Breaking News : યુદ્ધના ભણકારા વચ્ચે દુબઈમાં ગુજરાતી પરિવાર, કહ્યું, સામાન્ય લોકો માટે સ્થિતિ સુરક્ષિત, જુઓ Video

સમગ્ર વિશ્વમાં યુદ્ધની શક્યતાઓ અને તણાવપૂર્ણ માહોલ વચ્ચે રાજકોટના એક પરિવારના સભ્યો દુબઈમાં ફસાયા હોવાના સમાચાર સામે આવ્યા છે. રાજકોટના રહેવાસી જયંત ભૂપતાણીનો દીકરો છેલ્લા દસ વર્ષથી દુબઈમાં નોકરી કરી રહ્યો છે. તેમની પુત્રવધૂ અને જયંત ભૂપતાણીના પત્ની પણ 15 દિવસ અગાઉ દુબઈ ફરવા ગયા હતા, જેથી આખો પરિવાર હાલ દુબઈમાં છે.

વર્તમાન યુદ્ધગ્રસ્ત પરિસ્થિતિને ધ્યાનમાં રાખીને, જયંત ભૂપતાણીના પુત્રએ તેમના પિતા સાથે વીડિયો કોલ પર વાતચીત કરીને દુબઈમાં પ્રવર્તમાન સ્થિતિનો વિસ્તૃત ચિતાર આપ્યો હતો. પુત્રએ જણાવ્યું કે સામાન્ય નાગરિકો માટે દુબઈમાં પરિસ્થિતિ સુરક્ષિત છે. તેણે ખાસ કરીને બર દુબઈ વિસ્તારમાં કોઈ પણ પ્રકારની તકલીફ ન હોવાનો ઉલ્લેખ કર્યો હતો, જ્યાં મોટી સંખ્યામાં ગુજરાતી પરિવારો વસવાટ કરે છે. ત્યાંના સ્થાનિક ગુજરાતી પરિવારો પણ પોતાને સુરક્ષિત અનુભવી રહ્યા છે.

જોકે, કેટલાક અહેવાલો મુજબ, અમેરિકા-બેઝના સેન્ટરો અને ઇમારતો પર હુમલા કરવામાં આવ્યા છે. પુત્રએ સ્પષ્ટ કર્યું કે આ હુમલાઓ ચોક્કસ લક્ષ્યો પર કેન્દ્રિત હતા અને સામાન્ય જનતાને તેનાથી કોઈ સીધો ખતરો નથી. દુબઈ સરકારે સામાન્ય લોકોને સાવચેતીના પગલારૂપે કેટલીક સૂચનાઓ આપી છે, જેમાં લોકોને ઘરની બહાર ન નીકળવા તેમજ ઘરના દરવાજા અને બારી પાસે ન ઊભા રહેવા માટે મેસેજ દ્વારા જાણ કરવામાં આવી છે. આ સૂચનાઓ છતાં, દુબઈમાં જાહેર બજારો અને વેપારી પ્રવૃત્તિઓ સામાન્ય રીતે ખુલ્લી હોવાનું પણ પુત્રએ જણાવ્યું હતું.

પિતા તરીકે, જયંત ભૂપતાણીએ પોતાના પરિવારની સુરક્ષા અંગે ચિંતા વ્યક્ત કરી છે. તેમણે જણાવ્યું કે જો વૈશ્વિક સ્તરે પરિસ્થિતિ વધુ બગડે તો ભારત સરકારે દુબઈમાં ફસાયેલા તેમના પરિવાર સહિત અન્ય ભારતીય પરિવારોને સ્વદેશ પરત લાવવા માટે સક્રિયપણે મદદ કરવી જોઈએ. તેમણે ભારત સરકારને આવા સંભવિત સંજોગોમાં તાત્કાલિક પગલાં ભરવા માટે વિનંતી કરી હતી. હાલની પરિસ્થિતિમાં દુબઈમાં સામાન્ય લોકો માટે કોઈ મોટી તકલીફ નથી, પરંતુ સંભવિત જોખમને ધ્યાનમાં રાખીને સાવચેતી રાખવી અનિવાર્ય છે.

શું ત્રીજું વિશ્વયુદ્ધ શરૂ થઈ ગયું ? US-Iran યુદ્ધમાં કુલ 10 દેશો જોડાઈ ગયા, જાણો