AFG vs NZ ટેસ્ટનો પહેલો દિવસ બરબાર, મેદાન ન સુકાતા ખેલાડીઓ-કોચ થયા નારાજ
વરસાદ ન હોવા છતાં ન્યુઝીલેન્ડ-અફઘાનિસ્તાન ટેસ્ટનો પ્રથમ દિવસ બરબાદ થયો હતો. પ્રથમ દિવસે મેદાન સુકાઈ શક્યું ન હતું અને ટોસ પણ થઈ શક્યો ન હતો. અફઘાનિસ્તાન ક્રિકેટ ટીમનો એક અધિકારી ગુસ્સે થઈ ગયો અને તેણે ત્યાં સુધી કહ્યું કે હવે તેની ટીમ ક્યારેય આ મેદાન પર નહીં આવે.
અફઘાનિસ્તાન અને ન્યુઝીલેન્ડ વચ્ચેની ટેસ્ટ મેચનો પ્રથમ દિવસ મેદાનમાં ભીનાશને કારણે ધોવાઈ ગયો હતો. સોમવારે વરસાદનું એક ટીપું પણ પડ્યું ન હતું પરંતુ તેમ છતાં એક પણ બોલ ફેંકી શકાયો નહોતો. ગ્રેટર નોઈડા સ્ટેડિયમની તૈયારીઓથી અફઘાનિસ્તાનની ટીમ અને અધિકારીઓ નાખુશ હતા અને ACBના અધિકારીએ તો એમ પણ કહ્યું હતું કે તે આ મેદાન પર ક્યારેય પાછા ફરવા માંગશે નહીં.
ખેલાડીઓ-કોચ નારાજ
શહીદ વિજયસિંહ પથિક સ્પોર્ટ્સ કોમ્પ્લેક્સમાં ખરાબ ડ્રેનેજ સિસ્ટમ, ભીનું આઉટફિલ્ડ અને દયનીય સુવિધાઓથી નારાજ ACB અધિકારીએ જણાવ્યું હતું કે અહીં ઘણી અવ્યવસ્થા છે, ખેલાડીઓ અહીંની સુવિધાઓથી નારાજ છે. તેમણે કહ્યું કે ખેલાડીઓ અહીં ક્યારેય પાછા નહીં આવે.
આખું મેદાન મેચ રમવા માટે યોગ્ય નથી
સામાન્ય રીતે વરસાદ પછી મેદાનનો અમુક ભાગ જ ભીનો થઈ જાય છે, પરંતુ ગ્રેટર નોઈડા સ્ટેડિયમના મેદાનમાં ઘણી જગ્યાએ ભીના પેચ જોવા મળ્યા હતા. રિપોર્ટ અનુસાર, અમ્પાયરોએ આખા દિવસમાં છ વખત મેદાનનું નિરીક્ષણ કર્યું. કેપ્ટન ટિમ સાઉથી, ઓલરાઉન્ડર મિશેલ સેન્ટનર અને રચિન રવિન્દ્ર સહિત ન્યુઝીલેન્ડના ઘણા ખેલાડીઓ પણ મેદાનનું નિરીક્ષણ કરવા આવ્યા હતા. પરંતુ મિડ-ઓન અને મિડ-વિકેટ પર પાણી ચિંતાનો વિષય હતું, જ્યારે 30-યાર્ડ સર્કલની અંદર પણ ઘણા પેચ હતા.
સુપર સોપર્સનો મોડો ઉપયોગ
ગ્રેટર નોઈડા સ્ટેડિયમમાં સુપર સોપર્સનો ઉપયોગ પણ વિલંબિત થયો હતો. અહેવાલ મુજબ, તેનો ઉપયોગ બપોરે 1 વાગ્યા પછી શરૂ થયો. અફઘાનિસ્તાનના કોચ જોનાથન ટ્રોટ સમગ્ર વ્યવસ્થાથી ખૂબ નાખુશ દેખાતા હતા. જેના કારણે બંને ટીમોની પ્રેક્ટિસ પણ પ્રભાવિત થઈ હતી. ગ્રાઉન્ડ સ્ટાફે અફઘાનિસ્તાનના તાલીમ સત્ર માટે મેદાનને સૂકવવા માટે ટેબલ ફેનનો ઉપયોગ કર્યો હતો. હવે મંગળવારથી સવારે 9 વાગ્યે ટોસનો સમય નક્કી કરવામાં આવ્યો છે અને બાકીના ચાર દિવસમાં 98 ઓવરની રમત હશે જે સવારે 10 વાગ્યાને બદલે 9.30 વાગ્યે શરૂ થશે.
2016માં છેલ્લી વખત મેચ રમાઈ હતી
ગ્રેટર નોઈડાના આ સ્ટેડિયમમાં BCCI હેઠળ કેટલાય સમયથી કોઈ મેચ રમાઈ નથી. આ મેદાન પર છેલ્લી વખત 2016માં દુલીપ ટ્રોફી મેચ રમાઈ હતી. જોકે, કોર્પોરેટ મેચો દરમિયાન મેચ ફિક્સિંગના કારણે સપ્ટેમ્બર 2017માં BCCI દ્વારા તેના પર પ્રતિબંધ મૂકવામાં આવ્યો હતો. ત્યારથી અહીં BCCI સંબંધિત કોઈ મેચનું આયોજન કરવામાં આવ્યું નથી.
આ પણ વાંચો: IND vs BAN: બાંગ્લાદેશ સામે પ્લેઈંગ ઈલેવનમાં સરફરાઝ ખાનની જગ્યાએ આ અનુભવી ખેલાડીને મળશે સ્થાન!
ક્રિકેટ સહિત રમતગમતના દરેક સમાચાર વાંચવા અહીં ક્લિક કરો
