IPL 2022 Puprle Cap: ઉમેશ યાદવ પર્પલ કેપમાં સૌથી આગળ, અવેશ ખાન કે કુલદીપ યાદવ હજુ પણ આટલા દુર

IPL 2022 Puprle Cap in Gujarati: દિલ્હી અને લખનૌ વચ્ચેની મેચમાં કોઈ બોલર વધારે વિકેટ લઈ શક્યો ન હતો અને તેના કારણે ઉમેશ યાદવ પ્રથમ સ્થાન માટેનો વધારે પડકાર મેળવી શક્યો ન હતો.

Umesh Yadav એ સિઝનમાાં 9 વિકેટ મેળવી છે

TV9 Gujarati | Edited By: Avnish Goswami | Updated on: Apr 08, 2022 | 9:24 AM

IPL 2022 તેના અંદાજ મુજબ જ આગળ વધી રહી છે. જોકે હાલમાં અહીં વાત મેચોના પરિણામ અને પોઈન્ટ ટેબલની નથી, પરંતુ બોલરોના પ્રદર્શનની છે. ગત સિઝનની જેમ આ વખતે પણ ભારતીય બોલરો ટૂર્નામેન્ટમાં સૌથી વધુ વિકેટ ઝડપનારા બોલરોની રેસમાં ટોચ પર છે. ગયા વર્ષે હર્ષલ પટેલે સૌથી વધુ વિકેટો માટે પર્પલ કેપ (IPL Purple Cap) જીતી હતી, તેથી આ વખતે ઉમેશ યાદવ (Umesh Yadav) સૌથી આગળ છે. ગયા વર્ષની જેમ આ વખતે પણ યુવા ફાસ્ટ બોલર અવેશ ખાન (Avesh Khan) મજબૂત રીતે આગળ વધી રહ્યો છે. જોકે, તેણે ઉમેશને પાછળ છોડવાની તક ગુમાવી દીધી હતી. લખનૌ સુપર જાયન્ટ્સના આ ફાસ્ટ બોલરને દિલ્હી કેપિટલ્સ સામેની મેચમાં કોઈ સફળતા મળી ન હતી.

અવેશ ખાન ગુરુવારે 7 એપ્રિલે તેની જૂની ટીમ દિલ્હી કેપિટલ્સ સામે સારું પ્રદર્શન કરી શક્યો ન હતો અને ખાલી હાથે પાછો ફર્યો હતો. એટલું જ નહીં, પૃથ્વી શૉએ ખાસ કરીને તેને જોરદાર ધુલાઈ કરી હતી. હાલત એવી હતી કે તે પોતાનો સ્પેલ પણ પૂરો કરી શક્યો ન હતો અને 3 ઓવરમાં 32 રન આપી દીધા હતા. આ કારણે તે 7 વિકેટ પર અટકી ગયો અને ત્રીજા સ્થાને રહ્યો છે. બીજી તરફ કોલકાતા નાઈટ રાઈડર્સનો સ્ટાર ઝડપી બોલર ઉમેશ યાદવ હજુ પણ 9 વિકેટ સાથે પ્રથમ સ્થાન પર છે. બીજા સ્થાને યુઝવેન્દ્ર ચહલ છે, જેની 7 વિકેટ છે.

કુલદીપ યાદવને ફાયદો થશે

લખનૌ અને દિલ્હી વચ્ચેની મેચમાં બંને ટીમોની માત્ર 7 વિકેટ પડી હતી, જેમાં દિલ્હીની 3 વિકેટ પેવેલિયન પરત ફરી હતી. જેમાં કૃષ્ણપ્પા ગૌતમને એક વિકેટ મળી હતી જ્યારે લેગ સ્પિનર રવિ બિશ્નોઈને બે વિકેટ મળી હતી. આ સિઝનમાં ગૌતમની આ માત્ર પ્રથમ વિકેટ હતી, જ્યારે બિશ્નોઈની 4 મેચમાં ચોથી વિકેટ હતી. આ સાથે જ દિલ્હી તરફથી કુલદીપ યાદવે બે વિકેટ ઝડપી હતી અને હવે તેને 6 વિકેટ મળી છે અને તે યાદીમાં પાંચમા નંબરે આવી ગયો છે. તેમના સિવાય દિલ્હી તરફથી લલિત યાદવ અને શાર્દુલ ઠાકુરે એક-એક વિકેટ લીધી હતી, પરંતુ આ બંને અત્યારે રેસમાં ક્યાંય નથી.

હર્ષલ પટેલ ક્યાં છે?

ગત સિઝનમાં રોયલ ચેલેન્જર્સ બેંગ્લોરના મીડિયમ પેસર હર્ષલ પટેલે સૌથી વધુ 32 વિકેટ સાથે પર્પલ કેપ જીતી હતી. આ સિઝનમાં પણ તેની બોલિંગ સારી ચાલી રહી છે. જો કે તેને વિકેટના મોરચે વધુ સફળતા મળી નથી અને 3 મેચમાં તેના ખાતામાં માત્ર 4 વિકેટ જ મળી છે, પરંતુ તે ખૂબ જ કરસકર ભરી બોલિંગ કરી રહ્યો છે, જે બેંગલોરને રન પર લગામ લગાવવામાં મદદ કરી રહ્યો છે. હર્ષલે આ સિઝનમાં અત્યાર સુધી 12 ઓવરની બોલિંગમાં માત્ર 5.41ની સરેરાશ થી જ રન જ ખર્ચ્યા છે.