારી હતી. જેમાં બાઈક ચાલક તેના બાઈક સાથે ડમ્પરની નીચે ફસાઈ ગયો હતો. ત્યારે બાઈક ચાલક ફસાયો હોવા છત્તા ડમ્પર ચાલકે દોઢ કિમી સુધી તેને ઘસેડ્યો હતો. જે બાદ યુવક ગમેતેમ ડમ્પર નીચેથી નિકળી ગયો પણ ગંભીર ઈજાઓને કારણે તેનું ઘટના સ્થળ પર જ મોત થયું હતુ. તેમજ બાઈકમાં પણ ઘસેડાવાથી આગ લાગી હતી અને ડમ્પરને પણ આગના ઝપેટમાં લીધુ હતુ. જે બાદ ડમ્પર ચાલક નાસી છુટ્યો હતો. ત્યારે આસપાસના વિસ્તારના લોકો દ્વારા પોલીસને જાણ કરવામાં આવી હતી.
ઘટનામાં બાઈક અને ડમ્પર બન્ને બળીને ખાક
મૃતક અનંત દાસ બાગડોગરા હાટથી ગોંસાઈપુર પરત ફરી રહ્યો હતો. તે સમયે બાગડોગરાથી શિવ મંદિર તરફ જવાના રસ્તામાં આ દુર્ઘટના બની હતી. ડમ્પરે બાઈક ચાલકને ટક્કર મારી જે બાદ તેને 1.5 કિમી જેટલુ ઘસેડીને લઈ ગયો જેમાં યુવકનું મોત થયુ છે તેમજ બાઈક અને ડમ્પર ઘટનામાં બળીને ખાક થઈ ગયુ છે. ત્યારે ઘટના બાદ તરત જ આરોપી ડમ્પર ચાલક નાસી છુટ્યો હતો. ત્યારે આસપાસના વિસ્તારના લોકો ઘટના સ્થળ પર દોડી આવ્યા હતા.
દિલ્હીના કંઝાવલામાં કેસમાં તપાસના ચક્રો ગતિમાન
નવા વર્ષની પૂર્વ સંધ્યાએ દિલ્હીમાં આવા જ એક અકસ્માતમાં એક યુવતીનું મોત થયું હતું. આ ઘટનાથી આખો દેશ ચોંકી ગયો હતો. 20 વર્ષીય અંજલિ તે દિવસે સવારે સ્કૂટર ચલાવી રહી હતી. ત્યારે દિલ્હીના કંઝાવલામાં મારુતિ સુઝુકી બલેનોએ તેના સ્કૂટરને ટક્કર મારી હતી. વિદ્યાર્થિની સ્કૂટી પરથી પડી અને તેનું શરીર કારની નીચે ફસાઈ ગયું. પોલીસ સૂત્રોના જણાવ્યા અનુસાર, ફોર વ્હીલર યુવતીને લગભગ 12 કિલોમીટર સુધી રોડ કિનારે ખેંચી ગયું. જ્યારે કાર રોકાઈ ત્યારે શરીરમાં જીવ નહોતો. સમગ્ર મામલાની તપાસ ચાલી રહી છે.