IPL 2024 : રોહિત શર્મા જૂઠું બોલ્યો ? સ્ટાર સ્પોર્ટ્સે ભારતીય કેપ્ટનને આપ્યો જવાબ
રોહિત શર્માનો ઓડિયો ઓન એર કરવાનો મામલો હવે આગળ વધી ગયો છે. સ્ટાર સ્પોર્ટ્સે ભારતીય કેપ્ટનને જવાબ આપતા કહ્યું છે કે ચેનલે ન તો તેનો કોઈ ઓડિયો રેકોર્ડ કર્યો છે કે ન તો પ્લે કર્યો છે. તો સવાલ એ છે કે શું રોહિત શર્મા જૂઠું બોલ્યો, શું તેણે ભૂલ કરી?
![IPL 2024 : રોહિત શર્મા જૂઠું બોલ્યો ? સ્ટાર સ્પોર્ટ્સે ભારતીય કેપ્ટનને આપ્યો જવાબ](https://images.tv9gujarati.com/wp-content/uploads/2024/05/Rohit-Sharma-3-1.jpg?w=1280)
રોહિત શર્મા અને સ્ટાર સ્પોર્ટ્સનો મામલો હવે અલગ સ્તરે પહોંચતો જણાય છે. રોહિત શર્માએ આરોપ લગાવ્યો હતો કે TRP માટે તેની અંગત વાતચીત પણ પ્રસારિત કરવામાં આવી હતી જ્યારે તેણે તેનો ઈનકાર કર્યો હતો, પરંતુ હવે સ્ટાર સ્પોર્ટ્સે ટીમ ઈન્ડિયાના કેપ્ટનને જવાબ આપ્યો છે. સ્ટાર સ્પોર્ટ્સે એક નિવેદન જાહેર કર્યું છે જેમાં તેઓએ રોહિત શર્માના આરોપોને સ્પષ્ટપણે નકારી કાઢ્યા છે. સ્ટાર સ્પોર્ટ્સે કહ્યું છે કે તેઓએ રોહિત શર્માનો કોઈ ઓડિયો ઓન એર પ્લે કર્યો નથી.
સ્ટાર સ્પોર્ટ્સે શું કહ્યું?
સ્ટાર સ્પોર્ટ્સે રોહિત શર્માને જવાબ આપતા કહ્યું, ‘રોહિત શર્માની વાતચીતની ક્લિપ 16 મે, વાનખેડે સ્ટેડિયમની છે. સ્ટાર સ્પોર્ટ્સ પાસે તે ક્લિપ પ્રસારિત કરવાનો અધિકાર હતો. તે વીડિયોમાં રોહિત શર્મા તેના મિત્રો સાથે વાત કરી રહ્યો હતો. અમે તે ક્લિપનો કોઈ ઓડિયો કે વાર્તાલાપ ન તો રેકોર્ડ કર્યો કે ન તો તેનું પ્રસારણ કર્યું. તે વીડિયોનો ઉપયોગ માત્ર પ્રી-શો માટે કરવામાં આવ્યો હતો પરંતુ તેમાં કોઈ ઓડિયો રેકોર્ડ નહોતો.
રોહિતે સ્ટાર સ્પોર્ટ્સ પર આરોપો લગાવ્યા હતા
તમને જણાવી દઈએ કે રોહિત શર્માનો વીડિયો અને ઓડિયો KKR દ્વારા તેના સોશિયલ મીડિયા હેન્ડલ પર પોસ્ટ કરવામાં આવ્યો હતો. તે વીડિયોના વિવાદ બાદ KKRએ તેને સોશિયલ મીડિયા પરથી ડિલીટ કરી દીધો હતો. આ ઓડિયોથી રોહિત શર્માને ઘણી સમસ્યા થઈ હતી અને તેથી જ તેણે સોશિયલ મીડિયા પર સ્ટાર સ્પોર્ટ્સ પર સીધા મોટા આરોપો લગાવ્યા હતા. જોકે, ચેનલે સ્પષ્ટ કહ્યું છે કે તે ખેલાડીઓની પ્રાઈવસીનું સન્માન કરે છે.
રોહિત શર્માએ શું કહ્યું?
રોહિત શર્માએ સ્ટાર સ્પોર્ટ્સ વિરુદ્ધ ટ્વિટ કરીને આરોપ લગાવ્યો હતો કે હવે ક્રિકેટ ખેલાડીઓના અંગત જીવનમાં પણ ઘૂસણખોરી થઈ રહી છે. કેમેરા હવે બધું રેકોર્ડ કરી રહ્યા છે, પછી ભલે તે મેચનો દિવસ હોય કે ટ્રેનિંગનો દિવસ. રોહિતે કહ્યું કે મેં સ્ટાર સ્પોર્ટ્સને આ વાતચીત રેકોર્ડ કરવાની મનાઈ કરી હતી પરંતુ તેમ છતાં ચેનલે તેને ઓન એર પ્લે કર્યો જે ગોપનીયતાનું ઉલ્લંઘન છે.
આ પણ વાંચો : BCCI સેક્રેટરી જય શાહે કમાલ કરી બતાવી, હજારો ભારતીય ક્રિકેટરો તેમના માટે જીવનભર પ્રાર્થના કરશે