ટિપ્સ અને ટ્રિક્સ: સાંકડા મોઢાવાળી ગંદી બોટલ સાફ કરવાનું બ્રશ નથી? આ ટ્રિક યુઝ કરો અને મિનિટો માં જ સાફ કરો

ઉનાળાની કાળઝાળ ગરમીમાં શરીરને હાઇડ્રેટ રાખવા અને બીમારીઓથી બચવા માટે પુષ્કળ પ્રમાણમાં પાણી પીવું ખૂબ જ જરૂરી છે. પાણી રાખવા માટે કોઈ પ્લાસ્ટિકની બોટલ વાપરે છે, કોઈ કાચની તો કોઈ તાંબાની બોટલનો ઉપયોગ કરે છે. પરંતુ સતત પાણી ભરી રાખવાના કારણે બોટલની અંદરના ભાગમાં ચીકણી પરત જામી જાય છે, ડાઘ પડી જાય છે અને એક વિચિત્ર ગંદી બદબૂ આવવા લાગે છે.

સૌથી મોટી મુશ્કેલી ત્યારે થાય છે જ્યારે બોટલનું મોઢું સાંકડું હોય અને ઘરમાં તેને સાફ કરવાનું સ્પેશિયલ બ્રશ ન હોય. આવી સ્થિતિમાં બોટલના તળિયા સુધી હાથ પહોંચતો નથી અને બોટલ ગંદી જ રહે છે. પરંતુ હવે ચિંતા કરવાની કોઈ જરૂર નથી. તમારા રસોડામાં જ એક એવો અદભુત દેશી જુગાડ છુપાયેલો છે, જેનાથી બ્રશ વગર પણ બોટલનો ખૂણે-ખૂણો સેકન્ડોમાં નવા જેવો ચમકી જશે.

આવો જાણીએ અલગ-અલગ પ્રકારની બોટલને અંદરથી સાફ કરવાની એ આસાન અને અસરદાર રીતો:

પ્લાસ્ટિકની બોટલ માટે ચોખાનો અદભુત પ્રયોગ

પ્લાસ્ટિકની બોટલની ગરદન સાંકડી હોવાથી તેને અંદરથી સાફ કરવી અઘરી છે. આ માટે બોટલમાં થોડું નવશેકું ગરમ પાણી ભરો. હવે તેમાં થોડો વ્હાઇટ વિનેગર (સરકો) ઉમેરો. ત્યારબાદ તેમાં એક ચમચી કાચા ચોખા નાખીને બોટલનું ઢાંકણું બંધ કરી દો. હવે બોટલને બે મિનિટ માટે જોરથી હલાવો (શૅક કરો). અંદર રહેલા ચોખાના દાણા બ્રશ જેવું કામ કરશે અને અંદર ચોંટેલો બધો જ મેલ ઉખાડી નાખશે. પછી તેને સાફ પાણીથી ધોઈ લો.

કાચની બોટલ સાફ કરવાની રીત

જો તમે કાચની બોટલ વાપરતા હોવ, તો તેમાં થોડું પાણી ભરો. હવે તેમાં એક ચમચી વાસણ સાફ કરવાનું લિક્વિડ સોપ ઉમેરો અને સાથે એક ચમચી કાચા ચોખા નાખો. બોટલનું ઢાંકણું બંધ કરીને થોડીવાર બરાબર હલાવો. કાચની બોટલ અંદરથી એકદમ ટ્રાન્સપરન્ટ અને ચમકદાર બની જશે.

તાંબાની બોટલનું કાળાશ દૂર કરવાનું રહસ્ય

તાંબાની બોટલ સમય જતાં બહારથી તો કાળી પડે જ છે, પણ અંદરથી પણ તે લીલી અને કાળી થવા લાગે છે. આવી બોટલને સાફ કરવા માટે બોટલમાં થોડું પાણી ભરીને તેમાં એક આખા લીંબુનો રસ નીચોવી દો. હવે તેમાં એક ચમચી મીઠું ઉમેરીને બોટલનું ઢાંકણું બંધ કરો. તેને સારી રીતે હલાવીને થોડીવાર રહેવા દો અને પછી સાફ પાણીથી ધોઈ નાખો. લીંબુ અને મીઠાનું મિશ્રણ તાંબાનો બધો જ કાળો કચરો પળવારમાં સાફ કરી દેશે.

આ દેશી રીતો અપનાવીને તમે મોંઘા બ્રશ ખરીદ્યા વગર પણ તમારી પાણીની બોટલને એકદમ સ્વચ્છ અને જંતુમુક્ત રાખી શકો છો.

જિમમાં કલાકો સુધી પરસેવો પાડ્યા પછી સ્નાયુઓ અકળાઈ જાય છે ? બજારના કેમિકલવાળા ડ્રિંક્સને બદલે આ નેચરલ રીતો આપશે કાયમી આરામ !