મોબાઇલ હોટસ્પોટ બનશે ઘરનું બ્રોડબેન્ડ Wi-Fi? એક જ રિચાર્જમાં બે કામ…!

શું તમે પણ મોબાઇલ ડેટા અને ઘરના બ્રોડબેન્ડ Wi-Fi માટે દર મહિને અલગ-અલગ રિચાર્જ કરાવો છો? જો તમારા મનમાં એવો વિચાર આવ્યો હોય કે ફોનના અનલિમિટેડ 5G ડેટાથી જ આખા ઘરનું Wi-Fi ચલાવી લેવામાં આવે તો બેવડો ખર્ચ બચી જાય, તો ટેકનિકલ દ્રષ્ટિએ આ શક્ય જરૂર છે. આજના સ્માર્ટફોનમાં હાઇ-સ્પીડ હોટસ્પોટ હોય છે અને ટેલિકોમ કંપનીઓ પણ અનલિમિટેડ 5G ના દાવા કરે છે. પરંતુ વાસ્તવિકતામાં આ માત્ર એક કામચલાઉ જુગાડ છે, જે લાંબા ગાળે સમસ્યાઓ સર્જી શકે છે.

ફોનને કાયમી રાઉટર બનાવવામાં કઈ અડચણો આવે છે?

• ફોનમાં 24 કલાક હોટસ્પોટ ચાલુ રાખવાથી બેટરી ખૂબ ઝડપથી ડિસ્ચાર્જ થાય છે અને ફોન સતત ગરમ થવાને કારણે તેની લાઇફ ઘટી જાય છે.
• જ્યારે ફોન પર સામાન્ય કોલ આવે છે ત્યારે મોટાભાગે હોટસ્પોટ કનેક્શન તૂટી જાય છે, જેથી સ્માર્ટ ટીવી કે લેપટોપ ડિસ્કનેક્ટ થઈ જાય છે.
• જ્યારે તમે ફોન લઈને ઘરની બહાર જાઓ છો ત્યારે ઘરમાં રહેલા અન્ય સભ્યો માટે ઇન્ટરનેટ સેવા તાત્કાલિક બંધ થઈ જાય છે.

અનલિમિટેડ ડેટા પાછળની વાસ્તવિકતા

મોબાઇલ કંપનીઓ તરફથી આપવામાં આવતો અનલિમિટેડ 5G ડેટા વાસ્તવમાં ફેયર યુસેજ પોલિસી (FUP) મર્યાદા સાથે આવે છે. મોટાભાગના પ્લાનમાં મહિનામાં 200 થી 300 GB સુધીનો જ વપરાશ માન્ય હોય છે. તેની સરખામણીએ બ્રોડબેન્ડ Wi-Fi માં દર મહિને 1 થી 3 TB કે તેથી વધુ ડેટા મળે છે. જો તમારા ઘરમાં 4K વિડિયો સ્ટ્રીમિંગ, ઓનલાઇન ગેમિંગ કે સતત ડાઉનલોડિંગ થતું હોય તો મોબાઇલનો ડેટા થોડા દિવસોમાં જ સમાપ્ત થઈ શકે છે.

રેન્જ અને ડિવાઇસ કનેક્ટિવિટીની સમસ્યા

સામાન્ય રાઉટરની સરખામણીએ મોબાઇલ હોટસ્પોટની નેટવર્ક રેન્જ ઘણી ઓછી હોય છે. આખા ઘરમાં મજબૂત સિગ્નલ મળતા નથી. એક સામાન્ય બ્રોડબેન્ડ રાઉટર સાથે 30 થી 50 ડિવાઇસ એકસાથે જોડાઈ શકે છે, જ્યારે મોબાઇલ હોટસ્પોટ સાથે 4 થી 5 થી વધુ ગેજેટ્સ જોડાતાં જ નેટવર્ક સ્પીડ ધીમી પડી જાય છે અને લેટન્સી વધી જાય છે.

કયા સંજોગોમાં આ સેટઅપ કામ આવી શકે?

• જો તમારી પાસે કોઈ જૂનો કે વધારાનો સ્પેર સ્માર્ટફોન હોય જેને કાયમ ઘરમાં ચાર્જિંગમાં રાખી શકાય.
• જો તમારા ઘરમાં ઇન્ટરનેટનો માસિક વપરાશ 200 GB થી ઓછો રહેતો હોય.
• જો ઘરમાં સ્માર્ટ ટીવી કે સીસીટીવી જેવા સતત ઇન્ટરનેટ વાપરતા ઉપકરણો ન હોય અને માત્ર 2 થી 3 મોબાઇલ જ કનેક્ટ કરવાના હોય.

જો ઘરમાં ઓફિસ વર્ક, અભ્યાસ અને સ્માર્ટ ઉપકરણોનો મોટો વપરાશ હોય તો અવિરત ઇન્ટરનેટ માટે બ્રોડબેન્ડ ફાઇબર Wi-Fi કનેક્શન જ સૌથી વધુ વિશ્વસનીય અને યોગ્ય વિકલ્પ ગણાય છે.