રાહુલ ગાંધીના રાજા-મહારાજા અંગેના નિવેદન પર PM મોદીનો વળતો પ્રહાર, કહ્યું- શહેજાદામાં નવાબો સામે બોલવાની તાકાત નથી!

કર્ણાટકના બેલગવી પહોંચેલા વડાપ્રધાન નરેન્દ્ર મોદીએ કોંગ્રેસ નેતા રાહુલ ગાંધીના રાજા-મહારાજાઓ અંગેના નિવેદન પર નિશાન સાધ્યું છે. તેમણે કહ્યું કે કોંગ્રેસના રાજકુમાર કહે છે કે ભારતના રાજા મહારાજા જુલમી હતા. આ લોકો ગરીબોની જમીન છીનવી લેતા હતા. PMએ કહ્યું કે કોંગ્રેસના રાજકુમારે છત્રપતિ શિવાજી મહારાજ, કિત્તુરની રાણી ચેન્નમ્મા જેવા મહાન લોકોનું અપમાન કર્યું છે.

PMએ કહ્યું કે આ મહાન લોકોની દેશભક્તિ આજે પણ દરેકને પ્રેરણા આપે છે PM મોદીએ કહ્યું કે કોંગ્રેસ રાજકુમારનું નિવેદન વોટ બેંકની રાજનીતિ અને તુષ્ટિકરણ માટે વિચારીને આપવામાં આવ્યું છે. તેમણે કહ્યું કે ભારતમાં નવાબો, રાજાઓ અને સુલતાનો દ્વારા કરવામાં આવતા અત્યાચારો પર રાજકુમારનું મોઢું ચુપ રહે છે.