SURAT : જન્મદિવસ અને લગ્નતિથીને યાદગાર બનાવવા આ સુરતીઓએ હોસ્પિટલને એમ્બ્યુલન્સ અર્પણ કરી
આ એમ્બ્યુલન્સમાં હાઇડ્રોલિક સ્ટ્રેચર, કાર્ડિયાક અને બાયપેપ મશીનચલાવવા બેટરી બેકઅપવાળું ઇન્વર્ટર સિસ્ટમ, પબ્લિક એનાઉસમેન્ટ સિસ્ટમ અને અન્ય અદ્યતન સુવિધાઓ ઉપલબ્ધ છે
SURAT: જન્મદિવસ હોય કે લગ્નની એનિવર્સરી જેવા શુભ પ્રસંગે લોકો ક્યાં તો નાનકડું સેલિબ્રેશન રાખતા હોય છે અથવા તો ધાર્મિક કે સામાજિક સેવા કરીને આ દિવસને યાદગાર બનાવવાનો પ્રયત્ન કરતા હોય છે. ત્યારે સુરતમાં બે પરિવારોએ સંતાનોના જન્મદિવસ અને લગ્નની એનિવર્સરીને યાદગાર બનાવવા અનોખો જ પ્રયાસ કર્યો.
હાલ જ્યારે કોરોનાનો સમય ચાલી રહ્યો છે ત્યારે મોટા મંદિર યુવક મંડળની પ્રેરણાથી સમાજ માટે ખરા અર્થમાં ઉપયોગી થવાની ભાવના ધરાવતાં સુરતના દેસાઈ (Desai) અને દલાલ (Dalal) પરિવારે તેમના ત્રણ યુવા સંતાનોના જન્મદિન અને મેરેજ એનિવર્સરીને એક પ્રેરણાત્મક પગલું ભરીને યાદગાર બનાવી હતી.
આ બંને પરિવારે સંતાનો સાથે મળીને ચૌટાબજાર, કોટ વિસ્તારમાં આવેલી 175 વર્ષ જૂની શેઠ પી.ટી.સુરત જનરલ હોસ્પિટલ (Sheth P T General Hospital, Surat) ને અદ્યતન સુવિધાયુક્ત એમ્બ્યુલન્સની (Donated aન Ambulance) ભેટ આપી હતી.
સુરતના નેહલભાઈ દેસાઈની સુપુત્રી ધ્વનિનો જન્મદિવસ તેમજ સંજયભાઈ દલાલના સુપુત્ર ધર્માંગ અને પુત્રવધુ કૃતિની મેરેજ એનિવર્સરી હોવાથી બંને પરિવારોએ સેવાભાવના સાથે શુભપ્રસંગને યાદગાર બનાવવાનું આયોજન કર્યું.
સામાન્ય રીતે આ પ્રકારના શુભ પ્રસંગો કેક કાપી, પરિવાર અને મિત્રવર્તુળ સાથે પાર્ટી કરીને ઊજવવામાં આવતા હોય છે, પરંતુ દેસાઈ અને દલાલ પરિવારે જન્મદિન અને મેરેજ એનિવર્સરીને લોકઉપયોગી સમાજ સેવાના કાર્યો સાથે સાંકળી લીધા અને અત્યાધુનિક એમ્બ્યુલન્સ હોસ્પિટલને સેવા માટે અર્પણ કરી હતી.
આ એમ્બ્યુલન્સમાં હાઇડ્રોલિક સ્ટ્રેચર, કાર્ડિયાક અને બાયપેપ મશીનચલાવવા બેટરી બેકઅપવાળું ઇન્વર્ટર સિસ્ટમ, પબ્લિક એનાઉસમેન્ટ સિસ્ટમ અને અન્ય અદ્યતન સુવિધાઓ ઉપલબ્ધ છે. તેમના આ પ્રયાસથી જરૂરિયાતમંદ દર્દીઓ અને હોસ્પિટલ માટે આરોગ્યલક્ષી સુવિધાઓમાં વધારો થશે. ઉપરાંત હાલની કોરોનાની પરિસ્થિતિમાં પણ એમ્બ્યુલન્સ દર્દીઓ માટે આશીર્વાદરૂપ બનશે.