માત્ર 18 બોલમાં આ ટીમે T20 મેચ જીતી, વિરોધી ટીમનો કોઈ બેટ્સમેન ડબલ ફિગરને પણ સ્પર્શી શક્યો નહીં
સૈયદ મુશ્તાક અલી ટ્રોફી 2024ની મેચમાં બોલરોનો દબદબો જોવા મળ્યો હતો. આ મેચમાં એક ટીમ માત્ર 9.1 ઓવર જ રમી શકી અને 32 રન બનાવીને ઓલઆઉટ થઈ ગઈ. વિરોધી ટીમે માત્ર 18 બોલમાં લક્ષ્યનો પીછો કરીને એક મોટો રેકોર્ડ બનાવ્યો.
સૈયદ મુશ્તાક અલી ટ્રોફી 2024 હાલમાં ભારતીય સ્થાનિક ક્રિકેટમાં રમાઈ રહી છે. 38 ટીમો વચ્ચે રમાઈ રહેલી આ ટુર્નામેન્ટમાં ઘણા મોટા ખેલાડીઓ રમી રહ્યા છે. ચાહકોને આ ટૂર્નામેન્ટમાં ઘણી હાઈ સ્કોરિંગ મેચ જોવા મળી રહી છે. પરંતુ અરુણાચલ પ્રદેશ અને જમ્મુ કાશ્મીર વચ્ચે રમાયેલી મેચમાં તેનાથી વિપરીત જોવા મળ્યું હતું. આ મેચમાં બંને ટીમો એકસાથે 20 ઓવર પણ રમી શકી ન હતી, જે દરમિયાન સૈયદ મુશ્તાક અલી ટ્રોફીની સૌથી મોટી જીતનો રેકોર્ડ પણ તૂટી ગયો હતો.
આખી ટીમ 32 રનમાં ઓલઆઉટ
અરુણાચલ પ્રદેશ અને જમ્મુ કાશ્મીરની ટીમો વચ્ચેની આ મેચ શરદ પવાર ક્રિકેટ એકેડમી BKC, મુંબઈમાં રમાઈ હતી. આ મેચમાં જમ્મુ-કાશ્મીરની ટીમે 10 વિકેટે જીત મેળવી હતી. આ મેચમાં અરુણાચલ પ્રદેશે ટોસ જીતીને પ્રથમ બેટિંગ કરવાનો નિર્ણય લીધો હતો જે સંપૂર્ણપણે ખોટો સાબિત થયો હતો. આ દરમિયાન અરુણાચલ પ્રદેશની ટીમ માત્ર 9.1 ઓવર જ રમી શકી અને 32 રન બનાવીને ઓલઆઉટ થઈ ગઈ. તમને જણાવી દઈએ કે, આ ઈનિંગ દરમિયાન અરુણાચલ પ્રદેશની ટીમનો કોઈ પણ બેટ્સમેન ડબલ ફિગરને સ્પર્શી શક્યો નહોતો. આ ઈનિંગમાં અભિષેક પૂજારીએ સૌથી વધુ 5 અણનમ રન બનાવ્યા હતા. જ્યારે જમ્મુ-કાશ્મીર તરફથી આબિદ મુશ્તાકે સૌથી વધુ 4 વિકેટ લીધી હતી.
ટૂર્નામેન્ટનો બીજો સૌથી ઓછો સ્કોર
આ મેચમાં અરુણાચલ પ્રદેશે પણ શરમજનક રેકોર્ડ પોતાના નામે કર્યો હતો. સૈયદ મુશ્તાક અલી ટ્રોફીના ઈતિહાસમાં આ બીજો સૌથી ઓછો સ્કોર છે. આ પહેલા વર્ષ 2009માં ત્રિપુરાની ટીમ ઝારખંડ સામે માત્ર 30 રનમાં પડી ગઈ હતી. એટલે કે અરુણાચલ પ્રદેશની ટીમ આ રેકોર્ડ તોડવામાંથી બચી ગઈ. આ બે ટીમો સિવાય આ ટૂર્નામેન્ટમાં અન્ય કોઈ ટીમ 40 રનથી ઓછા સ્કોર પર ઓલઆઉટ થઈ નથી.
માત્ર 18 બોલમાં મેચ જીતી લીધી
અરુણાચલ પ્રદેશના આ ખરાબ પ્રદર્શનને કારણે જમ્મુ-કાશ્મીરને આ મેચ જીતવા માટે માત્ર 33 રનનો ટાર્ગેટ મળ્યો હતો. જમ્મુ-કાશ્મીરે નાના ટાર્ગેટનો પીછો કરવામાં વધુ સમય ન લીધો અને માત્ર 3 ઓવરમાં જ મેચ પૂરી કરી દીધી. આ દરમિયાન યુદ્ધવીર સિંહે 11 બોલમાં અણનમ 21 રન બનાવ્યા હતા. જ્યારે કામરાન ઈકબાલ 10 રન બનાવીને અણનમ રહ્યો હતો. એટલે કે જમ્મુ અને કાશ્મીરની ટીમે 102 બોલ બાકી રહેતા આ મેચ જીતી લીધી, જે બોલની દ્રષ્ટિએ સૈયદ મુશ્તાક અલી ટ્રોફીની સૌથી મોટી જીત છે. અગાઉ વર્ષ 2009માં ઝારખંડે ત્રિપુરાને 100 બોલ બાકી રાખીને હરાવ્યું હતું.
આ પણ વાંચો: Video: શોટ માર્યાના 2 સેકન્ડ બાદ બેટ્સમેન ક્લીન બોલ્ડ ! ક્રિકેટના મેદાનમાં આવું ક્યારેય નહીં જોયું હોય
