Padma Awards : 23 જૂને આર માધવન સહિત આ હસ્તિઓને કરાશે પદ્મ પુરસ્કારથી સન્માનિત

દેશના સર્વોચ્ચ નાગરિક સન્માનોમાંના એક એવા પદ્મ પુરસ્કારો માટે આ વર્ષે 131 પ્રતિષ્ઠિત હસ્તીઓના નામ પસંદ કરવામાં આવ્યા છે. જેમાંથી 66 લોકો પહેલાથી જ સન્માનિત થઈ ચૂક્યા છે અને બાકીનાને 23 જૂને સન્માનિત કરવામાં આવશે. 23 જૂને પદ્મ પુરસ્કાર સમારોહના બીજા તબક્કામાં રાષ્ટ્રપતિ દ્રૌપદી મુર્મુ પાસેથી પદ્મ પુરસ્કાર મેળવનાર ફિલ્મ હસ્તીઓમાં અભિનેતા-ફિલ્મ નિર્માતા આર. માધવન, પીઢ મલયાલમ સુપરસ્ટાર મામૂટી, અભિનેતા સતીશ શાહ અને તેલુગુ સિનેમાના દિગ્ગજ રાજેન્દ્ર પ્રસાદનો સમાવેશ થાય છે.

મે 2026 માં યોજાયેલા પ્રથમ એવોર્ડ સમારોહમાં 66 લોકોને એવોર્ડ આપવામાં આવ્યા હતા. બીજો સમારોહ હવે રાષ્ટ્રપતિ ભવનમાં યોજાશે. પુરસ્કારો મર્યાદિત ઔપચારિક કાર્યક્રમના ભાગ રૂપે રજૂ કરવામાં આવતા હોવાથી બાકીના વિજેતાઓનું સન્માન બીજા તબક્કામાં કરવામાં આવશે.

આર. માધવનને આપવામાં આવશે પદ્મ શ્રી

પ્રસિદ્ધ અભિનેતા આર. માધવનને પણ પદ્મ શ્રીથી સન્માનિત કરવામાં આવશે. “મેડી” તરીકે જાણીતા, આ અભિનેતાએ ટેલિવિઝન અને સિનેમામાં સફળ કારકિર્દી બનાવી છે. તેમણે તમિળ, હિન્દી અને અન્ય ઘણી ભાષાઓમાં 1200થી વધુ ટેલિવિઝન એપિસોડ અને 75 ફિલ્મોમાં અભિનય કર્યો છે. તેઓ કૃષિ પ્રવૃત્તિઓમાં પણ સામેલ છે. જેમાં મુંબઈમાં ઓર્ગેનિક હાઇડ્રોપોનિક ખેતી અને તમિલનાડુમાં નારિયેળ ફાર્મનો સમાવેશ થાય છે.

મામૂટીને મળશે પદ્મ ભૂષણ

ફિલ્મ ઉદ્યોગના પ્રખ્યાત વ્યક્તિ મામૂટીને 23 જૂને પદ્મ ભૂષણથી સન્માનિત કરવામાં આવશે. પાંચ દાયકાથી વધુની કારકિર્દીમાં, મામૂટીએ વિવિધ ભાષાઓમાં 400થી વધુ ફિલ્મોમાં અભિનય કર્યો છે. ફિલ્મો ઉપરાંત તેઓ સામાજિક અને પરોપકારી કાર્યો માટે પણ જાણીતા છે. થિયેટર, ટેલિવિઝન અને ફિલ્મોમાં તેમના કાર્ય માટે જાણીતા સતીશ શાહને પણ પદ્મ શ્રી પ્રાપ્ત થશે. તેમની કારકિર્દી ચાર દાયકાથી વધુની છે અને તેઓ તેમના હાસ્ય સમય અને યાદગાર અભિનય માટે પ્રખ્યાત છે.

131 પદ્મ પુરસ્કારોને આપવામાં આવીથી મંજૂરી

પદ્મશ્રી માટે પસંદ કરાયેલા રાજેન્દ્ર પ્રસાદ તેલુગુ સિનેમાના એક પીઢ અભિનેતા છે. ચાર દાયકાની કારકિર્દીમાં તેમણે 6 ભાષાઓમાં 286થી વધુ ફિલ્મોમાં અભિનય કર્યો છે અને તેઓ તેમના સામાજિક કાર્ય માટે પણ જાણીતા છે. આ વર્ષે રાષ્ટ્રપતિએ 131 પદ્મ પુરસ્કારોને મંજૂરી આપી છે. જેમાં પાંચ પદ્મ વિભૂષણ, 13 પદ્મ ભૂષણ અને 113 પદ્મશ્રી પુરસ્કારોનો સમાવેશ થાય છે.

દર વર્ષે પ્રજાસત્તાક દિવસે જાહેર કરાયેલા આ પુરસ્કારો કલા, સાહિત્ય, શિક્ષણ, મેડિકલ, વિજ્ઞાન, રમતગમત, જાહેર બાબતો, વેપાર અને ઉદ્યોગ, સમાજ સેવા અને નાગરિક સેવા જેવા ક્ષેત્રોમાં ઉત્કૃષ્ટ યોગદાનને માન્યતા આપે છે. 23 જૂને યોજાનાર આ સમારોહમાં દેશભરના વિવિધ ક્ષેત્રોના સફળ વ્યક્તિઓનું સન્માન કરવામાં આવશે.

આ પણ વાંચો, તારક મહેતા શો છોડ્યા બાદ હવે શું કરી રહી છે જુની અંજલી ભાભી? જુઓ ફોટો