દુનિયા જેને GOAT કહે છે તેને વર્લ્ડ કપની ટીમમાંથી હટાવવાની તૈયારી!
જ્યારે ક્રિકેટ ચાહકો ઈન્ડિયન પ્રીમિયર લીગ-2024 માટે તૈયાર થઈ રહ્યા છે, ત્યારે દુનિયાભરની ટીમો T20 વર્લ્ડ કપ પર નજર રાખી રહી છે. તમામ ટીમોએ પોતાની રણનીતિ બનાવવાનું શરૂ કરી દીધું છે, આ દરમિયાન એક ચોંકાવનારા સમાચાર પણ આવી રહ્યા છે. માનવામાં આવી રહ્યું છે કે ઓસ્ટ્રેલિયન ટીમ સ્ટીવ સ્મિથને T20 વર્લ્ડ કપની યોજનામાંથી બહાર કરી શકે છે અને તેના માટે 15 ખેલાડીઓની ટીમમાં જગ્યા બનાવવી મુશ્કેલ બની જશે.
T20 વર્લ્ડ કપ 2024 માટે ટીમોનું મંથન શરૂ થઈ રહ્યું છે અને ઓસ્ટ્રેલિયા એક મોટો અને મહત્વપૂર્ણ નિર્ણય લેવા જઈ રહ્યું છે. માનવામાં આવે છે કે સ્ટીવ સ્મિથને T20 વર્લ્ડ કપની ટીમમાં સ્થાન નહીં મળે. સ્ટીવ સ્મિથને T20 ટીમમાંથી બહાર કરવામાં આવી શકે છે.
ઓસ્ટ્રેલિયન મીડિયા રિપોર્ટ્સ અનુસાર સ્ટીવ સ્મિથ, જે હાલ જ સમાપ્ત થયેલ વેસ્ટ ઈન્ડિઝ સામેની T20 સિરીઝનો ભાગ ન હતો તે ન્યુઝીલેન્ડ સામેની T20 સિરીઝમાં રમશે, પણ તે T20 વર્લ્ડ કપમાં પોતાની જગ્યા બનાવી શકશે નહીં. સ્ટીવ સ્મિથે છેલ્લે નવેમ્બર 2023માં T20 મેચ રમી હતી.
ક્રિકેટ ઓસ્ટ્રેલિયા માર્ચ-એપ્રિલમાં જ T20 વર્લ્ડ કપ માટે પોતાની ટીમની જાહેરાત કરી શકે છે, તેમાં સ્ટીવ સ્મિથને સ્થાન મળવું મુશ્કેલ છે. ભલે સ્ટીવ સ્મિથને ટેસ્ટ ફોર્મેટમાં GOAT કહેવામાં આવે છે, પરંતુ તે T20માં GOAT જેવુ પ્રદર્શન કરી શક્યો નથી.
થોડા સમય પહેલા IPLની હરાજીમાં સ્ટીવ સ્મિથને કોઈ ટીમે ખરીદ્યો ન હતો. જો તેના કરિયર પર નજર કરીએ તો અત્યાર સુધી સ્ટીવ સ્મિથે 244 T20 પ્રોફેશનલ મેચ રમી છે, જેમાં તેના નામે 5 હજારથી વધુ રન છે. સ્ટીવ સ્મિથની T20 ફોર્મેટમાં સરેરાશ 31 છે, જેમાં તેના નામે 24 અડધી સદી અને 3 સદી છે.
આ સિવાય જો આપણે સ્ટીવ સ્મિથના ટેસ્ટના આંકડા જોઈએ તો દરેકને આશ્ચર્ય થશે. સ્ટીવ સ્મિથે અત્યાર સુધી 107 ટેસ્ટ મેચમાં 9634 રન બનાવ્યા છે, સ્મિથની એવરેજ 58.04 છે જ્યારે તેના નામે 33 સદી, 41 અડધી સદી અને 4 બેવડી સદી છે. ફેબ-4ની યાદીમાં સ્ટીવ સ્મિથ સદીઓના મામલે ટોપ પર છે.