Surat: વિદ્યાર્થીઓ સ્પોર્ટ્સમાં પણ ઝળક્યા, નેશનલ ખો ખો સ્પર્ધા માટે થઈ પસંદગી
સુરતના વિદ્યાર્થીઓ હવે રમતગમત ક્ષેત્રમાં નામ ઉજળું કરી રહ્યા છે. સુરતના બે વિદ્યાર્થીઓ નેશનલ ખો ખો ટીમમાં રમવા માટે પસંદગી પામ્યા છે.
અત્યાર સુધી સુરત (Surat) ડાયમંડ અને ટેક્સ્ટાઈલ સીટી તરીકે જાણીતું હતું. પરંતુ હવે ધીમે ધીમે સુરત શહેરનું નામ શિક્ષણ ક્ષેત્રમાં પણ આગળ વધી રહ્યું છે. તે જ પ્રમાણે હવે સુરતના વિદ્યાર્થીઓ રમતગમત ક્ષેત્રમાં પણ સારી એવી નામના મેળવીને સુરતનું ગૌરવ વધારી રહ્યા છે.
સુરતની એમ.પી.લીલીયાવાળા વિદ્યાભવનના ગુજરાતી માધ્યમમાં અભ્યાસ કરતા બે વિદ્યાર્થીઓ અનિલ તડવી (Anil Tadvi) અને રામપ્રકાશ બિંદ (Ramprakash Bind). આ બંને વિદ્યાર્થીઓ ગુજરાત રાજ્યના ભાવનગર ખાતે યોજાયેલ અંડર 19 ખો ખો નેશનલ રમતની ટીમમાં પસંદગી પામ્યા હતા અને ગૌરવની વાત તો એ છે કે હવે આગામી દિવસોમાં તેઓ ઓરિસ્સા ખાતે યોજાનાર ખો ખોની ટીમમાં ગુજરાત તરફથી રમવાના છે.
લાંબા સમય બાદ સુરતમાંથી ગુજરાતનું પ્રતિનિધિત્વ સુરતના વિદ્યાર્થીઓ કરવા જઈ રહ્યા છે. ગુજરાતની ટીમમાં સુરતના બે વિદ્યાર્થીઓની પસંદગી થતા શાળા અને પરિવારમાં ખુશીનો માહોલ છવાઈ ગયો છે. કારણ કે શાળામાંથી પહેલીવાર વિદ્યાર્થીઓને ગુજરાતની આગેવાની કરવાનો મોકો મળ્યો છે.
બંને વિદ્યાર્થીઓ પણ ખુબ ખુશ છે તેમનું કહેવું છે કે તેમના માટે અને તેમના પરિવાર માટે આ ખુબ ગૌરવની વાત છે. કારણ કે ખો ખો એક એવી રમત છે જે ખુબ ચપળતા માંગી લે છે. અમે નાનપણથી આ રમત રમતા આવ્યા છે. શાળા કક્ષાએ અને રાજ્ય કક્ષાએ અમે ઘણી વાર રમ્યા છે પણ અમને ખબર નહોતી કે અમે નેશનલ પણ રમવા જઈશું અને ગુજરાતને રિપ્રેઝન્ટ કરીશું પણ કહેવાયું છે ને કે મહેનત અને ધીરજના ફળ મીઠા હોય છે. અમે હવે નેશનલમાં પણ ગુજરાતનું નામ રોશન થાય તે રીતે જ રમીશું.
અત્યાર સુધી સુરતનું નામ બોર્ડના પરિણામોમાં પણ અગ્રેસર આવી રહ્યું હતું. પરંતુ છેલ્લા કેટલાક સમયથી રમતગમત ક્ષેત્રમાં પણ સુરતના વિદ્યાર્થીઓ કાઠું કાઢી રહ્યા છે. આ પહેલા પણ સુરતના બે રમતવીર વેઈટલિફ્ટિંગ કોમ્પિટિશનમાં રાષ્ટ્રીય લેવલે સુરતનું પ્રતિનિધિત્વ કરી ચુક્યા છે અને હવે સુરતના આ બે ખેલાડીઓ નેશનલ ખો ખો સ્પર્ધામાં પસંદગી પામતા સુરતનું નામ રોશન થયું છે. નેશનલમાં રમવા જનાર વિદ્યાર્થીઓ અને તેમના પરિવારને વિશ્વાસ છે કે રાષ્ટ્રીય લેવલ પર રમાનારી આ ખો ખોની રમતમાં તેઓ સારું પ્રદર્શન કરશે અને સુરતને ગૌરવ અપાવશે.
આ પણ વાંચો: રાહતના સમાચાર : ગુજરાતમાં સપ્ટેમ્બરમાં માસમાં વરસાદ પડવાની હવામાન વિભાગની આગાહી