Sachin Tendulkar એ 32 વર્ષ પહેલા આજના દિવસે ફટકારી હતી પહેલી ટેસ્ટ સદી, 17 વર્ષની ઉંમરે કર્યું અદ્ભુત કામ

ક્રિકેટના ભગવાન સચિન તેંડુલકર (Sachin Tendulkar) એ પોતાની કારકિર્દી દરમિયાન ઘણી શાનદાર ઇનિંગ્સ રમી હતી. પરંતુ તેમના માટે 14 ઓગસ્ટનો દિવસ હંમેશા ખાસ રહેશે. માસ્ટર બ્લાસ્ટર સચિન તેંડુલકર તેની ટેસ્ટ કારકિર્દીની પ્રથમ સદી આજથી બરાબર 32 વર્ષ પહેલા  એટલે કે 14 ઓગસ્ટ 2022 ના રોજ ફટકારી હતી. તેણે માન્ચેસ્ટર ખાતે રમાયેલી ટેસ્ટ મેચમાં સદી ફટકારી ને ભારત માટે મહત્વની ઇનિંગ રમી હતી. ઈંગ્લેન્ડ સામે રમાયેલી મેચ ડ્રો માં સમાપ્ત થઈ હતી. ડ્રોમાં સચિનની ઇનિંગ્સે મહત્વની ભૂમિકા ભજવી હતી.

સચિને ફટકારેલી પહેલી ટેસ્ટ સદીની એ મેચ ડ્રો રહી હતી

મોહમ્મદ અઝહરુદ્દીન (Mohammad Azharuddin) ની કપ્તાની હેઠળ ભારતીય ટીમ 1990 માં ઈંગ્લેન્ડના પ્રવાસે ગઈ હતી. આ દરમિયાન ટેસ્ટ શ્રેણીની બીજી મેચ માન્ચેસ્ટરના ઓલ્ડ ટ્રેફોર્ડ ખાતે રમાઈ હતી. જેમાં ઈંગ્લેન્ડે પ્રથમ દાવમાં 519 અને 320 રન બનાવીને બીજી ઈનિંગ ડિકલેર કરી હતી. જ્યારે ભારતે પ્રથમ દાવમાં 432 રન અને બીજા દાવમાં 6 વિકેટ ગુમાવીને 343 રન બનાવ્યા હતા. આ મેચ ડ્રોમાં સમાપ્ત થઈ હતી.

સચિને પોતાની પહેલી ટેસ્ટ સદી છઠ્ઠા ક્રમ પર ફટકારી હતી

ભારતીય ટીમના માસ્ટર બ્લાસ્ટર એવા સચિન તેંડુલકર (Sachin Tendulkar) એ બીજી ઇનિંગમાં ભારત માટે મહત્વની ભૂમિકા ભજવી હતી. તેણે 189 બોલ માં અણનમ 119 રન બનાવ્યા હતા. સચિનની ઇનિંગમાં 17 ચોગ્ગા સામેલ હતા. મહત્વની વાત એ હતી કે તે 6 નંબર પર બેટિંગ કરવા આવ્યો હતો અને એક છેડે મજબૂત રીતે રમી રહ્યો હતો. પરંતુ સમય પૂરો થવાને કારણે મેચ ડ્રો રહી હતી.