SBI મ્યુચ્યુઅલ ફંડનો ધમાકો: ઓછાં જોખમે વધુ રિટર્ન માટે નવી SIF સ્ટ્રેટેજી લોન્ચ, જાણો કેટલું કરવું પડશે લઘુત્તમ રોકાણ?

દેશના સૌથી મોટા એસેટ મેનેજર SBI મ્યુચ્યુઅલ ફંડે પોતાના સ્પેશિયલાઇઝ્ડ ઇન્વેસ્ટમેન્ટ ફંડ (SIF) ફ્રેમવર્ક હેઠળ બીજી ઇન્વેસ્ટમેન્ટ સ્ટ્રેટેજી રજૂ કરી છે. ફંડ હાઉસે ‘મેગ્નમ ઇક્વિટી એક્સ-ટોપ 100 લોંગ શોર્ટ ફંડ’ (Magnum Equity Ex-Top 100 Long Short Fund) લોન્ચ કર્યું છે. આ ફંડ મુખ્યત્વે માર્કેટ કેપના આધારે ભારતની ટોપ 100 કંપનીઓની બહારની કંપનીઓમાં રોકાણ કરશે. સાથે જ બજારની અસ્થિરતા અને જોખમને મેનેજ કરવા માટે ડેરિવેટિવ્ઝ દ્વારા મર્યાદિત શોર્ટ પોઝિશન્સનો ઉપયોગ કરશે.

NFO ની મુખ્ય તારીખો અને બેન્ચમાર્ક

જો તમે એસબીઆઈ મ્યુચ્યુઅલ ફંડની આ નવી સ્ટ્રેટેજીમાં રોકાણ કરવાનું વિચારી રહ્યા છો, તો આ મહત્વપૂર્ણ તારીખો યાદ રાખો:

• NFO ઓપનિંગ ડેટ: 7 ઓગસ્ટ 2026
• NFO ક્લોઝિંગ ડેટ: 20 ઓગસ્ટ 2026
• ફંડનો પ્રકાર: ઓપન-એન્ડેડ સ્ટ્રેટેજી
• બેન્ચમાર્ક: BSE 500 TRI (ટોટલ રિટર્ન ઇન્ડેક્સ)

પૈસા ક્યાં અને કેવી રીતે રોકાણ કરશે આ ફંડ?

ફંડ હાઉસના જણાવ્યા મુજબ, આ ફંડ પોતાની કુલ એસેટ્સની ફાળવણી આ રીતે કરશે:

• ઇક્વિટી એલોકેશન: કુલ એસેટ્સનો 65% થી 100% હિસ્સો ટોપ-100 ની બહારની કંપનીઓના શેરો અને ઇક્વિટી-લિંક્ડ ઇન્સ્ટ્રુમેન્ટ્સમાં રોકવામાં આવશે.
• ટોપ-100 કંપનીઓમાં એક્સપોઝર: જરૂરિયાત મુજબ 35% સુધીનો હિસ્સો ટોપ-100 કંપનીઓમાં રોકી શકાશે.
• ડેટ અને અન્ય વિકલ્પો: 35% સુધી ડેટ અને મની માર્કેટ ઇન્સ્ટ્રુમેન્ટ્સમાં, 20% સુધી InvITs માં અને 35% સુધી ગોલ્ડ-સિલ્વર ETFs સહિત અન્ય મ્યુચ્યુઅલ ફંડ યુનિટ્સમાં રોકાણ કરી શકાશે.
• વિદેશી બજારોમાં રોકાણ: રેગ્યુલેટરી નિયમો હેઠળ નેટ એસેટ્સના 35% સુધી ઓવરસીઝ ઇક્વિટીઝ, વિદેશી ETFs અને ડેટ સિક્યોરિટીઝમાં એલોકેટ કરી શકાશે.

ઓછામાં ઓછું કેટલું રોકાણ કરવું પડશે?

• સેબી (SEBI) ના સ્પેશિયલાઇઝ્ડ ઇન્વેસ્ટમેન્ટ ફંડ (SIF) નિયમો હેઠળ આમાં રોકાણની મર્યાદા આ મુજબ છે:
• નવા રોકાણકારો માટે: લઘુત્તમ રોકાણ (Minimum Investment) રૂ. 10 લાખ રાખવામાં આવ્યું છે.
• હાલના મેગ્નમ SIF રોકાણકારો માટે: જો પાન (PAN) લેવલ પર તેમની કુલ મેગ્નમ SIF હોલ્ડિંગ ઓછામાં ઓછી રૂ. 10 લાખ છે, તો તેઓ પ્રતિ એપ્લિકેશન રૂ. 1 લાખથી પણ વધારાનું રોકાણ કરી શકે છે.

ફંડ મેનેજર, એક્ઝિટ લોડ અને ટેક્સેશન નિયમો

આ સ્ટ્રેટેજીનું સંચાલન ગૌરવ મહેતા કરશે, જેઓ SBI ની પહેલી SIF ઓફરિંગ ‘મેગ્નમ હાઇબ્રિડ લોંગ શોર્ટ ફંડ’ ને પણ મેનેજ કરે છે. એલોટમેન્ટના 3 મહિનાની અંદર યુનિટ્સ રિડીમ કે સ્વિચ કરવા પર 1% એક્ઝિટ લોડ લાગશે. 3 મહિના પૂરા થયા પછી નાણાં પાછા ખેંચવા પર કોઈ એક્ઝિટ લોડ લાગશે નહીં. વર્તમાન ટેક્સ નિયમો અનુસાર, 12 મહિનાથી વધુ સમય સુધી હોલ્ડ રાખેલી યુનિટ્સ પર મળતા લોંગ-ટર્મ કેપિટલ ગેઇન્સ (LTCG) પર 12.5% ટેક્સ (પ્લસ સરચાર્જ અને સેસ) લાગશે. એક નાણાકીય વર્ષમાં રૂ. 1.25 લાખ સુધીનો કેપિટલ ગેઇન સંપૂર્ણપણે ટેક્સ-ફ્રી રહેશે.

એસબીઆઈ ફંડ્સ મેનેજમેન્ટના એમડી અને સીઈઓ દેબાશીષ મિશ્રાના જણાવ્યા અનુસાર, ‘આ નવું ફંડ સંશોધન-આધારિત રોકાણ અને ભારતના વધી રહેલા બજારમાં રોકાણકારો માટે વૈવિધ્ય લાવવાના ઉદ્દેશ્યથી રજૂ કરવામાં આવ્યું છે.’ ઉલ્લેખનીય છે કે એપ્રિલ-જૂન 2026 ત્રિમાસિક ગાળા દરમિયાન એસબીઆઈ મ્યુચ્યુઅલ ફંડનું સરેરાશ એયુએમ (AAUM) રૂ. 12.57 લાખ કરોડથી વધુ રહ્યું છે.

ડિસ્ક્લેમર:

આ આર્ટિકલ માત્ર માહિતી આપવાના હેતુથી તૈયાર કરવામાં આવ્યો છે. આને કોઈ પણ પ્રકારની ઇન્વેસ્ટમેન્ટ કે શેર ખરીદવા-વેચવાની સલાહ માનવી નહીં. બજારમાં પૈસા રોકતા પહેલાં હંમેશા તમારા પ્રમાણિત નાણાકીય સલાહકારની મદદ અવશ્ય લો.