લોર્ડ્સમાં પાકિસ્તાન સામેની બીજી ટેસ્ટ પહેલા, ઇંગ્લેન્ડની ક્રિકેટ ટીમ ફરી એકવાર મેદાનની બહારના વિવાદોને કારણે ચર્ચામાં આવી છે. ડર્બીમાં એક ક્લબની બહાર પોલીસે હાથકડી લગાવીને અટકાયત કર્યા બાદ ફાસ્ટ બોલર બ્રાઇડન કાર્સેને લોર્ડ્સની ટેસ્ટ ટીમમાંથી બહાર કરી દેવામાં આવ્યો છે. આ ઘટના બાદ, ઇંગ્લેન્ડના ટેસ્ટ કેપ્ટન જો રૂટ તેના સાથી ખેલાડીઓના બેજવાબદાર વલણથી ગુસ્સે ભરાયો છે.

જો રૂટે લગાવી ક્લાસ

લોર્ડ્સ ખાતે એક પ્રેસ કોન્ફરન્સ દરમિયાન, રૂટે સ્પષ્ટ કર્યું કે મેદાનની બહાર ખેલાડીઓની વારંવારની ભૂલોથી તે ખૂબ જ દુઃખી અને નિરાશ છે. જો રૂટે ટીમના વલણની આકરી ટીકા કરતા કહ્યું, “સાચું કહું તો, હું સંપૂર્ણપણે નારાજ છું. ગયા અઠવાડિયે હેડિંગ્લીમાં અમારા શાનદાર પ્રદર્શન પછી, અમે અહીં એવી વાત પર ચર્ચા કરી રહ્યા છીએ જેનો રમત સાથે કોઈ સંબંધ નથી. આ કોઈ અલગ ઘટના નથી. સમસ્યા એ છે કે આપણે મેદાનની બહાર સતત એવી ભૂલો કરીએ છીએ જે મેદાન પર આપણી મહેનત અને પ્રદર્શનથી ધ્યાન ભટકાવી દે છે.” રૂટે કહ્યું કે તેણે કાર્સે સાથે વાત કરી છે, જે તેની હરકતથી ખૂબ જ દુઃખી છે અને માફી પણ માંગી છે. આ મામલો હાલમાં ક્રિકેટ રેગ્યુલેટરની તપાસ હેઠળ છે.

એક જ સિઝનમાં ત્રીજો કેસ

દારૂ અને મોડી રાતના વિવાદો ઈંગ્લેન્ડ ક્રિકેટ ટીમ માટે માથાનો દુખાવો બની રહ્યા છે. ગુસ એટકિન્સન અને ભૂતપૂર્વ કેપ્ટન બેન સ્ટોક્સ પછી બ્રાયડન કાર્સ આ સિઝનમાં ત્રીજો ખેલાડી બન્યો છે, જે મોડી રાતના બનાવો અને તપાસને કારણે ટેસ્ટ મેચ ગુમાવશે. બેન સ્ટોક્સની નિવૃત્તિ બાદ કેપ્ટનશીપ સંભાળતા રૂટે ખેલાડીઓ માટે મધ્યરાત્રિનો કર્ફ્યુ ઉઠાવી લીધો હતો. આ ઘટના છતાં, રૂટે જણાવ્યું હતું કે તે કર્ફ્યુ ફરીથી લાદવાના પક્ષમાં નથી, પરંતુ ખેલાડીઓએ તેમની જવાબદારી સમજવી જોઈએ.

સ્ટીફન ફ્લેમિંગ સાથે ટીમ કલ્ચર બદલાશે

જો રૂટે જણાવ્યું હતું કે તે ટીમમાં મજબૂત અને સકારાત્મક કલ્ચર બનાવવા માટે નવા હેડ કોચ સ્ટીફન ફ્લેમિંગ સાથે કામ કરશે. તેણે જણાવ્યું હતું કે લંડન પહોંચ્યા પછી, ટીમે આ મુદ્દા પર ગંભીર અને સીધી ચર્ચા કરી હતી, જેથી ખેલાડીઓ ઇંગ્લેન્ડની જર્સી પહેરવાની જવાબદારીઓને સમજી શકે. ટીમનું ધ્યાન હવે લોર્ડ્સ ટેસ્ટમાં પાકિસ્તાન સામે મેદાન પર મજબૂત પ્રદર્શન કરવા પર છે.

એક સમયે કરોડોની સંપત્તિનો માલિક હતો આ સ્ટાર ખેલાડી, હવે ખુલ્લા પગે દુનિયા ફરે છે