વાવાઝોડા કે અતિવૃષ્ટિમાં તમારી કારને નુકસાન થાય તો શું કંપની આપશે ક્લેમ? જાણી લો ઇન્સ્યોરન્સના નિયમો

ભારે પવન, વરસાદ અને વાવાઝોડા દરમિયાન અવારનવાર ઝાડ અથવા મકાનોના પતરાં ઉડીને વાહનો પર પડવાની ઘટનાઓ સામે આવતી હોય છે. આના કારણે કારનું બોનેટ, છત કે વિન્ડશીલ્ડ તૂટી જાય ત્યારે કાર માલિકો મૂંઝવણમાં મુકાઈ જાય છે કે આ ખર્ચ વીમા કંપની આપશે કે પોતાના ખિસ્સામાંથી ભોગવવો પડશે.

ક્લેમ મળશે કે નહીં? પહેલાં ચેક કરો તમારી પોલિસી

તમારી કારને થયેલા નુકસાનનું વળતર મળશે કે નહીં, તેનો આધાર તમારી પાસે કયા પ્રકારનો વીમો છે તેના પર રહેલો છે, કોમ્પ્રિહેન્સિવ ઇન્સ્યોરન્સ (Comprehensive Insurance): જો તમારી પાસે આ ફૂલ વીમો હશે, તો વાવાઝોડું, ભારે વરસાદ, પૂર અથવા ઝાડ પડવા જેવી કુદરતી આફતોથી થયેલું નુકસાન તેમાં કવર થાય છે. આ સ્થિતિમાં તમે તૂટેલા કાચ કે બોડી ડેમેજ માટે સરળતાથી ક્લેમ કરી શકો છો.

થર્ડ-પાર્ટી ઇન્સ્યોરન્સ (Third-Party Insurance): જો તમારી પાસે માત્ર કાયદાકીય નિયમ મુજબનો થર્ડ-પાર્ટી વીમો જ છે, તો કંપની તમારી કારના નુકસાનનું કોઈ વળતર નહીં ચૂકવે. આ પોલિસી માત્ર તમારા વાહનથી અન્ય કોઈ વ્યક્તિ, વાહન કે પ્રોપર્ટીને થયેલા નુકસાનને જ કવર કરે છે.

કારને નુકસાન થાય ત્યારે તાત્કાલિક કરો આ કામ

• ફોટો અને વીડિયો લો: નુકસાન થયેલી જગ્યાએથી કારને હટાવતા પહેલાં, નુકસાન પામેલા તમામ ભાગોના અલગ-અલગ એંગલથી સ્પષ્ટ ફોટા અને વીડિયો પાડી લો.
• કંપનીને તુરંત જાણ કરો: વીમા કંપનીના હેલ્પલાઇન નંબર, મોબાઇલ એપ કે વેબસાઇટના માધ્યમથી તાત્કાલિક ક્લેમ રજિસ્ટર કરાવો.
• દસ્તાવેજો તૈયાર રાખો: તમારી ઇન્સ્યોરન્સ પોલિસીનો નંબર, ગાડીના કાગળો (RC બુક), ડ્રાઇવિંગ લાયસન્સ અને નુકસાનના ફોટા ઓનલાઇન સબમિટ કરવા માટે તૈયાર રાખો.

સર્વેયર આવે તે પહેલાં ભૂલથી પણ ન કરો આ કામ

મોટાભાગના લોકો કારને નુકસાન થતાં જ સૌથી મોટી ભૂલ એ કરે છે કે તેઓ તરત જ ગેરેજમાં જઈને કાચ બદલાવી નાખે છે કે રિપેરિંગ કરાવી લે છે અને પછી ક્લેમ ફાઇલ કરે છે. વીમા કંપનીઓ ક્લેમ પાસ કરતા પહેલાં પોતાના સર્વેયરને ગાડીના નિરીક્ષણ માટે મોકલે છે. જો તમે કંપનીની પરવાનગી વગર પહેલાં જ રિપેરિંગ કરાવી લેશો, તો તમારો ક્લેમ રિજેક્ટ થઈ શકે છે.

ધ્યાનમાં રાખવા જેવી બાબતો:

હંમેશા તમારી પોલિસીની શરતો અને નિયમો અગાઉથી વાંચી રાખો.  કેટલીક પોલિસીમાં ‘ડિડક્ટેબલ’ (Deductible) નિયમ હોય છે, જેમાં અમુક ટકા રકમ કાર માલિકે પોતે ભોગવવાની હોય છે. નુકસાન થયા પછી ક્લેમ નોંધાવવામાં બિલકુલ વિલંબ ન કરો. રિપેરિંગના તમામ અસલી બિલ અને રસીદો સંભાળીને રાખો.

શું તમારા PF ખાતામાં પણ વ્યાજની એન્ટ્રી નથી દેખાઈ? જાણો ક્યારે આવશે અટકેલા પૈસા