Mehsana : અમદાવાદના કારચાલક પાસેથી 20 લાખ લૂંટી અજાણ્યા શખ્સો ફરાર

અમદાવાદનો કારચાલક મહેસાણામાં લૂંટાયો. 20 લાખ રૂપિયા અને કાર લઈને અજાણ્યા શખ્સો રફુચક્કર થઈ ગયા છે. કારમાં કોઈ અજાણ્યા મુસાફરોને બેસાડતા પહેલા ચેતજો નહીં તો લૂંટાવાનો વારો આવશે. કારમાં મુસાફરોને બેસાડવાના ચક્કરમાં અમદાવાદના એક કારચાલક સાથે લેવાના દેવા થઈ ગયા.

અમદાવાદથી નીકળેલો કારચાલક ઊંઝા-વિસનગર રોડ પર લૂંટાયો છે. કારચાલકે અડાલજથી મુસાફરોને કારમાં બેસાડ્યા હતા. લાલચ ફક્ત નજીવા ભાડાની હતી. કારચાલકને હતું કે તેના પેટ્રોલ-પાણીના પૈસા મુસાફરોના ભાડામાંથી નીકળી જશે. પરંતુ આગળ ઊંઝા-વિસનગર રોડ પર કારમાં બેસાડેલા મુસાફરોએ કારચાલક પાસેથી 20 લાખની લૂંટ ચલાવી અને કાર સાથે ફરાર થઈ ગયા. ઘટનાને પગલે મહેસાણા જિલ્લા પોલીસ આરોપીઓની શોધખોળમાં લાગી છે.