04 ઓક્ટોબરના મહત્વના સમાચાર : શંકરસિંહના અનામત અંગેના નિવેદન પર બબાલ યથાવત, ઊંઝા ધામના નવા પ્રમુખ એમ.એસ. પટેલે કહ્યું પાટીદારોએ તો પશુઓનું પણ મેલુ ઉપાડ્યું

જુનાગઢઃ માંગરોળ બંદર પર અકસ્માતમાં યુવકનું મોત

ભાવનગરમાં પ્રથમવાર ડોમમાં ગરબાનું આયોજન થશે

ભાવનગરઃ દૂધના ખોટા ફેટ રિપોર્ટ બનાવી ₹53 લાખની છેતરપિંડી

ભાવનગરમાં દૂધના ખોટા ફેટ રિપોર્ટ બનાવી રૂ.53 લાખની છેતરપિંડીનો મામલો સામે આવ્યો છે. ભોજપરા ગામે આવેલી દૂધની કંપનીમાં અસલી રિપોર્ટની જગ્યાએ ખોટા રિપોર્ટ બતાવી કંપનીને રૂ.53 લાખનો ચૂનો લગાવ્યાનો આક્ષેપ છે. આ કૌભાંડમાં કંપનીના કર્મચારીઓ અને અન્ય શખ્સો ભેગા મળ્યા હોવાની ફરિયાદ નોંધાઈ છે. સમગ્ર મામલે પોલીસે કાર્યવાહી કરી છ આરોપીઓને ઝડપી પાડ્યા છે. ભરતનગર, વેળાવદર ભાલ અને તળાજા પોલીસ સ્ટેશનમાં આ અંગે ફરિયાદ નોંધાવવામાં આવી છે. આરોપીઓએ દૂધના ફેટના ખોટા રિપોર્ટ તૈયાર કરી કંપની સાથે છેતરપિંડી કરી હોવાનો આક્ષેપ છે. પોલીસે ઝડપાયેલા આરોપીઓના રિમાન્ડ મેળવવાની તજવીજ હાથ ધરી છે અને સમગ્ર કૌભાંડમાં અન્ય કોઈની સંડોવણી છે કે નહીં તે અંગે તપાસ શરૂ કરી છે.

ભાવનગરમાં વરસાદી પાણી જમીનમાં ઉતારવાની કામગીરી માત્ર કાગળ પર

ભાવનગરમાં કરોડોના ખર્ચે વરસાદી પાણી જમીનમાં ઉતારવા માટે મહાનગરપાલિકા દ્વારા રિચાર્જ સ્ટ્રકચર બનાવવામાં આવ્યા છે. પરંતુ આ રિચાર્જ સ્ટ્રકચરએ શોભાના ગાંઠિયા જેવા સાબિત થયા છે કારણ કે આ સ્ટ્રકચર સુધી પહોંચી શકે તેવી કોઈ વ્યવસ્થા જ નથી. અધુરામાં પુરુ કુંભારવાડા હેલ્થ સેન્ટરની પાસે સ્ટ્રકચરના નામે લાખો રૂપિયાનુ કામ વગર ચૂકવણુ કરી દેવામાં આવ્યુ હોવાના કોંગ્રેસે આક્ષેપ કર્યા છે અને એજન્સી અને પદાધિકારીઓની મિલીભગત હોવાનો આરોપ લગાવ્યો છે.

સાળંગપુર રેલવે અંડર બ્રિજમાં વગર વરસાદે ભરાયા પાણી

બોટાદના સાળંગપુર રેલવે અંડરબ્રિજમાં વગર વરસાદે પાણી ભરાતા વાહનચાલકો પરેશાન થયા છે. સાળંગપુરથી બોટાદ અને અમદાવાદ તરફ જવા માટે આ મુખ્ય માર્ગ હોવાથી અહીંથી મોટી સંખ્યામાં વાહનો પસાર થાય છે. અંડરબ્રિજમાં પાણી ભરાતા વાહનચાલકોને હાલાકીનો સામનો કરવો પડી રહ્યો છે. ખાસ વાત એ છે કે આ માર્ગ પર કલેક્ટર કચેરી, એસપી કચેરી, જિલ્લા પંચાયત અને ડિસ્ટ્રિક્ટ કોર્ટ સહિતની મહત્વની સરકારી કચેરીઓ આવેલી છે. ત્યારે વગર વરસાદે અંડરબ્રિજમાં પાણી ભરાતા પાણીના નિકાલની કામગીરી સામે સવાલો ઉઠી રહ્યા છે. સ્થાનિકોએ તાત્કાલિક પાણીનો નિકાલ કરી વાહનવ્યવહાર સરળ બનાવવાની માગ કરી છે. ઘટનાને લઈને સ્થાનિકોમાં પણ રોષ જોવા મળી રહ્યો છે.

ઊંઝા ઉમિયા માતાજી સંસ્થાનને નવા હોદ્દેદારો

મોડાસામાં ઘોડાની ચોરી કરતા આરોપી ઝડપાયા

મોડાસામાં ખેતરમાંથી બે ઘોડાની ચોરી કરનાર પિતા-પુત્રને પોલીસે ઝડપી પાડ્યા છે. મોડાસા ટાઉન પોલીસે CCTV ફૂટેજના આધારે શંકાસ્પદ પીકઅપ ગાડીની કડી મેળવી આરોપીઓ સુધી પહોંચી હતી. પોલીસે અહમતપુરામાં આરોપીઓના ઘર પાસેથી ચોરી થયેલા બંને ઘોડા પણ કબજે કર્યા છે. પોલીસે પિતા-પુત્રની ધરપકડ કરી વધુ તપાસ હાથ ધરી છે. મળતી માહિતી મુજબ, ચોરી થયેલા સફેદ ઘોડાની કિંમત અંદાજે રૂ.2.40 લાખ છે, જ્યારે લાલ-સફેદ પટ્ટાવાળા ઘોડાની કિંમત રૂ.1.70 લાખ હોવાનું સામે આવ્યું છે. બંને ઘોડા ખેતરમાંથી ચોરી કરવામાં આવ્યા હતા. સમગ્ર મામલે પોલીસે CCTV સહિતના પુરાવાના આધારે તપાસ આગળ ધપાવી છે.

સુરતઃ સસ્પેન્ડેડ મહિલા કોન્સ્ટેબલ નયના બારૈયાની ધરપકડ

સાવલી નજીક દિલ્લી-બોમ્બે હાઈવે પર અકસ્માત

વડોદરાના સાવલી તાલુકાના મંજુસર પોલીસ મથકની હદમાં પાલડી ગામની સીમમાંથી પસાર થતા દિલ્હી-મુંબઈ એક્સપ્રેસ હાઈવે પર બે કાર વચ્ચે ગમખ્વાર અકસ્માત સર્જાયો છે. બે કાર સામસામે અથડાતા બે લોકોના કરુણ મોત થયા છે, જ્યારે બે લોકોને ઈજા પહોંચી છે. પ્રાથમિક માહિતી મુજબ, સાવરકુંડલા જતો પરિવાર રસ્તો ભૂલી દિલ્હી-મુંબઈ એક્સપ્રેસ હાઈવે પર ચઢી ગયો હતો. ગોધરા પહોંચ્યા બાદ રસ્તો ભૂલ્યાની જાણ થતાં પરિવાર રોંગ સાઈડ પર કાર ચલાવી અમદાવાદ તરફ પરત ફરી રહ્યો હતો. દરમિયાન સામેથી આવતી ઇનોવા કાર સાથે જોરદાર ટક્કર થઈ હતી. અકસ્માતમાં ઘોઘા ગામ, સાવરકુંડલાના મગનભાઈ વાવીયા અને ભાનુબેન વાવીયા દંપતીનું ઘટનાસ્થળે મોત થયું હતું. મંજુસર પોલીસે સ્થળ પર પહોંચી જરૂરી કાર્યવાહી હાથ ધરી છે.

શંકરસિંહ વાઘેલાના સમર્થનમાં આવ્યા લીલાબેન વસાવા

જંગલ જમીનના પ્રશ્નને લઈને આગેવાન લીલાબેન વસાવાએ શંકરસિંહ વાઘેલાના સમર્થનમાં નિવેદન આપ્યું છે. લીલાબેન વસાવાએ જણાવ્યું કે, બાપુએ જે નિવેદન કર્યું છે તે ગાંધીનગરમાં બેઠેલા પટેલ, વાણીયા અને બ્રાહ્મણ સમાજના અધિકારીઓને લઈને કર્યું હતું. તેમણે કહ્યું કે, બાપુએ કોઈની દુશ્મનાવટ કે રાજનીતિ માટે નહીં, પરંતુ ગરીબો માટે અવાજ ઉઠાવ્યો છે. આ નિવેદન કોઈ જાતિવાદ માટે નહોતું. બ્રાહ્મણ સમાજના નેતાઓને અપીલ કરતાં લીલાબેન વસાવાએ કહ્યું કે, બાપુ આદિવાસી સમાજ અને અમારા સમર્થનમાં આવ્યા હતા. તેમણે સ્પષ્ટતા કરી કે, બાપુનું નિવેદન ગાંધીનગરના આગેવાનો અને અધિકારીઓને લાગુ પડે છે, અન્ય કોઈ વ્યક્તિ કે સમાજને નહીં.

પાલનપુરમાં સ્વનિર્ભર શાળાના સંચાલકોની મહત્વપૂર્ણ બેઠક યોજાઈ

પાલનપુરમાં સ્વનિર્ભર શાળાના સંચાલકોની મહત્વપૂર્ણ બેઠક યોજાઈ હતી. શાળાઓ સામે ઊભી થઈ રહેલી વહીવટી મુશ્કેલીઓ, RTEની ચુકવણી, ફી નિર્ધારણ સહિતના વિવિધ મુદ્દાઓને લઈને સંચાલકોએ ચર્ચા કરી હતી. સંચાલકોનું કહેવું છે કે સરકાર દ્વારા ખાનગી શાળાઓ માટે દિવસેને દિવસે નિયમો કડક બનાવવામાં આવી રહ્યા છે, જેના કારણે શાળાઓ ચલાવવી મુશ્કેલ બની રહી છે. ત્યારે આ તમામ પ્રશ્નોના ઉકેલ માટે સરકાર સમક્ષ કઈ રીતે રજૂઆત કરવી અને જરૂર પડે તો કઈ રીતે લડત આપવી, તેને લઈને બેઠકમાં રણનીતિ નક્કી કરવામાં આવી હતી.

સંચાલકોનું કહેવું છે કે વધતી જતી વહીવટી પ્રક્રિયાઓ અને નિયંત્રણોના કારણે શાળાઓનું સંચાલન મુશ્કેલ બની રહ્યું છે. ખાસ કરીને ખર્ચમાં વધારો અને નિયમોની જટિલતાના કારણે સ્વનિર્ભર શાળાઓ પર વધારાનું આર્થિક અને વહીવટી ભારણ આવી રહ્યું હોવાની રજૂઆત કરવામાં આવી હતી. આ તમામ મુદ્દાઓને લઈને સંચાલક મંડળે આગામી દિવસોમાં સરકાર અને સંબંધિત વિભાગ સમક્ષ રજૂઆત કરવાની દિશામાં ચર્ચા કરી હતી. સાથે જ પ્રશ્નોનું નિરાકરણ નહીં આવે તો સંગઠિત રીતે કઈ પ્રકારની લડત ચલાવવી, તેની રણનીતિ અંગે પણ બેઠકમાં ચર્ચા કરવામાં આવી

જિજ્ઞેશ મેવાણીએ ટિકિટ અપાવવાના નામે રૂ. 4 લાખ પડાવવામો આરોપ

વડગામના ધારાસભ્ય જીગ્નેશ મેવાણી સામે ભ્રષ્ટાચારના આરોપોને લઈને રાજકીય માહોલ ગરમાયો છે. ટોકરિયા ગામના પૂર્વ સરપંચ યાકુબ શેરસીયાએ ચૂંટણીમાં ટિકિટ અપાવવાના નામે ચાર લાખ રૂપિયા લેવાનો જીગ્નેશ મેવાણી પર આરોપ લગાવ્યો છે. કોંગ્રેસે આરોપોને ફગાવી દાવો કર્યો છે કે આરોપ કરનાર પૂર્વ સરપંચ પોતે ACBના ગુનામાં સપડાઈ ચૂક્યા છે. આ મામલે કોંગ્રેસના કાર્યકરોએ વડગામ પોલીસ મથકે રેલી યોજી ભાજપના બનાસકાંઠા પ્રભારી ધવલ દવે વિરુદ્ધ ફરિયાદ નોંધવાની માગ કરી છે. બીજી તરફ, અરુણા પરમારે પણ જીગ્નેશ મેવાણી સામે રાજકીય કિન્નાખોરી અને માનસિક ત્રાસ આપ્યાનો આરોપ લગાવ્યો છે. બંને મામલે પોલીસ ફરિયાદની માગથી મેવાણીની મુશ્કેલી વધી શકે છે.

ગાંધીનગરઃ ભાજપ પ્રદેશ પ્રભારી તરુણ ચૂગના કોંગ્રેસ પર પ્રહાર

મોરબીઃ પોલીસ મથકથી 15 મિનિટનાં અંતરે લુખ્ખાઓનો આતંક

મોરબીમાં પોલીસ મથકથી માત્ર 15 મિનિટના અંતરે લુખ્ખાઓના આતંકની ઘટના સામે આવી છે. મોડી રાત્રે લુખ્ખાઓએ દુકાનદાર પર 15 મિનિટ સુધી લાકડાના ધોકા વડે હુમલો કર્યો હતો. સમગ્ર ઘટના દુકાનમાં લાગેલા CCTV કેમેરામાં કેદ થઈ છે. હુમલામાં દુકાનદારને માથામાં ગંભીર ઈજા થતાં ટાંકા આવ્યા છે, જ્યારે પાંસળીમાં ફ્રેક્ચર થયું હોવાનું સામે આવ્યું છે. હુમલાની ઘટનાથી આસપાસના દુકાનદારોમાં ભયનો માહોલ ફેલાયો હતો અને કેટલાક દુકાનદારોએ ભયના કારણે પોતાની દુકાનો બંધ કરી દીધી હતી. સમગ્ર મામલે શૈલેષ ગોરિયા સહિત અન્ય ત્રણ અજાણ્યા શખ્સો સામે ફરિયાદ નોંધાવવામાં આવી છે. પોલીસે વધુ તપાસ હાથ ધરી છે.

ભાજપ નેતા સામે ફરિયાદ નોંધાવવા મેવાણી અને અમિત ચાવડા પોલીસ સ્ટેશન પહોંચ્યા

ગાંધીનગરમાં ધારાસભ્ય જીગ્નેશ મેવાણી અને કોંગ્રેસના નેતા અમિત ચાવડા સેક્ટર-21 પોલીસ સ્ટેશન પહોંચ્યા છે. બનાસકાંઠા ભાજપ પ્રભારી ધવલ દવે દ્વારા મેવાણીના માતા અને બહેન અંગે કરવામાં આવેલી કથિત ટિપ્પણીને લઈને ફરિયાદ નોંધાવવા બંને નેતાઓ પહોંચ્યા હતા. ધવલ દવે સામે પોલીસ ફરિયાદ નોંધવાની માગ સાથે મેવાણી પોલીસ સ્ટેશન પહોંચ્યા હતા. તેમની સાથે અમિત ચાવડા, જગદીશ ઠાકોર, લાલજી દેસાઈ સહિત કોંગ્રેસના કાર્યકરો પણ હાજર રહ્યા હતા. મેવાણીનો આક્ષેપ છે કે ભાજપના નેતાએ જાતિવાદી માનસિકતાથી પ્રેરાઈ અભદ્ર ઉચ્ચારણો કર્યા છે. દરમિયાન કાર્યકરોને પોલીસ સ્ટેશનમાં સાથે લઈ જવા મુદ્દે પોલીસ સાથે રકઝક પણ થઈ હતી. ઘટનાને પગલે પોલીસ સ્ટેશન બહાર રાજકીય માહોલ ગરમાયો હતો.

રતનપુર બોર્ડર નજીક નેશનલ હાઈવે પર ટ્રકમાં લાગી ભીષણ આગ

અરવલ્લીના રતનપુર બોર્ડર નજીક નેશનલ હાઈવે પર કેમિકલ ભરેલા ટ્રકમાં ભીષણ આગ લાગવાની ઘટના સામે આવી છે. શામળાજી-ઉદયપુર નેશનલ હાઈવે પર ડુંગરપુરના બિછીવાડા નજીક ખજૂરી પાસે ટ્રકમાં અચાનક આગ ભભૂકી ઉઠી હતી. કેમિકલ ભરેલા ટ્રકમાં આગ લાગતા ઘટનાસ્થળે અફરાતફરી મચી ગઈ હતી. આગની ઝપેટમાં આવતા ટ્રકના ડ્રાઈવરનું મોત નીપજ્યું છે. જોકે સમયસૂચકતા દાખવી ક્લીનર ટ્રકમાંથી બહાર નીકળી જતાં તેનો આબાદ બચાવ થયો હતો. ઘટનાની જાણ થતાં સ્થાનિક તંત્ર અને પોલીસની ટીમ ઘટનાસ્થળે પહોંચી હતી. આગ કયા કારણોસર લાગી તે અંગે તપાસ હાથ ધરવામાં આવી છે.

ઓરસંગ નદીના પટમાં બંધ પડેલી લીઝનો ખાડો બન્યો જીવલેણ

છોટાઉદેપુરના ઓરસંગ નદીના પટમાં બંધ પડેલી લીઝનો ખાડો જીવલેણ બન્યો છે. ધંધોડા નજીક લીઝના ઊંડા ખાડામાં પડી જતાં એક વ્યક્તિનું મોત થયું છે. ગ્રામજનોનો આક્ષેપ છે કે લીઝમાં નિયમ કરતા વધુ ઊંડા ખાડા ખોદવામાં આવ્યા છે, જેના કારણે આ દુર્ઘટના બની છે. લીઝના ખાડાઓને લઈને ગ્રામજનોમાં ભારે આક્રોશ જોવા મળી રહ્યો છે. PM બાદ મૃતદેહને ફરી નદીના પટમાં લાવવામાં આવ્યો હતો. ગ્રામજનોએ કલેક્ટર અને ખાણખનીજ અધિકારી સ્થળ પર આવે તેવી માંગ કરી છે. અધિકારીઓ સ્થળ પર નહીં આવે ત્યાં સુધી મૃતદેહ નહીં હટાવવાની ચીમકી પણ ગ્રામજનોએ ઉચ્ચારી છે.

નવસારી : તાલુકા પંચાયતના અપક્ષ સભ્ય સેજલ પટેલ પર હુમલો

નવસારીના ગણદેવી તાલુકાના ઉંડાચ ગામમાં તાલુકા પંચાયતના અપક્ષ સભ્ય સેજલ પટેલ પર હુમલો થયાની ઘટના સામે આવી છે. સેજલ પટેલે ચાર અજાણ્યા શખ્સોએ તેમના પર હુમલો કર્યો હોવાનો આક્ષેપ કર્યો છે. ગૌચર જમીન મુદ્દે અરજી કર્યા બાદ હુમલો થયાનું પણ તેમણે જણાવ્યું છે. હુમલામાં ઇજાગ્રસ્ત સેજલ પટેલને સારવાર માટે હોસ્પિટલ ખસેડવામાં આવ્યા હતા. ઘટનાની જાણ થતાં બીલીમોરા પોલીસ દ્વારા સમગ્ર મામલે તપાસ હાથ ધરવામાં આવી છે. હુમલો કયા કારણોસર કરવામાં આવ્યો અને તેમાં કોણ સંડોવાયેલું છે તે અંગે પોલીસે તપાસ શરૂ કરી છે. પોલીસ દ્વારા અજાણ્યા શખ્સોની ઓળખ અને ઘટનાના કારણ અંગે વધુ તપાસ કરવામાં આવી રહી છે.

સુરત: ગાંધીજીના ફોટા સાથે અશ્લિલ રીલ બનાવનાર મહિલા સકંજામાં

નેતન્યાહૂ સમક્ષ કેપ્ટન સ્મિતે વર્ણવ્યો ઘટનાનો ચિતાર

કેપ્ટન સ્મિતે ઈઝરાયલના વડાપ્રધાન નેતન્યાહૂ સમક્ષ ફ્લાઇટ દરમિયાન બનેલી સમગ્ર ઘટનાનો ચિતાર વર્ણવ્યો હતો. કેપ્ટન સ્મિતે જણાવ્યું કે ઉડાન સામાન્ય રીતે ચાલી રહી હતી. આ દરમિયાન કોકપિટમાં હાજર ઓમાની કો-પાયલોટે નમાઝ પઢવાની ઈચ્છા વ્યક્ત કરી હતી. ધાર્મિક સન્માન રાખીને કેપ્ટન સ્મિતે પાછળ નજર કરી નહોતી. જોકે થોડી જ ક્ષણોમાં કો-પાયલોટે પાછળથી કુહાડી વડે તેમના પર હુમલો કર્યો હતો. કેપ્ટને હુમલાખોરને રોકવાનો પ્રયાસ કર્યો અને કોકપિટનો દરવાજો ખોલ્યો, પરંતુ હુમલાખોરોએ ફરી દરવાજો બંધ કરી દીધો. હુમલા બાદ કેપ્ટન સ્મિત નીચે ઢળી પડ્યા હતા. વિમાન નીચે જઈ રહ્યું હોવાનું અનુભવતા તેમણે પૂરી તાકાત અને હિંમતથી દરવાજો ખોલ્યો. દરવાજો ખુલતાં અન્ય પાયલોટે કંટ્રોલ સંભાળી સ્થિતિ કાબૂમાં લીધી હતી.

ફ્લાયદુબઇ ફ્લાઇટના કો-પાયલોટ હમામ-અલ-હમ્મામીને લઇને મોટો ખુલાસો

ફ્લાયદુબઈ ફ્લાઇટના કો-પાયલોટ હમામ-અલ-હમ્મામીને લઈને મોટો ખુલાસો થયો છે. હમામ-અલ-હમ્મામીના આતંકી સંગઠન અલ કાયદા સાથે કનેક્શન હોવાનો અહેવાલ સામે આવ્યો છે. અહેવાલ મુજબ, અલ કાયદાના મુખપત્રમાં ફ્લાયદુબઈ હાઇજેકિંગના નિષ્ફળ પ્રયાસની પ્રશંસા કરવામાં આવી છે. હમામ-અલ-હમ્મામી અગાઉ ઓમાન એર અને રોયલ એર મેરોક માટે પણ કામ કરતો હતો. કથિત રીતે કટ્ટરપંથી વિચારધારાની ચિંતાને કારણે તેને ઓમાન એર દ્વારા ટ્રેનિંગમાંથી દૂર કરવામાં આવ્યો હતો. ત્યારબાદ તેણે લગભગ આઠ મહિના પહેલા ફ્લાયદુબઈમાં કામ શરૂ કર્યું હતું. AQAPના બિનસત્તાવાર મુખપત્રમાં ઓમાની કો-પાયલોટના પ્રયાસને સમર્થન આપતો લેખ પ્રકાશિત કરાયો હોવાનો પણ અહેવાલ છે.

જામનગર : લહેર તળાવમાંથી મનપા કર્મચારીનો મૃતદેહ મળ્યો

જયપુર : કલામ કોચિંગમાં વિદ્યાર્થી સાથે મારપીટ

જયપુરના કલામ કોચિંગમાં વિદ્યાર્થી સાથે શિક્ષક દ્વારા મારપીટનો મામલો સામે આવ્યો છે. દૌસાના એક વિદ્યાર્થીને શિક્ષકે લાફા માર્યા હોવાનો આક્ષેપ છે. ઘટનાનો વીડિયો સોશિયલ મીડિયા પર વાયરલ થતાં સમગ્ર મામલો ચર્ચામાં આવ્યો છે. વીડિયોમાં શિક્ષક વિદ્યાર્થીને થપ્પડ મારતા જોવા મળી રહ્યા છે. ઘટના સામે આવ્યા બાદ શિક્ષકની વર્તણૂકને લઈને સવાલો ઉઠી રહ્યા છે. કલામ કોચિંગમાં વિદ્યાર્થી સાથે મારપીટની ઘટનાને પગલે ખળભળાટ મચ્યો છે. સોશિયલ મીડિયા પર વીડિયો વાયરલ થતાં મામલો વધુ ગરમાયો છે. ઘટનાને લઈને વાલીઓ અને વિદ્યાર્થીઓમાં પણ ચિંતા જોવા મળી રહી છે. સમગ્ર મામલે શિક્ષક સામે કાર્યવાહી થશે કે નહીં તે અંગે હવે સૌની નજર છે.

અમદાવાદ: ક્રાઈમ બ્રાન્ચે બાળ તસ્કરીનો કર્યો પર્દાફાશ

અમદાવાદમાં ક્રાઈમ બ્રાન્ચે બાળ તસ્કરીના કથિત રેકેટનો પર્દાફાશ કરી એક યુવતી સહિત ત્રણ આરોપીઓની ધરપકડ કરી છે. આરોપીઓમાં જીનલ પ્રવિણ યાદવ સહિત ત્રણ લોકોનો સમાવેશ થાય છે. પોલીસના જણાવ્યા મુજબ, સાબરમતી વિસ્તારમાંથી એક માસના બાળકનું અપહરણ કરવામાં આવ્યું હતું. બાળકનું અપહરણ કર્યા બાદ આરોપીઓ ફરાર થઈ ગયા હતા. ઘટનાની જાણ થતાં પોલીસે તપાસ હાથ ધરી અને માત્ર 14 કલાકમાં બાળકને શોધી કાઢ્યું હતું. ત્યારબાદ બાળકને તેના માતા-પિતાને સોંપવામાં આવ્યું હતું. પ્રાથમિક તપાસમાં સામે આવ્યું છે કે આરોપીઓ બાળકોનું અપહરણ કરી તેમને નિઃસંતાન દંપતીને વેચવાની યોજના બનાવી રહ્યા હતા. પોલીસે સમગ્ર મામલે વધુ તપાસ હાથ ધરી છે.

સુરતઃ અલથાણમાં બાળકને માર મારનારા શખ્સ સામે ફરિયાદ

સુરતના અલથાણ વિસ્તારમાં 9 વર્ષના બાળકને માર મારવાની ઘટનામાં પોલીસે ફરિયાદ નોંધી કાર્યવાહી શરૂ કરી છે. રાજહંસ સિન્ફોનીયા સોસાયટીના કિડ્સ ઝોનમાં બાળક રમી રહ્યો હતો. દરમિયાન દડો અન્ય બાળકીના લાગતા બાળકી સાથે બાળકનો વિવાદ થયો હતો. આ સમયે બાળકીના પિતા વર્ધાન શાહ ઉશ્કેરાઈ ગયા હતા અને તેમણે બાળકને લાફા માર્યા હોવાનો આક્ષેપ છે. એટલું જ નહીં, બાળકને જાતિવિષયક અપમાનજનક શબ્દો કહ્યાનો પણ આરોપ લગાવવામાં આવ્યો છે. સમગ્ર ઘટનાને લઈને બાળકની માતાએ અલથાણ પોલીસ સ્ટેશનમાં ફરિયાદ નોંધાવી હતી. ફરિયાદના આધારે પોલીસે વર્ધાન શાહ વિરુદ્ધ ગુનો નોંધી વધુ તપાસ હાથ ધરી છે. ઘટનાને પગલે સોસાયટીમાં પણ ચર્ચા જાગી છે.

વડોદરાના શિનોરમાં પ્રમપ્રકરણનો કરુણ અંજામ, પ્રેમીએ તેની જ વિધવા પ્રેમિકાની કરી કરપીણ હત્યા 

વડોદરાના શિનોરમાં પ્રેમીએ તેની વિધવા પ્રેમિકાની હત્યા કરી. છાણભોઈ ગામે પ્રેમ પ્રકરણનો આવ્યો કરૂણ અંજામ. મનીષા વસાવા નામની યુવતીની હત્યા કરવામાં આવી. તેના પ્રેમી સતિષે તિક્ષ્ણ હથિયાર વડે કરી હત્યા. અંગત કારણોસર હત્યા કરી હોવાની આશંકા. મૃતક છેલ્લા 2 વર્ષ જેટલા સમયથી હતી પ્રેમસંબંધમાં. મૃતકનો પ્રેમી તેના જ ગામનો વતની હોવાનું સામે આવ્યું. મૃતકના પુત્રની ફરિયાદના આધારે પોલીસે ગુનો નોંધ્યો. સમગ્ર મામલે શિનોર પોલીસે વધુ તપાસ શરૂ કરી.

અમદાવાદના થલતેજમાં જાહેર-સરકારી મિલકતોને નુકસાન પહોંચાડનાર યુવક માનસિક અસ્થિર હોવાનો પરિવારે કર્યો દાવો

અમદાવાદના થલતેજમાં જાહેર- સરકારી મિલકતોને નુકસાન પહોચાડનાર યુવક માનસિક અસ્થિર હોવાનો પરિવારે કર્યો દાવો. થલતેજનાં માથાભારે યુવકનાં ભાઇ રણજીતનું નિવેદન આવ્યુ સામે. આકાશ ઠાકોર માનસિક બીમાર હોવાથી છાશવારે કરે છે આવી હરકત. દોઢ વર્ષથી માનસિક બીમારીથી પીડાતા યુવકે વીજ થાંભલાને પહોંચાડ્યુ નકસાન. રણજીત પ્રતાપજી ઠાકોરે સમગ્ર ઘટના અંગે મીડીયા સમક્ષ જાહેર કરી વિગતો. પરિવારે આકાશને બે થી ત્રણ વખત સારવાર માટે દાખલ પણ કર્યો છે. સારવાર છતાંય તેની માનસિક સ્થિતીમાં સુધારો ન થતાં કરે છે આવુ વર્તન. પોતાનાં જ ઘરમાં પણ આકાશે લગાડી આગ જેથી પરિવાર પણ ચિંતીત છે. હરેશ ઉર્ફે આકાશની માનસિક સ્થિતી બાદ પરિવારનાં સભ્યોએ પણ તેનાથી અંતર જાળવ્યુ છે.

ઉના ભાવનગર પર ફોરટ્રેક માર્ગ પર અકસ્માત, એકનુ મોત, 2ને ઈજા

ગીર સોમનાથના ઉના ભાવનગર પર ફોરટ્રેક માર્ગ પર અકસ્માત સર્જાયો છે. કાર અને પથ્થર ભરેલા ટ્રેક્ટર વચ્ચે અકસ્માત થયો. બોલેરોમાં સવાર હતા ચાર લોકો. જેમાથી એકનું મોત થયુ છે. એક ગંભીર અને બેને સામાન્ય ઇજા પહોંચી છે. તમામને ખાનગી હોસ્પિટલમાં સારવાર અર્થે ખસેડાયા છે. અકસ્માતમાં ક્રિપાલ ડાભી નામના 30 વર્ષીય યુવક નું મોત થયું છે.

ગુજરાતના વિવિધ ઉદ્યોગો પર હવે જોવા મળી રહી છે અમેરિકા-ઈરાન-ઈઝરાયેલ તેમજ રશિયા-યુક્રેન યુદ્ધની અસર

દક્ષિણ ગુજરાત ટેક્સ્ટાઇલ પ્રોસેસર્સ એસોસિએશનને સુરત સહીત ગુજરાતના ટેક્સ્ટાઇલ ઉદ્યોગની ગંભીર પરિસ્થિતિ અંગે ચિંતા વ્યક્ત કરી છે. કાચા માલનાં ભાવમાં સતત વધારો ઉદ્યોગ માટે મોટી મુશ્કેલી ઉભી કરી શકે છે. 6 મહિના પહેલાં ₹5,000 થી ₹5,500 મળતો કોલસો અત્યારે વધીને ₹10,000 થી ₹11,000 પ્રતિ ટન પહોંચી ગયો છે. ડાઇઝ-કેમિકલ પણ મોંઘા થયા છે.  ક્રૂડ અને રો-મટિરિયલમાં થયેલા ભાવવધારાને કારણે ડાઇઝ અને કેમિકલ્સનાં ભાવો પણ આસમાને પહોંચ્યા છે. વૈશ્વિક યુદ્ધોની સીધી અસરને કારણે સ્થિતી વણસી રહી છે. રશિયા-યુક્રેન અને ઇરાન-ઇઝરાયલ તણાવને પગલે આંતરરાષ્ટ્રીય સ્તરે ક્રૂડ મોંઘું થતાં ઇનપુટ કોસ્ટમાં ભારે ઉછાળો આવ્યો છે.  બજારમાં મની ક્રાઇસિસ સર્જાતાં ગ્રાહકોની ખરીદશક્તિ ઘટી છે. ઓનલાઇન વેપારમાં 50% સુધીની અસર જોવા મળી રહી છે. વિપરીત પરિસ્થિતિ દિવાળીનાં તહેવાર ટાણે ઇતિહાસમાં ક્યારેય જોવા મળી નથી તેવો મત ઊદ્યોગકારોએ વ્યક્ત કર્યો છે.

ગાંધીનગર મનપાની ચૂંટણી પૂર્વે ભાજપમાં ચાલ્યો બેઠકોનો દોર

ગાંધીનગર મનપા ચૂંટણી પહેલા ભાજપના કાર્યાલયમાં બેઠકોનો દોર ચાલી રહ્યો છે. ગુજરાત ભાજપના મોવડીઓએ બંધ બારણે બેઠક યોજી. પ્રદેશ પ્રભારી તરુણ ચૂગ દ્વારા સંગઠન પદાધિકારીઓ સાથે બેઠક યોજવામાં આવી છે. અધ્યક્ષ આશિષ દવે, પ્રભારી અમિત શાહ, ધારાસભ્ય રીટા પટેલ સહિતનાં લોકો બેઠકમાં હાજર રહ્યાં હતા. ચૂંટણી તૈયારીઓની સમીક્ષા અને પ્રચાર અંગે પણ બેઠકમાં ચર્ચા કરવામાં આવી હોવાની વિગતો સામે આવી છે.

સુરતના સારોલીમાં કાપડના વેપારી સાથે રૂપિયા 1.24 કરોડથી વધુની છેતરપિંડી કરનારા બે ઝડપાયા

સુરતના સારોલીમાં કાપડના વેપારી સાથે રૂપિયા 1.24 કરોડથી વધુની છેતરપિંડી કરનારા બે ઝડપાયા. સારોલી પોલીસે આરોપી લલિતકિશન સાઢ અને રામશરણ યાદવને ઝડપી પાડ્યો. આરોપીઓએ વેપારી પાસેથી નાની રકમનો કાપડનો જથ્થો ખરીદી સમય પર પેમેન્ટની ચુકવણી કરી દેતા હતા. આ રીતે સતત કરતા હતા અને અંતે મોટી રકમમાં કાપડનો જથ્થો ખરીદી સમય પર પેમેન્ટની ચુકવણી ન કરી ફરાર થઈ ગયા હતા. હાલ પોલીસે બંને આરોપીઓને ઝડપી આગળ કાર્યવાહી હાથધરી છે.

રાજકોટમાંથી નકલી પોલીસને રૂ. 40,000ના મુદામાલ સાથે ઝડપી પાડ્યો

રાજકોટમાંથી વધુ એક નકલી પોલીસ ઝડપાયો છે. કોરાટ ચોક નજીક પોલીસ યુનિફોર્મ પહેરી રોફ જમાવતો હતો અને શાપર પોલીસે ઝડપી પાડ્યો. પોલીસ પુછપરછમાં આરોપીએ તાલુકા પોલીસમાં ફરજ બજાવતો હોવાનું રટણ કર્યું હતું. કિશોર સલાટની ધરપકડ કરી રૂ.40,000નો મુદામાલ કબજે કરાયો. શાપર પોલીસે BNS કલમ 204, 205 મુજબ ગુનો નોંધી વધુ તપાસ હાથ ધરી છે.

સાબરકાંઠાના પોશીનામાં 3 ખેતરમાં વાવેતર કરેલ ગાંજો ઝડપાયો

સાબરકાંઠાના પોશીનામાં ગાંજાના વાવેતર કરવાના ત્રણ દિવસમાં ત્રણ કેસ સામે આવ્યા છે. પોશીના વિસ્તારમાંથી વધુ એક ગાંજાનું વાવેતર ઝડપાયું. પહેલા પોશીનાના કોટડી ગઢીમાંથી ગાંજાના 967 જેટલા છોડ ખેતરમાં વાવેતર કરેલા ઝડપાયા. પછી પોશીનાના આંજણી ગામેથી એસઓજીએ 666 છોડ ખેતરમાં વાવેતર ઝડપ્યું. હવે પોશીનાના કાલીકાંકરથી ગાંજાના છોડ વાવેતર કરેલા ઝડપાયા. પોશીના પોલીસે 322 જેટલા ગાંજાના છોડ ત્રણ ખેતરમાં વાવેતર કરેલ ઝડપ્યા. ત્રણ દિવસમાં ચાર કરોડ 13 લાખના ગાંજાના વાવેતરને ઝડપ્યું છે. આઠસો કિલોથી વધુ વજનના ગાંજાના છોડનો જથ્થો ઝડપાયો. ગાંજાના વજનદાર છોડ તૈયાર થયા ત્યાં સુધી ગંધ સુદ્ધા ના આવી. પોશીના તાલુકામાં માદક પદાર્થોની મોટાપાયે ખેતી વિસ્તરવા લાગી. ત્રણેય મામલામાં પોલીસે ગુનો નોંધી કાર્યવાહી હાથ ધરી. કાલીકાંકરમાં ગાંજો વાવેતર કરનાર ત્રણ આરોપીની ધરપકડ. ત્રણ અલગ અલગ ખેતરોમાં વાવેતર કર્યો હતો ગાંજો

સુરતમાં SMCના ફુડ સેફટી વિભાગે 78 હોટેલ-રેસ્ટોરન્ટોમાં તપાસ કરી, 69 કીલો અખાદ્ય ખોરાકનો કરાયો નાશ

સુરતમાં ફૂડ સેફ્ટી વિભાગે સતત ચોથા દિવસે હોટલ રેસ્ટોરન્ટમાં તપાસ હાથ ધરી છે. 78 હોટેલ અને રેસ્ટોરન્ટોમાં તપાસ હાથ ધરી. તપાસમાં મળી આવેલ 69 કીલો અખાદ્ય ખોરાકનો કરાયો નાશ છે. તપાસ દરમિયાન 39 હોટલ અને રેસ્ટોરન્ટોને આપવામાં આવી છે નોટિસ. 32 હોટલ અને રેસ્ટોરન્ટોના ખાદ્ય પદાર્થોના સેમ્પલ લેવામાં આવ્યા છે. સ્થળ ઉપર જ રૂપિયા 1.34.900નો દંડ પણ વસુલ કરવામાં આવ્યો છે.

સરકારની સંપતિને નુકસાન કરતા લુખ્ખા તત્વો સામે પગલા ભરવા BJPના MLAની AMCના અને પોલીસના કમિશનરને રજૂઆત

જાહેરમાં આતંક ફેલાવનારા સામે અમદાવાદના એલીસબ્રિજના MLA લાલઘૂમ થયા. જાહેર સંપતિને નુકસાન કરનાર સામે કડક પગલાં લેવા અમિત શાહની રજૂઆત. થલતેજ વિસ્તારમાં સામે આવ્યો હતો અસામાજિક તત્વોનો આંતક. જેને લઈને ભાજપ MLA અમિત શાહે કર્યું નિવેદન, આવા અસામાજિક તત્વો સામે પગલા લેવા જોઇએ. “AMC ની પ્રોપર્ટીને નુકશાન કરે તે ના ચલાવવા દેવાય” પોલીસ આ વ્યક્તિ સામે ગુન્હો દાખલ કરવો જોઇએ. મે AMC કમિશનર સહિત પોલીસ વિભાગને જાણ કરી છે. AMC નાં વિજ પોલ પર નુકશાન કરતો વીડિયો સામે આવ્યો છે.

ગુજરાત ભાડા વિધેયક-2026 નો વિવાદ વધુ વકર્યો, 5 થી 10 ઓક્ટોબર સુધી કોર્ટ કામગીરીથી અળગા રહેશે વકીલો

ગુજરાત ભાડા વિધેયક-2026 નો વિવાદ વધુ વકર્યો છે. અમદાવાદ બાર એસોસિએશન અને અમદાવાદ સ્મોલ કોઝ કોર્ટ બાર એસોસિએશનનું એલાન 5 ઓક્ટોબરથી કોર્ટ કામગીરીથી સ્વૈચ્છિક રીતે અળગા રહેવાનો નિર્ણય કરવામાં આવ્યો છે. બંને બાર એસોસિએશનની સંયુક્ત અસાધારણ સામાન્ય સભામાં લેવાયો નિર્ણય. 5 થી 10 ઓક્ટોબર સુધી કોર્ટ કામગીરીથી અળગા રહેશે વકીલો. 5 ઓક્ટોબરે અમદાવાદમાં બાઈક રેલી યોજાશે. 6 ઓક્ટોબરે લાલદરવાજા વિસ્તારમાં આક્રોશજનક કાર્યક્રમનું આયોજન. 7 ઓક્ટોબરે સિટી સિવિલ અને સેશન્સ કોર્ટના મુખ્ય દરવાજા પાસે ધરણા યોજાશે. ગુજરાતના વિવિધ વકીલ મંડળોએ પણ આ વિરોધને સમર્થન આપ્યું હોવાનો દાવો કરાયો છે. બાર કાઉન્સિલ ઓફ ગુજરાત દ્વારા પણ ઠરાવ કરીને લડતને ટેકો જાહેર કરાયો છે. વિધેયકની જોગવાઈઓનો વિરોધ કરવા વકીલો દ્વારા વિરોધ પ્રદર્શન અને કાર્યક્રમો યોજાશે.

પીપોદરા GIDC માં મોડી રાત્રે આગ ફાટી નીકળી

પીપોદરા GIDC માં મોડી રાત્રે આગ ફાટી નીકળી હતી. યાન કાપડ બનાવતી શ્રી અંબાજી ફાઇબર્સ કંપનીમાં આગ લાગી હતી. પાંચ ફાયર ટીમે મળી આગને કાબૂમાં લીધી. આગ લાગવાનું કારણ અકબંધ છે.

સાબરમતી રિવરફ્રન્ટ પર લક્કડીયા બ્રિજ પરથી યુવકનો આપઘાતનો પ્રયાસ

અમદાવાદના રિવરફ્રન્ટ લક્કડીયા બ્રિજ પરથી યુવકનો આપઘાતનો પ્રયાસ કર્યો હતો. ફાયર વિભાગે ભારે જહેમત બાદ યુવકને બચાવ્યો છે. સુનીલ ચુનારા નામના યુવકે કર્યો આત્મહત્યાનો પ્રયાસ. 2 કલાક સમજાવ્યા બાદ યુવક નીચે ઉતર્યો. 108 મારફતે હોસ્પિટલ ખસેડાયો. પોલીસે વધુ તપાસ હાથ ધરી.

અમદાવાદના બોડકદેવ વિસ્તારમાંથી ત્રણ ફૂટ લાંબી પાટલા ઘો મળી આવી

અમદાવાદ બોડકદેવમાંથી ત્રણ ફૂટ લાંબી પાટલા ઘો મળી આવતા અફરાતફરી મચી જવા પામી છે. અમદાવાદના બોડકદેવ વિસ્તારમાંથી આશરે ત્રણ ફૂટ લાંબી પાટલા ઘો મળી આવતા અફરાતફરી મચી હતી. ઘટનાની જાણ થતાં એનિમલ લાઈફ કેરના વાઈલ્ડલાઈફ એક્સપર્ટ વિજય ડાભી ટીમ સાથે તાત્કાલિક સ્થળે પહોંચ્યા હતા. રેસ્ક્યુ ટીમે સાવચેતીપૂર્વક પાટલા ઘાનું સફળતાપૂર્વક રેસ્ક્યુ કરી તેને સુરક્ષિત સ્થળે ખસેડી હતી. પાટલા ઘો બિનઝેરી સાપ છે અને સામાન્ય રીતે માનવજીવન માટે જોખમી નથી. તે ઉંદર સહિતના નાના પ્રાણીઓનો શિકાર કરીને પર્યાવરણનું સંતુલન જાળવવામાં મહત્વની ભૂમિકા ભજવે છે.

ઝઘડિયાના સંજાલી ગામે પશુ ચરાવવા ગયેલ 12 વર્ષીય બાળકી પર દીપડાએ કર્યો હુમલો

ભરૂચના ઝઘડિયાના સંજાલી ગામે બાળકી પર દીપડાએ હુમલો કર્યો છે. પશુ ચરાવવા ગયેલ 12 વર્ષીય બાળકી ઇજાગ્રસ્ત થઈ છે. બાળકીને ગાલ, કાન અને પગમાં ઇજા પહોચી છે. પરિવારે દીપડાનો પ્રતિકાર કરતા દીપડો ભાગ્યો. બાળકીને ભરૂચ સિવિલ હોસ્પિટલ ખસેડાઇ

મહેસાણાના કડીના થોળમાં 5 વર્ષીય બાળકીનું કંકાલ મળ્યું, જંગલી પ્રાણીએ શિકાર કર્યો હોવાની શંકા

મહેસાણાના કડીના થોળમાં 5 વર્ષીય બાળકીનું કંકાલ મળ્યું. ગત શનિવારથી ગુમ પાયલનું શંકાસ્પદ મોત થયું છે. ઘરથી 1 કિલોમીટર દૂર ખેતરમાંથી અવશેષો મળ્યા. કપડાંના આધારે બાળકીની ઓળખ કરાઈ. CCTVમાં બાળકી રોડ કે ખેતર તરફ જતી દેખાઈ હતી. જંગલી પ્રાણીએ બાળકીનો શિકાર કર્યો હોવાની શંકા સેવાઈ રહી છે. અજગર બાળકીને ગળી હોવાની પણ આશંકા સેવાઈ છે. કંકાલનું અમદાવાદ સિવિલમાં ફોરેન્સિક પોસ્ટમોર્ટમ કરાયું. FSL અને DNA રિપોર્ટ બાદ મોતનું કારણ સ્પષ્ટ થશે. મહેસાણાના બાવળુ પોલીસે સમગ્ર મામલે તપાસ હાથ ધરી.

વેરાવળ રેલવે કોલોનીમાં, 2 RPF હેડ કોન્સ્ટેબલ, 3 રેલવે કર્મચારી સહિત 6 જણા જૂગાર રમતા ઝડપાયા

ગીર સોમનાથના વેરાવળમાં રેલવે કોલોનીના જુગારધામ પર LCBનો દરોડો. 2 RPF હેડ કોન્સ્ટેબલ, 3 રેલવે કર્મચારી સહિત 6 ઝડપાયા. રેલવે કર્મચારીના પાડોશીના ક્વાર્ટરમાં ચાલતો હતો જુગારધામ. LCB પશ્ચિમ રેલવે રાજકોટની ટીમે દરોડો પાડ્યો. રૂ.2.15 લાખનો મુદ્દામાલ કબજે કર્યો. રૂ.58,300 રોકડ અને રૂ.1.57 લાખના 6 મોબાઇલ જપ્ત કર્યાં છે. વેરાવળ રેલવે પોલીસ સ્ટેશનમાં જુગારધારા હેઠળ ગુનો નોંધાયો.

ઇન્ડોનેશિયામાં વહેલી સવારે 5.2 ની તીવ્રતાનો આવ્યો ભૂકંપ  

નેશનલ સેન્ટર ફોર સિસ્મોલોજી (NCS) અનુસાર, આજે સવારે 5:07 વાગ્યે ઇન્ડોનેશિયામાં 10 કિલોમીટરની ઊંડાઈએ 5.2ની તીવ્રતાનો ભૂકંપ આવ્યો હતો.

An earthquake of magnitude 5.2 struck Indonesia at 05:07 hours today at a depth of 10 km, according to the National Center for Seismology (NCS). https://t.co/vOXVKt9yqA

— ANI (@ANI) October 4, 2026