Cricket: ‘WTC 2025-27’નું શેડ્યૂલ જાહેર, જાણો ભારતીય યુવા બ્રિગેડ ક્યારે અને કોની સામે રમશે?
ઇન્ટરનેશનલ ક્રિકેટ કાઉન્સિલ (ICC)એ વર્લ્ડ ટેસ્ટ ક્રિકેટ ચેમ્પિયનશિપ (WTC) '2025-27'ના શેડ્યૂલની જાહેરાત કરી છે. આમાં નવ ટીમો વચ્ચે કુલ 71 મેચ રમાશે. આ WTCની પ્રથમ મેચ 17 જૂનથી ગાલેમાં રમાશે. જણાવી દઈએ કે, WTCની પ્રથમ મેચ શ્રીલંકા અને બાંગ્લાદેશ વચ્ચે રમાશે.
દક્ષિણ આફ્રિકાએ વર્લ્ડ ટેસ્ટ ચેમ્પિયનશિપ (WTC) 2023-25નો ખિતાબ જીત્યાના એક દિવસ પછી, આંતરરાષ્ટ્રીય ક્રિકેટ કાઉન્સિલે (ICC) WTC ‘2025-27’ના શેડ્યૂલની જાહેરાત કરી છે. આમાં 9 ટીમો વચ્ચે કુલ 71 મેચ રમાશે, જે 17 જૂનથી શરૂ થવા જઈ રહી છે.
પ્રથમ મેચ શ્રીલંકા અને બાંગ્લાદેશ વચ્ચે શ્રીલંકાના ગાલેમાં રમાશે. શેડ્યૂલ મુજબ, ઓસ્ટ્રેલિયા આ વખતે સૌથી વધુ 22 મેચ રમશે, જ્યારે ઇંગ્લેન્ડે 21 મેચ રમવાની રહેશે. બંને ટીમો આ વર્ષના અંતમાં એશિઝ સિરીઝ દરમિયાન એકબીજા સામે ટકરાશે. બીજીબાજુ ટીમ ઇન્ડિયા 20 જૂનથી ઇંગ્લેન્ડ સામે રમાનારી પ્રથમ ટેસ્ટથી પોતાના અભિયાનની શરૂઆત કરશે. જણાવી દઈએ કે, આ મેચ લીડ્સમાં રમાશે.
WTC 2027 BEGINS ON JUNE 17, TUESDAY pic.twitter.com/wPiNnUWvnL
— Johns. (@CricCrazyJohns) June 14, 2025
ભારત કેટલી મેચ રમશે?
શુભમન ગિલના નેતૃત્વ હેઠળની ટીમ ઈન્ડિયા WTC 2025-27 દરમિયાન કુલ 18 ટેસ્ટ મેચ રમશે. ટીમ ઈન્ડિયા વેસ્ટ ઈન્ડિઝ, દક્ષિણ આફ્રિકા અને ઓસ્ટ્રેલિયા સામે ઘરઆંગણે ટેસ્ટ સિરીઝ રમશે. આ ઉપરાંત, તે શ્રીલંકા અને ન્યુઝીલેન્ડના પ્રવાસ પર પણ ટેસ્ટ મેચ રમવા જશે.
WTC 2023-25માં, ટીમ ઈન્ડિયા ત્રીજા સ્થાને રહી હતી પરંતુ આ વખતે તેની મોટાભાગની મેચો ઘરઆંગણે છે, તેથી તે કોઈપણ કિંમતે તમામ મેચો જીતવા માંગશે. ટીમ ઈન્ડિયાનો સૌથી મોટો પડકાર ઓસ્ટ્રેલિયા છે. ઓસ્ટ્રેલિયાને આ વખતે ભારત પ્રવાસ કરવાનો છે. ટીમ ઈન્ડિયા ઓસ્ટ્રેલિયા સામે પાંચ ટેસ્ટ મેચની સિરીઝ જીતીને પાછલી હારનો બદલો લેવા માંગશે.
ડિફેન્ડિંગ ચેમ્પિયન પર સૌની નજર
ડિફેન્ડિંગ ચેમ્પિયન દક્ષિણ આફ્રિકા ઓક્ટોબરમાં પોતાનું અભિયાન શરૂ કરશે. તેઓ પાકિસ્તાનમાં એક ટેસ્ટ સિરીઝ રમશે, જ્યારે દક્ષિણ આફ્રિકાની ટીમ ઓસ્ટ્રેલિયા સામે ઘરઆંગણે ત્રણ ટેસ્ટ મેચની સિરીઝ રમશે.
વર્લ્ડ ટેસ્ટ ચેમ્પિયનશિપ 2025-27માં, ફક્ત ઇંગ્લેન્ડ અને ઓસ્ટ્રેલિયા 5-5 મેચ રમશે, જે ટીમ ઇન્ડિયા કરતા વધુ છે. WTC દરમિયાન, ઓસ્ટ્રેલિયા મહત્તમ 22 ટેસ્ટ મેચ રમશે, જ્યારે ઇંગ્લેન્ડ 21 ટેસ્ટ મેચ રમશે. આ ઉપરાંત, ન્યુઝીલેન્ડ 16, વેસ્ટ ઇન્ડીઝ 14, દક્ષિણ આફ્રિકા 14, પાકિસ્તાન 13, શ્રીલંકા 12 અને બાંગ્લાદેશ 12 ટેસ્ટ મેચ રમશે.
ક્રિકેટ સહિત રમતગમતના દરેક સમાચાર વાંચવા અહીં ક્લિક કરો
