અઝહર મહમૂદ બન્યા પાકિસ્તાનના મુખ્ય કોચ, PCBએ લીધા વધુ 3 મોટા નિર્ણય

પાકિસ્તાનની ટીમ ન્યુઝીલેન્ડ સામે 5 મેચની T20 સિરીઝ રમવા જઈ રહી છે. આ સિરીઝ 18 થી 27 એપ્રિલ વચ્ચે રમાશે. આ શ્રેણી માટે પાકિસ્તાનના પૂર્વ ઝડપી બોલર અઝહર મહમૂદને ન્યુઝીલેન્ડ શ્રેણી માટે મુખ્ય કોચ તરીકે નિયુક્ત કરવામાં આવ્યા છે. તમને જણાવી દઈએ કે મિકી આર્થરનો કોન્ટ્રાક્ટ ખતમ થયા બાદ પાકિસ્તાન ફુલ ટાઈમ કોચની શોધમાં હતું. હવે એ શોધ પૂરી થઈ ગઈ છે. અઝહર મહમૂદ પહેલા શેન વોટસન અને ગેરી કર્સ્ટનને મુખ્ય કોચ બનાવવાની ચર્ચા થઈ હતી, પરંતુ મામલો થાળે પડ્યો ન હતો.

અઝહર સિવાય આ ખેલાડીઓ પર જવાબદારી

PCBએ વહાબ રિયાઝને ન્યુઝીલેન્ડ શ્રેણી માટે ટીમનો સિનિયર મેનેજર બનાવ્યો છે. જ્યારે મોહમ્મદ યુસુફને બેટિંગ કોચ અને સઈદ અજમલને બોલ સ્પિન બોલિંગ કોચની જવાબદારી સોંપવામાં આવી છે. તમને જણાવી દઈએ કે સઈદ અજમલ અગાઉ પાકિસ્તાનના ઓસ્ટ્રેલિયા અને ન્યુઝીલેન્ડ પ્રવાસમાં સ્પિન બોલિંગ કોચ રહી ચૂક્યા છે.

અઝહર મહમૂદ ચેમ્પિયન્સ ટ્રોફીમાં બોલિંગ કોચ હતો

આ પહેલીવાર નથી કે જ્યારે અઝહર મહેમૂદ પાકિસ્તાન ટીમ માટે કોચિંગ કરશે. આ પહેલા તે 2016 થી 2019 સુધી પાકિસ્તાનનો બોલિંગ કોચ પણ રહી ચુક્યો છે. જ્યારે પાકિસ્તાનની ટીમે 2017ની ચેમ્પિયન્સ ટ્રોફીની ફાઇનલમાં ભારતને હરાવ્યું હતું, ત્યારે તે ટીમના બોલિંગ કોચ અઝહર મહેમૂદ હતા. ત્યારબાદ મોહમ્મદ આમિરની ઘાતક બોલિંગના કારણે પાકિસ્તાને ફાઇનલમાં ભારતને 158 રનમાં ઓલઆઉટ કરી દીધું હતું. અઝહર મહમૂદે પાકિસ્તાન માટે 164 મેચમાં 162 વિકેટ લીધી છે. આ સિવાય તેમણે 2421 રન પણ બનાવ્યા છે.

વર્લ્ડ કપમાં હાર બાદ બદલાવ

2023 વર્લ્ડ કપમાં શરમજનક હાર બાદ પાકિસ્તાન ટીમમાં ઘણા મોટા ફેરફાર કરવામાં આવી રહ્યા છે. પહેલા બાબર આઝમ પાસેથી સુકાનીપદ છીનવી લીધા બાદ શાહીન આફ્રિદીને T20 અને શાન મસૂદને ટેસ્ટ કેપ્ટન બનાવવામાં આવ્યા હતા. પરંતુ વર્લ્ડકપ પહેલા બાબરને ફરીથી કેપ્ટનશીપ આપવામાં આવી છે. આ સિવાય ટીમની ફિટનેસ પર પણ કામ કરવામાં આવી રહ્યું છે, જેના માટે પાકિસ્તાન ક્રિકેટ ટીમ હાલમાં કાકુલ આર્મી કેમ્પમાં ટ્રેનિંગ કરી રહી છે. તમને જણાવી દઈએ કે ન્યુઝીલેન્ડ સામેની પાંચ મેચોની સિરીઝ માટે મંગળવારે ટીમની જાહેરાત કરવામાં આવી શકે છે.

આ પણ વાંચો : IPL 2024 : PBKS vs SRH મેચના પહેલા જ બોલ પર પંજાબ કિંગ્સે કરી મોટી ભૂલ, લાગી 21 રનની ‘પેનલ્ટી’