Breaking News : ગુજરાત ATSને મળી મોટી સફળતા, ગ્રેનેડ અટેક કરવાના ષડયંત્રમાં સામેલ વોન્ટેડ આરોપીની ધરપકડ

ગુજરાત ATSએ પંજાબમાં ગ્રેનેડ અને હથિયારની તસ્કરી જેવા ગંભીર ગુનાઓમાં સંડોવાયેલા એક વોન્ટેડ આરોપીની ધરપકડ કરી છે. પંચમહાલ જિલ્લાના હાલોલ ખાતેથી ગુરપ્રીત સિંહ ઉર્ફે ગોપી બિલ્લા નામનો આ આરોપી ઝડપાયો છે. ગુજરાત ATSની આ કાર્યવાહી પંજાબ પોલીસ દ્વારા મળેલી બાતમીના આધારે કરવામાં આવી હતી, જે એક મોટી ગુનાહિત પ્રવૃત્તિ પર અંકુશ મેળવવામાં મદદરૂપ થઈ છે.

પ્રાથમિક માહિતી મુજબ, ગુરપ્રીત સિંહ પંજાબમાં ગ્રેનેડ હુમલાઓ કરવાના કાવતરામાં અને હથિયારોની તસ્કરીમાં સક્રિય રીતે સંડોવાયેલો હતો. તેની સામે આ મામલે પંજાબમાં ગુનો નોંધાયેલો હતો. પંજાબ પોલીસે ગુરપ્રીત સિંહ ગુજરાતમાં હોવાની માહિતી ગુજરાત ATS સાથે શેર કરી હતી, જેના પગલે ATS એ તાત્કાલિક સર્ચ ઓપરેશન હાથ ધર્યું હતું. તપાસ દરમિયાન ગુરપ્રીત સિંહ છેલ્લા 20 દિવસથી હાલોલની એક ખાનગી હોટેલમાં છુપાયેલો હોવાનું જાણવા મળ્યું હતું.

ગ્રેનેડ અટેક કરવાના ષડયંત્રમાં સામેલ વોન્ટેડ આરોપીની ધરપકડ

ગુજરાત ATS ની ટીમે હાલોલ પહોંચી ગુરપ્રીત સિંહને દબોચી લીધો હતો. તેની પૂછપરછ કરતા તેણે પોતાના ગુનાઓની કબૂલાત કરી હતી. ગુરપ્રીત સિંહ ઉર્ફે ગોપી બિલ્લાએ અન્ય આરોપીઓ સાથે મળીને પંજાબમાં દહેશત ફેલાવવા માટે ગ્રેનેડ હુમલા કરવાના કાવતરામાં તેની સંડોવણી સ્વીકારી હતી. વધુ ચોંકાવનારો ખુલાસો એ થયો છે કે આ આરોપી પાકિસ્તાન સાથેના આતંકી નેટવર્કમાં પણ સંડોવાયેલો હોવાનું પ્રાથમિક તપાસમાં સામે આવ્યું છે.

આ કેસમાં ગુરપ્રીત સિંહની ધરપકડ પહેલા પણ બે અન્ય આરોપીઓની ધરપકડ થઈ ચૂકી છે. આ ધરપકડ સાથે આ કેસમાં ઝડપાયેલા આરોપીઓની સંખ્યા ત્રણ થઈ છે. હાલોલથી અટકાયત કર્યા બાદ ગુરપ્રીત સિંહને અમદાવાદ લાવવામાં આવ્યો હતો અને ત્યારબાદ કાયદેસરની કાર્યવાહી પૂર્ણ કરીને તેને પંજાબ પોલીસને સોંપવામાં આવ્યો છે. પંજાબ પોલીસ દ્વારા તેની વધુ પૂછપરછ કરવામાં આવશે, જેમાં આતંકી નેટવર્ક અને હથિયાર તસ્કરી સંબંધિત વધુ ચોંકાવનારા ખુલાસા થવાની શક્યતા છે. ગુજરાત ATS ની આ કાર્યવાહી રાજ્યમાં ગુનેગારોને છુપાવવાની જગ્યા ન આપવાના નિર્ધારને મજબૂત બનાવે છે.