IND-A vs BAN-A : ભારે રોમાંચક મેચમાં બાંગ્લાદેશે ભારતને હરાવ્યું, સુપર ઓવરમાં હારી ઈન્ડિયા ટુર્નામેન્ટમાંથી બહાર

એશિયા કપ રાઈઝિંગ સ્ટાર્સ 2025 માં ઈન્ડિયા A ની સફરનો અંત આવ્યો છે. બાંગ્લાદેશ A સામેની રોમાંચક સેમિફાઈનલ મેચમાં, ઈન્ડિયા A સુપર ઓવરમાં હારી ગયું, જેના કારણે તે ટુર્નામેન્ટમાંથી બહાર થઈ ગયું. બાંગ્લાદેશ A એ પહેલા બેટિંગ કરી અને 194 રન બનાવ્યા. જવાબમાં, ઈન્ડિયા A એ 20 ઓવરમાં એટલા જ રન બનાવ્યા. ઈન્ડિયા A એ છેલ્લા બોલ પર મેચ ટાઈ કરી, પરંતુ સુપર ઓવરમાં જીતવાની તક ગુમાવી દીધી. ભારતીય ટીમ સુપર ઓવરમાં એક પણ રન ના બનાવી શક્યું અને પછી વાઈડ બોલે બાંગ્લાદેશને જીતવા માટે જરૂરી એક રન આપી ફાઈનલમાં પહોંચાડ્યું.

રોમાંચક સેમિફાઈનલ મેચ

દોહાના વેસ્ટ એન્ડ ઈન્ટરનેશનલ સ્ટેડિયમમાં બાંગ્લાદેશ A એ પ્રથમ બેટિંગ કરી અને તેના બેટ્સમેનોએ ધમાકેદાર શરૂઆત કરી. ઓપનર હબીબુર રહેમાને માત્ર 46 બોલમાં 65 રન બનાવ્યા, જ્યારે તેના સાથી ઝીશાન આલમે પણ 14 બોલમાં 26 રન બનાવીને મજબૂત શરૂઆત અપાવી. જોકે, ઈન્ડિયા A એ વચ્ચેની ઓવરોમાં જોરદાર વાપસી કરી જેથી 16.2 ઓવરમાં છ વિકેટ ગુમાવીને માત્ર 130 રન જ બનાવી શક્યું.

ઈન્ડિયા A બાંગ્લાદેશ A વચ્ચે ટક્કરનો મુકાબલો

પરંતુ પછી એસએમ મેહરોબ હસનના બેટનો તોફાન આવ્યો. આ બેટ્સમેને ફક્ત 18 બોલમાં 6 છગ્ગા અને 1 ચોગ્ગા સાથે 48 રન ફટકાર્યા. આનાથી બાંગ્લાદેશ A ટીમને 194 રનનો સ્કોર બનાવવામાં મદદ મળી. ઈન્ડિયા A તરફથી ગુર્જપનીત સિંહે સૌથી વધુ બે વિકેટ લીધી, પરંતુ સ્પિનર ​​સુયશ શર્માએ સૌથી સારી બોલિંગ કરી, તેણે ચાર ઓવરમાં 17 રન આપીને એક વિકેટ લીધી.

વૈભવ-પ્રિયાંશની આક્રમક બેટિંગ

14 વર્ષીય વૈભવ સૂર્યવંશીએ ફરી એકવાર ટીમ ઈન્ડિયા માટે શાનદાર શરૂઆત કરી, પ્રથમ ઓવરમાં જ 19 રન ફટકાર્યા. પહેલી ઓવરમાં બે છગ્ગા ફટકાર્યા બાદ વૈભવે બીજી ઓવરમાં બે છગ્ગા ફટકાર્યા અને ટીમ ઈન્ડિયા 3.1 ઓવરમાં 50 રન સુધી પહોંચી ગઈ. વૈભવ તે જ ઓવરમાં આઉટ થયો હોવા છતાં, પ્રિયાંશ આર્યએ છગ્ગા અને ચોગ્ગાનો વરસાદ કરીને આક્રમક રમત ચાલુ રાખી. 10 મી ઓવરમાં આઉટ થતા પહેલા પ્રિયાંશ ટીમને 98 રન સુધી પહોંચાડી ગયો હતો.

અંતિમ ઓવરમાં જીત માટે 16 રનની જરૂર

કેપ્ટન જીતેશ શર્માએ બાજી સંભાળી અને નેહલ વાઢેરા સાથે મળીને ટીમને 150 રન સુધી પહોંચાડી દીધી. જોકે, જીતેશ 15મી ઓવરના છેલ્લા બોલ પર આઉટ થઈ ગયો અને બાંગ્લાદેશે વાપસી કરી, જેનાથી ઈન્ડિયા A મુશ્કેલીમાં મુકાઈ ગઈ. અંતિમ ઓવરમાં જીત માટે 16 રનની જરૂર હતી, ત્યારે આશુતોષ શર્માએ ત્રીજા બોલ પર છગ્ગો ફટકાર્યો. ત્યારબાદ તેણે બીજા બોલ પર ચોગ્ગો ફટકાર્યો. હવે, બે બોલમાં ચાર રનની જરૂર હતી, પરંતુ આશુતોષ પાંચમા બોલ પર બોલ્ડ થઈ ગયો.

છેલ્લા બોલ પર મેચ ટાઈ થઈ

છેલ્લા બોલ પર આવેલા હર્ષ દુબેએ ફિલ્ડર તરફ સીધો શોટ માર્યો અને ભારતીય બેટ્સમેનો બે રન માટે દોડ્યા. બાંગ્લાદેશના કીપરે રન આઉટનો પ્રયાસ કરવાની ભૂલ કરી અને નિષ્ફળ ગયો, જેનો ફાયદો ઉઠાવીને ભારતીય બેટ્સમેનોએ ત્રીજો રન પૂરો કર્યો અને મેચ ટાઈ થઈ અને જે બાદ મેચનું રીઝલ્ટ સુપર ઓવર દ્વારા નક્કી કરવામાં આવ્યું.

સુપર ઓવરમાં ઈન્ડિયા A ની હાર

સુપર ઓવરમાં, ઈન્ડિયા A એ પ્રથમ બેટિંગ કરી, જેમાં કેપ્ટન જીતેશ શર્મા પ્રથમ બેટિંગ કરવા આવ્યો. જોકે, તે પહેલા જ બોલ પર બોલ્ડ થઈ ગયો. આશુતોષ નવા બેટ્સમેન તરીકે મેદાનમાં આવ્યો અને તે પણ બીજા બોલ પર કેચ આઉટ થયો. પરિણામે, ઈન્ડિયા A સુપર ઓવરમાં એક પણ રન બનાવી શકી નહીં. બાંગ્લાદેશને જીત માટે ફક્ત એક રનની જ જરૂર હતી. બાંગ્લાદેશે પણ પહેલા જ બોલ પર એક વિકેટ ગુમાવી દીધી. સુયશ શર્માએ આ વિકેટ લીધી હતી. જોકે, તેનો બીજો બોલ વાઈડ હતો, જેના કારણે બાંગ્લાદેશને મફતના એક રન મળ્યા અને તે જીતી ગયું.

આ પણ વાંચો: IND vs PAK : ભારત-પાકિસ્તાનની ફરી થશે ટક્કર, T20 વર્લ્ડ કપમાં આ દિવસે યોજાશે મહામુકાબલો!

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો