અનુવાદિની AIએ લોન્ચ કર્યું ‘Hyped Samvadini’ સુરક્ષિત મેસેજિંગ એપ, જાણો તેની ખાસિયત

અનુવાદિની AI એ “Hyped Samvadini” નામનું એક સુરક્ષિત મેસેજિંગ એપ અને સાથે “Desi AI GenZ Keyboard” લોન્ચ કર્યું છે. આ બંને ટૂલ્સ ખાસ કરીને પ્રાઇવસી, બહુભાષીય સપોર્ટ અને સ્પેમ કંટ્રોલ પર ધ્યાન કેન્દ્રિત કરે છે. Hyped Samvadiniમાં મોબાઇલ નંબર વગર ચેટિંગ કરવાની સુવિધા આપવામાં આવી છે, જેથી ફ્રોડ અને ઠગાઈથી બચી શકાય. બીજી તરફ, Desi AI GenZ Keyboard 22 પ્રાદેશિક ભાષાઓમાં ઝડપી ટાઇપિંગનો અનુભવ આપે છે.

ભારતમાં ડિજિટલ ક્ષેત્રમાં મોટો બદલાવ આવી રહ્યો છે. ડેટા પ્રાઇવસી અને વિદેશી સર્વર પર આધારિત સેવાઓ અંગે ચિંતાઓ વધી રહી છે. હાલમાં 80 કરોડથી વધુ લોકો વિદેશી પ્લેટફોર્મ્સ પર આધારિત કમ્યુનિકેશન ટૂલ્સનો ઉપયોગ કરે છે. આ વચ્ચે “ડિજિટલ અટકાયત” અને આર્થિક ઠગાઈ જેવી ઘટનાઓમાં વધારો થતો હોવાથી, સરકાર અને સ્થાનિક ટેક કંપનીઓ હવે સ્વદેશી સોલ્યુશન્સ તરફ આગળ વધી રહી છે.

મેસેન્જર અને Desi AI GenZ Keyboard

આ પડકારોને ધ્યાનમાં રાખીને અનુવાદિની AIએ ભારતીય વપરાશકર્તાઓ માટે ખાસ બે નવા પ્રોડક્ટ રજૂ કર્યા છે – Hyped Samvadini મેસેન્જર અને Desi AI GenZ Keyboard. ડેવલોપર્સનો દાવો છે કે આ એપ્સ “વિશ્વાસપાત્ર અને સ્વદેશી ડિજિટલ ઇકોસિસ્ટમ” બનાવશે, જે ભારતીય ભાષા અને સુરક્ષા જરૂરિયાતોને ધ્યાનમાં રાખીને તૈયાર કરવામાં આવી છે.

Hyped Samvadini એપમાં સૌથી ખાસ ફીચર છે Dynamic Chat ID. આ ફીચરની મદદથી તમે તમારો મોબાઇલ નંબર આપ્યા વગર પણ ચેટિંગ અને વિડિયો કોલ કરી શકો છો. આ ભારત જેવા દેશમાં ખૂબ ઉપયોગી છે, જ્યાં મોબાઇલ નંબર લીક થવાને કારણે સ્પેમ અને ઠગાઈ વધી રહી છે. ઉપરાંત, એપમાં “Request Module” છે, જેમાં અજાણ્યા લોકો પહેલા પરમિશન લઈને જ મેસેજ કરી શકે છે. WhatsApp Import ફીચર દ્વારા જૂના ચેટ્સ અને મીડિયા પણ સરળતાથી ટ્રાન્સફર કરી શકાય છે.

“One-Tap SOS” જેવી ઇમર્જન્સી સુવિધા

સુરક્ષાની દ્રષ્ટિએ આ એપમાં SIM અને Device Binding જેવી સુવિધાઓ છે. જો કોઈ વ્યક્તિ SIM બદલે અથવા કાઢવાનો પ્રયાસ કરે, તો તરત એલર્ટ મળે છે. આ ફીચર ખાસ કરીને એકાઉન્ટ હેકિંગથી બચાવવા માટે બનાવવામાં આવ્યું છે. સાથે જ “One-Tap SOS” જેવી ઇમર્જન્સી સુવિધા પણ આપવામાં આવી છે. ખેડૂતો માટે મંડિ ભાવ અને વૃદ્ધો માટે માર્ગદર્શન જેવી વિશેષ સેવાઓ પણ એપમાં સામેલ છે.

Desi AI GenZ Keyboard પણ એક મહત્વપૂર્ણ ટૂલ છે, જે 22 ભારતીય ભાષાઓ અને 70થી વધુ વૈશ્વિક ભાષાઓને સપોર્ટ કરે છે. આ કીબોર્ડમાં Devanagari, Bengali, Ol Chiki અને Sanskrit જેવા સ્ક્રિપ્ટ્સ માટે ખાસ લેઆઉટ છે. આ કીબોર્ડ on-device processing પર કામ કરે છે, એટલે કે તમારી ટાઇપિંગ ડેટા તમારા ફોનમાં જ સુરક્ષિત રહે છે.

યુવાનો માટે “GenZ Key” નામનું ખાસ ફીચર પણ ઉમેરવામાં આવ્યું છે, જેમાં લોકપ્રિય slang શબ્દો જેમ કે Rizz અને Delulu ઝડપથી ટાઇપ કરી શકાય છે. સાથે જ કીબોર્ડમાં કેલ્ક્યુલેટર અને કરન્સી કન્વર્ટર જેવી સુવિધાઓ પણ આપવામાં આવી છે, જેથી યુઝર્સને અલગ એપ ખોલવાની જરૂર ન પડે.