ICC T20 World Cup Breaking News: નેધરલેન્ડની નામિબિયા સામે 7 વિકેટે શાનદાર જીત, પોઈન્ટ્સ ટેબલમાં પાકિસ્તાનને પછાડ્યું

દિલ્હીના અરુણ જેટલી ક્રિકેટ સ્ટેડિયમમાં નેધરલેન્ડે નામિબિયા સામેની મેચ 7 વિકેટે જીતી લીધી છે. આ જીત સાથે જ નેધરલેન્ડે પોઈન્ટ ટેબલમાં પાકિસ્તાનને પાછળ છોડી દીધું છે.

Image Credit source: PTI

Ravi Prajapati | Updated on: Feb 10, 2026 | 3:10 PM

નામિબિયાએ 12 ફેબ્રુઆરીએ ટીમ ઈન્ડિયા સામે ટકરાવાનું છે પરંતુ તે પહેલા નેધરલેન્ડ સામે તેને કારમી હારનો સામનો કરવો પડ્યો છે. દિલ્હીના અરુણ જેટલી સ્ટેડિયમમાં રમાયેલી મેચમાં નેધરલેન્ડે નામિબિયાને 7 વિકેટે હરાવ્યું હતું. આ જ મેદાન પર નામિબિયાની ટીમ ભારત સામે પણ રમશે. મહત્વની વાત એ છે કે, નામિબિયાને હરાવવાની સાથે જ નેધરલેન્ડે પોઈન્ટ ટેબલમાં પાકિસ્તાનને પણ પછાડી દીધું છે.

નેધરલેન્ડની ‘દમદાર’ શરૂઆત

નામિબિયા દ્વારા આપવામાં આવેલા 157 રનના લક્ષ્યનો પીછો કરતા નેધરલેન્ડની શરૂઆત સારી રહી નહોતી. પાવરપ્લેમાં જ ટીમે 2 વિકેટ ગુમાવી દીધી હતી પરંતુ ત્યારબાદ બાસ ડી લીડે શાનદાર બેટિંગ કરી હતી. તેણે તોફાની અડધી સદી ફટકારવાની સાથે કોલિન એકરમેન અને સ્કોટ એડવર્ડ્સ સાથે મજબૂત ભાગીદારી કરી હતી.

‘બાસ ડી લીડે’ની આક્રમક બેટિંગ

બાસ ડી લીડે 150ના સ્ટ્રાઈક રેટથી 48 બોલમાં અણનમ 72 રન બનાવ્યા હતા. તેણે આ ઇનિંગમાં 5 ચોગ્ગા અને 4 છગ્ગા ફટકાર્યા હતા. ડી લીડના T20 ઇન્ટરનેશનલ કરિયરની આ ચોથી અડધી સદી છે. આ ઇનિંગ દરમિયાન તેણે ત્રીજી વિકેટ માટે એકરમેન સાથે 70 રનની ભાગીદારી કરી હતી અને ત્યારબાદ ચોથી વિકેટ માટે કેપ્ટન સ્કોટ એડવર્ડ્સ સાથે મળીને અણનમ 43 રન જોડ્યા હતા. પરિણામે નેધરલેન્ડે 157 રનનો લક્ષ્યાંક 18મી ઓવરમાં જ હાંસલ કરી લીધો હતો.

આ પહેલા નામિબિયાએ પ્રથમ બેટિંગ કરતા 20 ઓવરમાં 8 વિકેટે 156 રન બનાવ્યા હતા. નામિબિયા તરફથી કોઈ પણ બેટ્સમેન અડધી સદી ફટકારી શક્યો નહોતો, સૌથી વધુ 42 રન નિકોલ લોફ્ટીએ બનાવ્યા હતા. નેધરલેન્ડ માટે બેટિંગમાં જો બાસ ડી લીડ સફળ રહ્યો, તો બોલિંગમાં લોગાન વેન બીક સૌથી સફળ બોલર રહ્યો હતો, જેણે 2 વિકેટ ઝડપી હતી.

નેધરલેન્ડે પાકિસ્તાનને પાછળ છોડ્યું

નેધરલેન્ડની આ 2 મેચમાં પ્રથમ જીત છે. આ પહેલા પાકિસ્તાન સામે તેને હારનો સામનો કરવો પડ્યો હતો. 2 મેચ બાદ નેધરલેન્ડના 2 પોઈન્ટ છે અને તેણે પોઈન્ટ ટેબલના ગ્રુપ-એમાં પાકિસ્તાનને પાછળ છોડીને હાલમાં બીજા નંબરનું સ્થાન કબજે કર્યું છે. પાકિસ્તાનની ટીમ ત્રીજા નંબરે આવી ગઈ છે. પોઈન્ટ ટેબલમાં પાકિસ્તાનના પણ 2 પોઈન્ટ છે પરંતુ નેધરલેન્ડ સારા રન રેટના કારણે તેનાથી આગળ છે. ભારત ગ્રુપ-એમાં ટોચની ટીમ છે.