Breaking News: અંબાજીની સરકારી હોસ્પિટલમાં ડૉક્ટરની ઘોર બેદરકારી, મહિલાની ડિલિવરીનો Video બનાવી સોશિયલ મીડિયા પર કર્યો પોસ્ટ
બનાસકાંઠાના અંબાજીની સરકારી હોસ્પિટલનો એક ચોંકાવનારો કિસ્સો સામે આવ્યો છે, જ્યાં ગાયનેકોલોજી વિભાગના ડૉક્ટરે ઓપરેશન થિયેટરના નિયમો નેવે મૂકીને મહિલાની ડિલિવરીનો વીડિયો સોશિયલ મીડિયા પર શેર કર્યો છે.

સોશિયલ મીડિયા પર રીલ બનાવવાની લ્હાયમાં લોકો ભાન ભૂલતા હોય તેવા અનેક કિસ્સા સામે આવતા હોય છે પરંતુ હવે જવાબદાર પદ પર બેઠેલા ડૉક્ટરો પણ નિયમોને નેવે મૂકી રહ્યા છે. બનાસકાંઠાના અંબાજીની સરકારી હોસ્પિટલના ગાયનેકોલોજી વિભાગમાં ફરજ બજાવતા ડૉ. કિંજલ પરીખની એક ગંભીર બેદરકારી સામે આવી છે, જેણે સમગ્ર પંથકમાં વિવાદ જગાવ્યો છે.
શું છે સમગ્ર મામલો?
અંબાજીની સરકારી હોસ્પિટલમાં ગાયનેકોલોજિસ્ટ તરીકે કાર્યરત ડૉ. કિંજલ પરીખે એક ગર્ભવતી મહિલાની સિઝેરિયન ડિલિવરીના ઓપરેશન દરમિયાન વીડિયો ઉતાર્યો હતો. તેમણે ઓપરેશન ટેબલ પર રહેલા દર્દીના દૃશ્યો અને સર્જરીની સમગ્ર પ્રક્રિયા દર્શાવતો આ વીડિયો સોશિયલ મીડિયા પર પોસ્ટ પણ કરી દીધો હતો.
નિયમોનું ખુલ્લેઆમ ઉલ્લંઘન
સામાન્ય રીતે ઓપરેશન થિયેટરમાં દર્દી હોય કે ડૉક્ટર, કોઈપણ વ્યક્તિને મોબાઈલ ફોન લઈ જવા પર સખત પ્રતિબંધ હોય છે. નિયમ મુજબ, દર્દીની લેખિત સંમતિ વિના કોઈ પણ તબીબી ફોટો કે વીડિયો ઉતારી શકાતો નથી કે તેને સોશિયલ મીડિયા પર શેર કરી શકાતો નથી. આમ કરવું કાયદેસરનો ગુનો ગણાય છે.
Controversy at Ambaji Government Hospital Over Gynaecologist Filming Patient During Surgery | TV9Gujarati #Banaskantha #AmbajiHospital #DoctorNegligence #CSectionVideo #PrivacyViolation #Gynaecologist #SocialMedia #MedicalEthics #GujaratNews #HospitalControversy #TV9Gujarati https://t.co/dPqSdbQYQV
— Tv9 Gujarati (@tv9gujarati) November 22, 2026
આ ઉપરાંત, ઇન્ડિયન મેડિકલ કાઉન્સિલના વર્ષ 2002 ના નિયમોમાં પણ તબીબી કામગીરીના પ્રચાર અંગે સ્પષ્ટ નૈતિક મર્યાદાઓ નક્કી કરવામાં આવી છે, જે મુજબ દર્દીની ગોપનીયતા અને સલામતી જાળવવાની સંપૂર્ણ જવાબદારી ડૉક્ટરની હોય છે.
ઉઠ્યા અનેક સવાલો
આ વીડિયો સોશિયલ મીડિયામાં વાયરલ થતાં જ અનેક સવાલો ઊભા થયા છે. ડૉક્ટરે કોની મંજૂરીથી ઓપરેશન થિયેટરમાં વીડિયો ઉતાર્યો? વીડિયો ઉતારતા પહેલા દર્દીની લેખિત સંમતિ લેવામાં આવી હતી કે નહીં? દર્દીની ગોપનીયતા સાથે ચેડાં કરવા બદલ શું પગલાં લેવાશે?
હોસ્પિટલ તંત્રની કાર્યવાહી
ઓપરેશન ટેબલ પર દર્દીનો વીડિયો ઉતારીને વાયરલ કરનાર ડૉક્ટર સામે કડક કાર્યવાહી કરવાની માગ ઊઠી છે. વિવાદ વધતા હોસ્પિટલના સુપરિન્ટેન્ડેન્ટે ડૉ. કિંજલ પરીખને નોટિસ ફટકારી છે. આ સાથે જ સુપરિન્ટેન્ડેન્ટે જવાબદાર ડૉક્ટર વિરુદ્ધ કાયદેસરની કાર્યવાહી કરવાની પણ બાંહેધરી આપી છે.