30 જાન્યુઆરીના મહત્વના સમાચાર : NCP વિધાનસભા પક્ષની શનિવારે મળશે બેઠક, સુનેત્રા પવાર બનશે મહારાષ્ટ્રના નવા નાયબ મુખ્ય પ્રધાન

સાબરકાંઠાના તલોદના રણાસણ નજીક ફેક્ટરીમાં લાગી ભીષણ આગ

સાબરકાંઠાના તલોદના રણાસણ નજીક ફેક્ટરીમાં ભીષણ આગ લાગી. કાપડ બનાવતી ફેક્ટરીમાં આગથી અફરાતફરી મચી જવા પામી હતી. મોડાસા અને હિંમતનગર ફાયર બ્રિગેડની 4 ટીમો રવાના થઈ હતી. ખેડબ્રહ્મા, ઈડર અને પ્રાંતિજ ફાયરની ટીમની મદદ લેવાઇ છે. ભીષણ આગના દૂર દૂર સુધી જોવા મળ્યા આગના ગોટેગોટા. ફાયર વિભાગ દ્વારા જાહેર કરવામાં આવ્યો મેજર કોલ.

બોલીવુડના સુપર સ્ટાર સલમાન ખાન સુરતની મુલાકાતે, લાલભાઈ કોન્ટ્રાક્ટર સ્ટેડિયમ ખાતે ચાલી રહેલા ISPL મેચમાં આપશે હાજરી

બોલીવુડના સુપર સ્ટાર સલમાન ખાન સુરતની મુલાકાતે આવ્યા છે. સુરતના લાલભાઈ કોન્ટ્રાક્ટર સ્ટેડિયમ ખાતે ચાલી રહેલા ISPL મેચમાં આપશે હાજરી. સલમાન ખાનના ચાહકો સુરત એરપોર્ટ ઉપર મોટી સંખ્યામાં આવી પહોંચ્યા છે. સલમાન ખાનના એક ઝલક જોવા માટે પડા પડી થઈ હતી. જેમાં સુરતના રંગોલી આર્ટિસે સલમાનખાન અને તેમની માતાના થીમ ઉપર મોટું પેઇન્ટિંગ બનાવ્યું હતું. જે તેઓ સલમાન ખાને ભેટ આપવા માટે લઈ આવ્યા હતા. આ પેઇન્ટિંગ 3×4 ની છે અને ચાર મહિના બનાવતા થયા છે.

ઉત્તર ગુજરાતમાં અનુભવાયા ભૂકંપના આંચકા

અંબાજી અને આસપાસના વિસ્તારોમાં આજે સાંજે સામાન્ય ભૂકંપના હળવા ઝટકા અનુભવાયા હતા. અંબાજી નજીકના હડાદ ગામમાં પણ લોકોને હળવો આંચકો લાગ્યો. સાંજે 7.22 કલાકે આંચકો અનુભવાયો. આંચકો હળવો હોવાથી કોઈ ભયજનક સ્થિતિ સર્જાઈ નથી. ઘણા લોકોએ ઘરમાં બેઠા બેઠા કંપન અનુભવ્યું હોવાનું જાણવા મળ્યું છે. હડાદમાં હળવા આંચકા બાદ કેટલાક લોકો ઘરથી બહાર નીકળી આવ્યા. પ્રાથમિક માહિતી મુજબ ક્યાંય જાનમાલનું નુકસાન નોંધાયું નથી. હજી આ ભૂકંપના હળવા આંચકાની પુષ્ટી કરવામાં આવી નથી. બનાસકાંઠાના ડિઝાસ્ટર મેનેજમેન્ટ એ ખુલાસો કર્યો. ભૂકંપનો એપી સેન્ટર રાજસ્થાનનું માઉન્ટ આબુ હોવાનું જણાવ્યું. જે સાંજના 7.21 કલાકે નોંધાયો આંચકો. આ ભૂકંપના આંચકાની તિવ્રતા,,3.0 ની નોંધાઈ. જેના આફ્ટર શોકનુ કંપન અનાજી અને હડાદ વિસ્તારમાં અનુભવ કરાયો.

જામનગર મહાનગરપાલિકાનું રૂપિયા 1860 કરોડનું ડ્રાફ્ટ બજેટ, મ્યુ. કમિશનરે કરવેરામાં વધારા સુચવ્યા

જામનગર મહાનગરપાલિકાનું 1860 કરોડનું ડ્રાફ્ટ બજેટ સ્ટેન્ડિંગ કમિટી સમક્ષ રજૂ કરતા કમિશનર. વર્ષ 2026/27નું સામાન્ય અંદાજપત્ર સ્ટેન્ડિંગ ચેરમેનને સુપ્રત કરાયું. પાણી વ્યવસ્થાપન, ભૂગર્ભ ગટર, રોડ રસ્તા અને આવાસ સહિત માળખાગત વ્યવસ્થાઓ ઊભી કરવા મોટાભાગની મૂડી ખર્ચવાનો અંદાજ. નવ કરોડથી વધુ આવક ઊભી કરવા જુદા જુદા કરદરમાં વધારો સૂચવાયો. યાંત્રિક વાહનોમાં આજીવન વાહનકરમાં 0.25થી અડધા ટકાનો વધારો સુચવ્યો છે. રહેણાંકમાં વોટર ચાર્જીસમાં 100 રૂપિયા અને સ્લમ વિસ્તારમાં 50 રૂપિયાનો વધારો સુચવાયો છે.  ભાડામાં 10 ટકાનો વધારો કરાયો છે.  ગેરકાયદે બાંધકામ અને દબાણકર્તાઓને દંડમાં 10%નો વધારો. સોલિડ વેસ્ટ કલેકશન ચાર્જમાં રૂ. 5નો વધારો સુચવ્યો છે. ફાયર ચાર્જીસ અને સ્ટ્રીટ લાઈટ યુજેસ ચાર્જમાં 100 ટકાનો વધારો દર્શાવ્યો છે. ભૂગર્ભ ગટર હાઉસ કનેક્શન ચાર્જમાં 300નો વધારો સુચવ્યો છે. સામાન્ય અંદાજપત્રમાં કુલ રૂ. 9 કરોડના કરદર વધારા સૂચવવામાં આવ્યા છે.

ઊંઝામાં ફૂડ વિભાગે દરોડા, જીરું અને વરિયાળીમાં વ્હાઈટ પાવડરની શંકાસ્પદ ભેળસેળ

મહેસાણાના ઊંઝામાં ફૂડ વિભાગે દરોડા પાડ્યા છે.  જીરું-વરિયાળીમાં શંકાસ્પદ ભેળસેળ ઝડપાઈ છે. ઊંઝાની ફેક્ટરીઓમાં ફૂડ વિભાગે કરી ઓચિંતી તપાસ હાથ ધરાઈ છે. જીરું અને વરિયાળીમાં વ્હાઈટ પાવડરની શંકાસ્પદ ભેળસેળનો પર્દાફાશ. શ્રી શ્યામ ટ્રેડર્સ અને કુંદનલાલની ફેક્ટરીમાં દરોડાની કાર્યવાહી કરાઈ છે. 3 દિવસની રેકી બાદ ફૂડ વિભાગે આખું કૌભાંડ ઝડપી પાડ્યું હોવાનું કહેવાય છે. 21.86 લાખનો જીરું, વરિયાળી અને પાવડરનો જથ્થો સીઝ કરાયો છે. જિલ્લા ફૂડ ઓફિસર અને ટીમે કરી કાયદેસરની કાર્યવાહી. ફૂડ એન્ડ ડ્રગ્સ વિભાગે સેમ્પલ લઈ આગળની કાર્યવાહી હાથ ધરી છે.

પ્રજાસત્તાક દિવસની પરેડ : પોપ્યુલર ચોઈસ” શ્રેણીમાં ગુજરાતનો ટેબ્લો પ્રથમ નંબરે

77મા પ્રજાસત્તાક પર્વ નિમિત્તે નવી દિલ્હીના કર્તવ્ય પથ ખાતે યોજાયેલી પરેડમાં, ગુજરાતના ટેબ્લોને સતત ચોથી વખત ‘પોપ્યુલર ચોઈસ કેટેગરી’માં પ્રથમ ક્રમ પ્રાપ્ત થયો છે. આ અંગે આજ રોજ દિલ્હી ખાતે વિધિવત્ રીતે ટ્રોફી અને પુરસ્કાર એનાયત કરવામાં આવ્યો છે. નવી દિલ્હીના રાષ્ટ્રીય રંગશાળા શિબિર ખાતે યોજાયેલા પારિતોષિક વિતરણ સમારોહમાં કેન્દ્રિય રાજ્ય રક્ષામંત્રી સંજય સેઠના હસ્તે આપવામાં આવેલી આ ટ્રોફી અને પ્રમાણપત્રનો ગુજરાત રાજ્ય વતી મુખ્યમંત્રીના અગ્ર સચિવ ડૉ. વિક્રાંત પાંડે અને માહિતી કમિશનર કિશોર બચાણીએ સ્વીકાર કર્યો હતો.

ધમકી આપનારા પકડાતા નથી ! ફરીથી પાલનપુરની કલેકટરની કચેરીને ઉડાવી દેવાનો મળ્યો મેઈલ

બનાસકાંઠાના જિલ્લા કલેકટરની કચેરીને છેલ્લા 20 દિવસમાં બીજીવાર બોંબથી ઉડાવી દેવાની ધમકી મળી છે.  પાલનપુર કલેકટર કચેરીને બોમ્બથી ઉડાવી દેવાની ધમકી આ વખતે રશિયન ભાષામાં લખેલો ઇ-મેઇલ મળ્યો હતો.  ઈ મેઈલના પગલે, કલેકટર કચેરીમાં દહેશ અને અફરાતફરીનો માહોલ સર્જાયો હતો. કલેક્ટર કચેરી ખાલી કરાવીને, બનાસકાંઠા પોલીસે તપાસ હાથ ધરી છે. 20 દિવસ અગાઉ પણ પાલનપુર કલેક્ટરને મળી હતી બ્લાસ્ટની ધમકી

ચાંદીના ભાવમાં એકાએક બોલાયો 60,000નો કડાકો

29 જાન્યુઆરીએ રેકોર્ડ ભાવે પહોંચ્યા પછી, ચાંદીની ખૂબ ચમકતી ચમક ઝાંખી પડી છે. ચાંદીના ભાવ એક જ ઝટકામાં 60,000 ઘટી ગયા છે. MCX પર ચાંદીનો ભાવ હવે ₹3,39,910 પર પહોંચી ગયો છે.

સુરત જિલ્લા કલેકટરને હાઈકોર્ટનો આદેશ, નિયમ 3A(9) અંતર્ગત 3 અઠવાડિયામાં સુમુલ ડેરીની ચૂંટણી યોજો

ગુજરાતના સહકારી ક્ષેત્રને લગતા મોટા કાનુની સમાચાર સામે આવ્યા છે. દક્ષિણ ગુજરાતની મોટી ગણાતી સુમુલ ડેરીને લગતો એક નિર્ણય ગુજરાત હાઈકોર્ટે આપ્યો છે. સુરત જિલ્લા કલેકટરને ગુજરાત હાઈકોર્ટે આદેશ આપ્યો છે કે, નિયમ 3A(9) અંતર્ગત 3 અઠવાડિયામાં જરૂરી કાર્યવાહી કરવા કોર્ટનો આદેશ. યુનિયન મેનેજિંગ કમિટીની ચૂંટણી અંગેની વ્યવસ્થા કરવા હાઇકોર્ટે આપ્યો આદેશ. ઓગસ્ટ 2025 માં પૂર્ણ થઈ હતી મેનેજિંગ કમિટીની મુદત. 11 હજાર કરોડનું ટર્ન ઓવર ધરાવતી સુમુલ ડેરીમાં કેટલાક વિવાદોને કારણે ન થઈ હતી ચૂંટણી.

ગુજરાતના 2666 ગામોને મળશે પોતાના ગ્રામ પંચાયત ઘર, 10 હજારથી વધુ વસ્તીની ગ્રામ પંચાયતોને ગ્રામોત્થાન યોજના હેઠળ આવરી લેવાશે

મુખ્યમંત્રી ભૂપેન્દ્ર પટેલે રાજ્યની 2666 ગ્રામ પંચાયતો માટે પોતીકા ગ્રામ પંચાયત ઘર કમ તલાટી આવાસના એક સાથે એક જ સ્થળેથી ઈ-ખાતમૂહર્ત કરતા સ્પષ્ટપણે જણાવ્યું કે, વડાપ્રધાન નરેન્દ્ર મોદીએ આત્મનિર્ભર ભારત માટે ગામોના ઈન્ફ્રાસ્ટ્રક્ચર ડેવલપમેન્ટ પર જે ફોકસ કર્યુ છે તેમાં ગુજરાત અગ્રેસર રહેવા પ્રતિબદ્ધ છે.

શાળાઓમાં છોકરીઓ માટે અલગ શૌચાલય પૂરા પાડવા જોઈએ – સુપ્રીમ કોર્ટ

બધા રાજ્યોને શહેરી અને ગ્રામીણ બંને વિસ્તારોમાં લિંગના આધારે શાળાઓમાં છોકરીઓ માટે અલગ શૌચાલય પૂરા પાડવાનો આદેશ આપવામાં આવ્યો છે.

ગાંધીનગરના કુખ્યાત આરોપીઓ વિરુદ્ધ ગુજસીટોકનો ગુનો નોંધાયો

ગાંધીનગરના કુખ્યાત આરોપીઓ વિરુદ્ધ ગુજસીટોકનો ગુનો નોંધાયો. 6 લોકોની ટોળકી વિરુદ્ધ સેક્ટર -7 પોલીસ સ્ટેશનમાં ગુનો દાખલ થયો. આરોપીઓ વિરૂદ્ધ ખંડણી, મારામારી, વ્યાજખોરી સહિતના અનેક ગુનાઓ નોંધાયા. ગાંધીનગરમાં છેલ્લા ઘણા સમયથી આતંક મચાવ્યો હતો.

પોરબંદર: મનપા કમિશનર વિરુદ્ધ જિલ્લા ભાજપનો લેટર બોમ્બ

પોરબંદરમાં મનપા કમિશનર હસમુખ પ્રજાપતિ વિરુદ્ધ જિલ્લા ભાજપ દ્વારા લેટર બોમ્બ ફેંકવામાં આવ્યો છે. પત્રમાં આક્ષેપ કરવામાં આવ્યો છે કે કમિશનર સત્તાધારી પક્ષની બદલે વિપક્ષના કામોને વધુ પ્રાધાન્ય આપી રહ્યા છે. પોરબંદર મનપા બન્યા બાદથી હસમુખ પ્રજાપતિ કમિશનર તરીકે નિયુક્ત છે, પરંતુ ભાજપ અને કમિશનર વચ્ચે યોગ્ય સંકલનનો અભાવ હોવાની વાત પણ પત્રમાં ઉલ્લેખવામાં આવી છે. જિલ્લા ભાજપે આ મુદ્દે મુખ્યમંત્રી સહિત સંબંધિત વિભાગોને લેખિત પત્ર પાઠવી જાણ કરી છે અને કમિશનર સામે શિક્ષાત્મક તેમજ સુધારાત્મક કાર્યવાહી કરવાની માંગ કરી છે.

જામનગરઃ સાંઢીયા પુલ નજીક કાર ગાડીમાં અચાનક આગ લાગી

જામનગરઃ સાંઢીયા પુલ નજીક કાર ગાડીમાં અચાનક આગ લાગી છે. ચાલક સહિત પેસેન્જરોએ સમયસર બહાર આવી જીવ બચાવ્યો. અચાનક આગ લાગતા કાર બળીને ખાક થઇ ગઇ.

અમદાવાદઃ ગુજરાત યુનિવર્સિટીમાં કર્મચારીઓની અનિયમિતતાને લઈને વિરોધ

અમદાવાદમાં આવેલી ગુજરાત યુનિવર્સિટીમાં કર્મચારીઓની અનિયમિતતાને લઈને વિરોધનો માહોલ સર્જાયો છે. યુનિવર્સિટી ટાવરમાં કર્મચારીઓ સમયસર હાજર ન રહેતા હોવાનો આક્ષેપ સાથે NSUI કાર્યકરોએ સુત્રોચાર કરી ઉગ્ર વિરોધ નોંધાવ્યો હતો. કાર્યકરોનો દાવો છે કે કર્મચારીઓની અનિયમિતતાના કારણે વિદ્યાર્થીઓના કામ સમયસર થતા નથી અને વિદ્યાર્થીઓને ભારે હાલાકી ભોગવવી પડે છે. આ વિરોધ દરમિયાન પરીક્ષા વિભાગને તાળાબંધી કરીને રોષ વ્યક્ત કરવામાં આવ્યો હતો. કુલપતિ અને રજિસ્ટ્રાર કચેરીને તાળાબંધી કરવા પહોંચે તે પહેલાં જ પોલીસે NSUI કાર્યકરોની અટકાયત કરી સ્થિતિને કાબૂમાં લીધી હતી.

અમદાવાદ: નિકોલની આર.પી. વસાણી સ્કૂલને FRCએ ફટકાર્યો દંડ

અમદાવાદ: નિકોલની આર.પી. વસાણી સ્કૂલને FRCએ દંડ ફટકાર્યો. FRCમાં મંજુર કરાવ્યા વગર ફી ઉઘરાવતા શાળાને 5 લાખનો દંડ ફટકારાયો. શાળાએ વર્ષ 2024-25ની ફી FRC સમક્ષ મંજૂર કરાવી નહોતી. મંજૂરી વગર ફી ઉઘરાવતા FRCના નિયમો મુજબ કાર્યવાહી કરી. શાળાને મોકલાયેલી નોટિસમાં શાળાએ ભૂલ સ્વીકારી. નિયમ મુજબ FRCમાં મંજૂર કરાવ્યા વગર શાળા ફી ન ઉઘરાવી શકે તે વાત સ્વીકારી.

અમદાવાદ: કુવૈતથી દિલ્લી જતી ફ્લાઈટનું ઈમરજન્સી લેન્ડિંગ

અમદાવાદ: કુવૈતથી દિલ્લી જતી ફ્લાઈટનું ઈમરજન્સી લેન્ડિંગ કરાયુ. ફ્લાઈટમાં બોમ્બ હોવાનું લખાણ મળતા ઈમરજન્સી લેન્ડિંગ કરવામાં આવ્યુ. વૉશરૂમમાંથી બોમ્બ હોવાના લખાણવાળી ચિઠ્ઠી મળી. ઈન્ડિગોની 6E 1232 ફ્લાઈટના ઈમરજન્સી લેન્ડિંગ બાદ તપાસ હાથ ધરાઇ. ફ્લાઈટમાં સવાર 180 જેટલા મુસાફરોની પણ પૂછપરછ હાથ ધરાઇ. સવારે 6:40 વાગ્યે અમદાવાદ એરપોર્ટ પર ઈમરજન્સી લેન્ડિંગ કરાયુ.

પીટી ઉષાના પતિ વી. શ્રીનિવાસનનું 67 વર્ષની વયે અવસાન થયું

ભારતીય ઓલિમ્પિક એસોસિએશનના પ્રમુખ અને રાજ્યસભા સાંસદ પીટી ઉષાના પતિ વી. શ્રીનિવાસનનું શુક્રવારે સવારે (30 જાન્યુઆરી, 2026) અવસાન થયું. તેઓ 67 વર્ષના હતા. અહેવાલો અનુસાર, શ્રીનિવાસન આજે સવારે તેમના નિવાસસ્થાને પડી ગયા. તેમને તાત્કાલિક નજીકની હોસ્પિટલમાં લઈ જવામાં આવ્યા, પરંતુ તેમને બચાવી શકાયા નહીં.

રશિયા: મોસ્કોમાં રેકોર્ડબ્રેક હિમવર્ષાથી હાલાકી

રશિયા: મોસ્કોમાં રેકોર્ડબ્રેક હિમવર્ષાથી હાલાકી થઇ રહી છે. પાછલા 203 વર્ષમાં જાન્યુઆરીમાં સૌથી ભારે હિમવર્ષા પડી. સરેરાશ બરફવર્ષાથી ત્રણગણો વધુ બરફ ખાબક્યો. છેલ્લા ત્રણ દિવસથી સતત હિમવર્ષા યથાવત છે. રસ્તાઓ પર બરફના થર જામતા વાહન વ્યવહાર ઠપ થયો. ચાર મીટર ઊંચા બરફના થર જોવા મળ્યા.

સુરત: લક્ષ્મી ગ્રુપ પર સતત ત્રીજા દિવસે ITના દરોડા યથાવત

8.6 ડિગ્રી તાપમાન સાથે નલિયા સૌથી ઠંડુગાર

ગુજરાતભરમાં ઠંડીનો ચમકારો યથાવત રહ્યો છે અને રાજ્યના અનેક વિસ્તારોમાં તાપમાનમાં ઘટાડો નોંધાયો છે. કચ્છનું નલિયા 8.6 ડિગ્રી તાપમાન સાથે રાજ્યમાં સૌથી ઠંડુગાર રહ્યું છે. ઉત્તર ગુજરાતના ડીસામાં 11.8 ડિગ્રી જ્યારે ભુજમાં 12.6 ડિગ્રી તાપમાન નોંધાયું છે. સૌરાષ્ટ્રમાં રાજકોટમાં લઘુત્તમ તાપમાન 15 ડિગ્રી અને દીવમાં 15.8 ડિગ્રી રહ્યું છે. મધ્ય ગુજરાતમાં અમદાવાદમાં 15.9 ડિગ્રી અને વડોદરામાં 16.8 ડિગ્રી તાપમાન નોંધાતા લોકોમાં ઠંડીની અસર જોવા મળી રહી છે. ઠંડીના કારણે સવાર અને રાત્રિના સમયે લોકો ગરમ કપડાંનો સહારો લેતા થયા છે.

રાજકોટ: અમદાવાદ જતાં હાઈવે પર કાર ચાલક બેફામ

રાજકોટ: અમદાવાદ જતાં હાઈવે પર કાર ચાલક બેફામ બન્યો છે. માલિયાસણ નજીક અકસ્માત સર્જાતા વૃદ્ધનું મોત થયુ. અજાણ્યો કાર ચાલક અકસ્માત સર્જીને ફરાર થયો. 65 વર્ષીય વૃદ્ધનું ઘટનાસ્થળે મોત કરૂણ મોત થયું. વૃદ્ધ ખેતરેથી પોતાના ઘરે જઇ રહ્યા હતા તે સમયે ઘટના બની. પોલીસે અજાણ્યા કારચાલકની શોધખોળ શરૂ કરી.

દાહોદ: ખંગોલા ચેકપોસ્ટ પર દારૂની હેરાફેરીનો પર્દાફાશ

ગીર સોમનાથ: તાલાલામાં 2 સગીર કૌટુંબિક બહેનો પર દુષ્કર્મનો કેસ, 2 આરોપી ઝડપાયા

ગીર સોમનાથ: તાલાલામાં 2 સગીર કૌટુંબિક બહેનો પર દુષ્કર્મના કેસમાં પોલીસે 2 આરોપીઓને ઝડપી પાડ્યા. ઝડપાયેલા આરોપીઓમાં એક સગીર જ્યારે બીજો પુખ્ત વયનો છે. આરોપીઓએ બંને બહેનોને લોભ-લાલચ આપી વિશ્વાસમાં લીધા હતા. પ્રેમજાળમાં ફસાવી બંને સગીરાઓ પર દુષ્કર્મ આચરાયું હતું. બને નરાધમોએ તસવીરો વાયરલ કરવાની ધમકી આપી હતી. પીડિતાની માતાએ તાલાલા પોલીસ સ્ટેશનમાં ફરિયાદ નોંધાવી હતી.

સુરેન્દ્રનગરઃ ધ્રાંગધ્રામોરબી હાઇવે પરથી દારૂ સાથે 2 ઝડપાયા

સુરેન્દ્રનગરઃ ધ્રાંગધ્રામોરબી હાઇવે પરથી દારૂ સાથે 2 ઝડપાયા. કારમાં ચોરખાનું બનાવી દારૂની હેરાફેરીનો પર્દાફાશ થયો છે. અલગ અલગ બ્રાન્ડની દારૂની 7200 બોટલ જપ્ત કરાઇ. ધ્રાંગધ્રાથી મોરબી તરફ લઇ જવાતો હતો રૂ. 2.95લાખનો દારૂ પકડાયો.

મહેસાણામાં શિક્ષણ વિભાગે 4 શાળાઓને ફટકાર્યો દંડ

મહેસાણા જિલ્લા શિક્ષણાધિકારીએ ખાનગી શાળાઓ સામે લાલ આંખ કરી છે. ખાનગી શાળાઓમાં વિદ્યાર્થીઓની સુરક્ષા, લાયકાત ધરાવતા શિક્ષકો અને સરકાર માન્ય ફીનાં ધોરણો અંગે તપાસ કરાઇ. ગંભીર બેદરકારી દાખવનાર ચાર શાળાઓને શિક્ષણ વિભાગે દંડ ફટકાર્યો છે. ઉત્કર્ષ વિદ્યાલય અને કડીની વિદ્યામંદિર હાઈસ્કૂલને ફી મામલે દંડ કરાયો. ખણુસાની સેન્ટ જોસેફ હાઈસ્કૂલ, જ્યાં એક વર્ષ અગાઉ વીજ કરંટથી વિદ્યાર્થીનું મોત થયું હતું, ત્યાં હજુ પણ સલામતીના નિયમોનું પાલન ન થતું હોવાનું સામે આવતા દંડ કરાયો હતો.

ડાંગ: દીપડાનાં હુમલામાં વધુ એક માસુમ બાળકીનું મોત

ડાંગ: દીપડાનાં હુમલામાં વધુ એક માસુમ બાળકીનું મોત થયુ છે. 5 વર્ષીય બાળકીનું સારવાર દરમિયાન મોત થયુ. સુબીરના દહેર ગામે 2 દિવસ અગાઉ બાળકીનાં ઘર પાસે જ દીપડાએ હુમલો કર્યો હતો. બૂમાબૂમ કરીને દીપડાની પકડમાંથી બાળકીને છોડાવાઇ હતી. ગંભીર રીતે ઇજાગ્રસ્ત બાળકીની વલસાડમાં સારવાર ચાલી રહી હતી.

વિરાટ કોહલીનું એકાઉન્ટ ઇન્સ્ટાગ્રામ પરથી ગાયબ

પૂર્વ ભારતીય કેપ્ટન અને સ્ટાર ક્રિકેટર વિરાટ કોહલીનું ઇન્સ્ટાગ્રામ એકાઉન્ટ ગુરુવાર-શુક્રવારે મોડી રાત્રે અચાનક ગાયબ થઈ ગયું.