Ahmedabad : સતત ત્રીજા દિવસે ગટરમાં પડેલા કર્મચારીને શોધવા ફાયર બ્રિગેડના જવાનોએ તપાસ તેજ કરી

અમદાવાદની સાણંદ ચોકડી પાસે ગટરમાં પડેલા કર્મચારીને શોધવા ત્રીજા દિવસે ફાયર બ્રિગેડના જવાનોએ તપાસ તેજ કરી છે.  20 જાન્યુઆરીએ સાંજે 4 કલાકની આસપાસ રાજુ પરમાર ગટરમાં પડી ગયો. આ અંગેનો કોલ મળતા જ ફાયરના જવાનોએ સાણંદ ચોકડીથી 5 કિલોમીટર સુધીની ગટર લાઈનમાં તપાસ હાથ ધરી. ફાયર બ્રિગેડના જવાનોએ આસપાસમાં આવેલી ગટરના 4 ડ્રેનેજ પોઈન્ટ ચેક કર્યા.

STP પ્લાન્ટ સુધી કરેલી તપાસમાં પણ કોઈ ભાળ ન મળી

આ ઉપરાંત STP પ્લાન્ટ સુધી કરેલી તપાસમાં પણ ગુમ કર્મચારીની કોઈ ભાળ મળી નથી. ફાયર બ્રિગેડે અદ્યતન કેમેરાથી કરેલી તપાસમાં કોઈ ભાળ ન મળતા ગટરમાં પડેલો કર્મચારી ક્યાંક ફસાઈ ગયો હોવાની આશંકા છે.તો બીજી શક્યતા એ છે કે ગટરમાં પાણીનું વહેણ વધારે હોવાથી વ્યક્તિ આગળ તણાઈ ગયો હોઈ શકે. દુર્ઘટનાના કલાકો બાદ પાણી ભરાઈને ફૂલાઈ જવાથી બોડી ઉપર આવી જવું જોઈએ. પરંતુ બોડી ઉપર ન આવતા આ કર્મચારી ક્યાંક ફસાઈ ગયાની શક્યતા છે.