હવે વિરાટ કોહલી પણ રમશે રણજી ટ્રોફી, 13 વર્ષ બાદ આ મેચથી કરશે વાપસી
કોચ ગૌતમ ગંભીરે રણજી ટ્રોફીમાં રમવું પડશે તેમ કહીને BCCIએ હાલમાં જ તમામ ખેલાડીઓને સૂચના આપી હતી, પરંતુ વિરાટે ફિટનેસનું કારણ આપીને 23 જાન્યુઆરીથી શરૂ થનારી મેચમાં રમવાનો ઈનકાર કરી દીધો હતો. જો કે હવે વિરાટે તેનો નિર્ણય બદલી લીધો છે અને 13 વર્ષ બાદ તે ડોમેસ્ટિક ક્રિકેટમાં રમતો જોવા મળશે.
ટીમ ઈન્ડિયાનો સ્ટાર બેટ્સમેન વિરાટ કોહલી પણ આખરે રણજી ટ્રોફીમાં વાપસી કરવા માટે તૈયાર છે. BCCIની તાજેતરની પોલિસીમાં સિનિયર ખેલાડીઓને પણ ડોમેસ્ટિક ક્રિકેટ રમવાની સૂચના આપવામાં આવી હતી, ત્યારપછી બધા એ જાણવાની રાહ જોઈ રહ્યા હતા કે વિરાટ દિલ્હી માટે રમશે કે નહીં. વિરાટે ગરદનના દુખાવાના કારણે 23 જાન્યુઆરીથી યોજાનારી મેચમાંથી પોતાનું નામ પાછું ખેંચી લીધું હતું, પરંતુ હવે એક રિપોર્ટમાં દાવો કરવામાં આવી રહ્યો છે કે વિરાટ કોહલી 30 જાન્યુઆરીથી યોજાનારી મેચ માટે ઉપલબ્ધ રહેશે.
એક રિપોર્ટમાં દાવો કરવામાં આવ્યો છે કે વિરાટ કોહલીએ દિલ્હી એન્ડ ડિસ્ટ્રિક્ટ ક્રિકેટ એસોસિએશન (DDCA)ને કહ્યું છે કે તે 30 જાન્યુઆરીથી યોજાનારી મેચ રમશે. રણજી ટ્રોફીના ગ્રુપ સ્ટેજમાં દિલ્હીની આ છેલ્લી મેચ હશે, જે રેલવે સામે હશે. આ મેચ પહેલા દિલ્હીને 23 જાન્યુઆરીથી સૌરાષ્ટ્ર સામે મેચ રમવાની છે. કોહલીને આ બંને મેચો માટે દિલ્હીની ટીમમાં સામેલ કરવામાં આવ્યો હતો પરંતુ સ્ટાર બેટ્સમેન ગરદનના દુખાવાના કારણે પ્રથમ મેચમાંથી ખસી ગયો હતો, ત્યારબાદ DDCA પસંદગીકારોએ અપડેટ કરાયેલી ટીમમાંથી કોહલીનું નામ હટાવી દીધું હતું.
જો કોહલી આ મેચ રમવા આવશે તો તે 13 વર્ષ બાદ રણજી ટ્રોફીમાં વાપસી કરશે. કોહલીએ છેલ્લે 2012માં દિલ્હી માટે રણજી ટ્રોફી મેચ રમી હતી. જો કે, આ અંગે હજુ પણ શંકા છે કારણ કે આ મેચ 30 જાન્યુઆરીથી 2 ફેબ્રુઆરી સુધી રમાશે અને ત્યારબાદ 6 ફેબ્રુઆરીથી વનડે સિરીઝ રમવાની છે, જેમાં કોહલી ટીમ ઈન્ડિયાનો ભાગ છે. આવી સ્થિતિમાં તે પ્રથમ વનડેમાંથી બ્રેક લેશે કે કેમ તે પ્રશ્ન રહે છે.
કોહલીનો આ નિર્ણય એવા સમયે આવ્યો છે જ્યારે BCCIની કડકાઈ બાદ ટીમ ઈન્ડિયાના તમામ સિનિયર અને નવા ખેલાડીઓ પોતપોતાની ટીમોની રણજી ટ્રોફી મેચમાં ભાગ લઈ રહ્યા છે. રિષભ પંત, યશસ્વી જયસ્વાલ અને શુભમન ગિલ 23 જાન્યુઆરીથી યોજાનાર રાઉન્ડ માટે પોતાને ઉપલબ્ધ જાહેર કરી ચૂક્યા છે. આ પછી ટીમ ઈન્ડિયાના કેપ્ટન રોહિત શર્માએ પણ મુંબઈની ટીમમાં વાપસીની જાહેરાત કરી હતી અને તેને પણ આગામી મેચ માટે ટીમમાં જગ્યા મળી ગઈ છે. આ સિવાય સ્ટાર ઓલરાઉન્ડર રવીન્દ્ર જાડેજા અને ફાસ્ટ બોલર મોહમ્મદ સિરાજ પણ રમતા જોવા મળી શકે છે.
છેલ્લા કેટલાક દિવસોથી ભારતીય ક્રિકેટમાં સતત ચર્ચા ચાલી રહી છે કે શું સિનિયર ખેલાડીઓએ પણ ડોમેસ્ટિક ટુર્નામેન્ટ, ખાસ કરીને રણજી ટ્રોફીમાં રમવું જોઈએ. ન્યુઝીલેન્ડ અને ઓસ્ટ્રેલિયા સામેની ટેસ્ટ શ્રેણીમાં હાર અને ખાસ કરીને સિનિયર બેટ્સમેનોના ખરાબ પ્રદર્શન બાદ મુખ્ય કોચ ગૌતમ ગંભીરે આના પર ભાર મૂક્યો હતો અને ત્યારપછી BCCIએ પણ તમામ ખેલાડીઓ માટે તેને ફરજિયાત બનાવી દીધું હતું. (All Photo Credit : PTI)