આજનું હવામાન : ચોમાસાની વિદાય પહેલા ભારે વરસાદનો વધુ એક રાઉન્ડ, જાણો ક્યાં બોલશે ધબધબાટી

ગુજરાતમાં ચોમાસું વિદાયની અણીએ છે પણ હવામાન વિભાગે ભારે વરસાદના વધુ એક રાઉન્ડની આગાહી કરી છે. રાજ્યના અનેક વિસ્તારોમાં આગામી એક સપ્તાહ વરસાદી માહોલ જોવા મળશે. ખાસ તો સૌરાષ્ટ્ર અને દક્ષિણ ગુજરાતના જિલ્લામાં ધોધમાર વરસાદ આવશે તેવી આગાહી કરવામાં આવી છે. ગયા અઠવાડિયે જ ભારે વરસાદના રાઉન્ડ બાદ હવે વધુ એક સિસ્ટમ સક્રિય થવાની સંભાવના હવામાન વિભાગે વ્યક્ત કરી છે.

ગુજરાતમાંથી ચોમાસાની વિદાયના એંધાણ છે પણ વરસાદનો તોફાની રાઉન્ડ કહેર મચાવશે. ગયા સપ્તાહે ગુજરાત સહિત દેશના અનેક ભાગોને વરસાદે ધમરોળી નાખ્યા. સંભવતઃ ચાલુ ચોમાસાની આ છેલ્લી મોટી સિસ્ટમ હતી. જેમાં ગુજરાત સહિત દેશના કેટલાક ભાગોમાં ભારેથી અત્યંત ભારે વરસાદ નોંધાયો. જો કે વધુ એક આગાહી હવામાન વિભાગે આપી છે.

આગામી 7 દિવસ વરસાદી માહોલ રહેશે

રાજ્યમાં આગામી 7 દિવસ વરસાદી માહોલ રહેશે. હવામાન વિભાગે આગાહી કરી છે કે એક સપ્તાહ માટે રાજ્યના અનેક વિસ્તારોમાં હળવાથી મધ્યમ વરસાદની શક્યતા છે. આગામી 16 સપ્ટેમ્બર સુધી રાજ્યના કેટલાક વિસ્તારોમાં ગાજવીજ સાથે વરસાદની શક્યતા સેવવામાં આવી છે. સાથે જ 40 કિલોમીટર પ્રતિ કલાકની ઝડપે પવન પણ ફૂંકાઇ શકે છે. હવામાન વિભાગનું માનવું છે કે સૌરાષ્ટ્રના કેટલાક ભાગો અને દક્ષિણ ગુજરાતમાં ભારે વરસાદ વરસી શકે છે. મહત્વનું છે કે મોન્સૂન ટ્રફ અને સાયક્લોનિક સરક્યુલેશન સક્રિય થતાં વરસાદ આવવાનું અનુમાન છે.

જાણો ક્યા વરસશે વરસાદ

દક્ષિણ સૌરાષ્ટ્ર અને દક્ષિણ ગુજરાતમાં ભારે વરસાદની આગાહીની વાત કરીએ તો સુરત, વલસાડ, નવસારી, તાપી, ડાંગ, દમણ, દાદરાનગર હવેલીમાં ધોધમાર વરસાદ આવશે. ભાવનગર, અમરેલી, ગીરસોમનાથ, જૂનાગઢમાં ભારે વરસાદની શક્યતા રહેલી છે. રાજ્યના અન્ય તમામ જિલ્લાઓમાં હળવાથી મધ્યમ વરસાદની આગાહી છે.મોન્સુન ટ્રફ અને સાયક્લોનિક સરક્યુલેશન સક્રિય થતા આગાહી આપવામાં આવી છે.

આમ બે દિવસમાં બંગાળની ખાડીમાં એક લો પ્રેશર સક્રિય થવાની સંભાવના છે. મહારાષ્ટ્ર, ગુજરાત સહિત કેટલાક ભાગોમાં ભારે વરસાદનું કારણ બની શકે છે. સાથે જ વેસ્ટર્ન ડિસ્ટર્બન્સના કારણે પણ કેટલાક વિસ્તારમાં વરસાદ થઈ શકે છે.

ગુજરાતના તમામ જિલ્લાના સમાચાર વાંચવા માટે અહીં ક્લિક કરો